1 Timoteo 1
1
Saludo
1Esaki ta karta di Pablo, apòstel di Kristu-Hesus, riba òrdu di Dios, nos Salbador, i Kristu-Hesus, nos Speransa. 2E karta akí ta pa Timoteo,#Echonan 16:1-3 mi yu berdadero den fe. Dios Tata i nos Señor Kristu-Hesus duna bo grasia, mizerikòrdia, i pas.
Atvertensia kontra doktrina falsu
3Manera mi a pidi bo kaba ora mi a sali pa region di Masedonia, keda na Éfese. Tin algun hende einan ku ta instruí doktrina falsu. Duna òrdu pa nan stòp di hasi esei! 4Anto bisa nan tambe pa no sigui atendé ku fábulanan i e asuntu di lista infinito di antepasado. E kosnan ei ta trese diskushon i no ta promové e formashon ku Dios ta duna pa medio di fe. 5Ma propósito di proklamashon di plan di Dios ta pa promové amor ku ta sali di un kurason puru, un konsenshi limpi, i fe berdadero. 6Algun hende a desviá for di e kosnan akí i a kai den diskushon sin pia sin kabes. 7Nan ke ta maestro di Lei, kaba nan no ta komprondé ni loke nan mes ta papia, ni tampoko loke nan ta siña otro hende ku tantu siguransa.
8Nos sí sa ku Lei ta bon, si us'é manera mester us'é! 9Kòrda ku Lei no ta pa hende ku ta biba bon, pero pa esnan ku ta rebelde, desobedesidu, ku ta biba sin Dios, pa pekadónan i hendenan ku ta despresiá i profaná tur loke ta sagrado, pa esnan ku ta mata nan tata i mama, pa asesino, 10hende hòmber ku ta kometé inmoralidat seksual ku hende muhé, i hende hòmber ku ta drumi ku hende hòmber, trafikante di katibu, gañadó, esnan ku ta hura falsu òf ku ta hasi tur loke ta kontra doktrina sano. 11E doktrina ei ta kuadra ku e bon notisia glorioso ku Dios, bendishoná sea su nòmber, a konfia na mi.
Gradesido pa mizerikòrdia di Dios
12Mi ta gradisí Kristu-Hesus, nos Señor, ku a duna mi forsa; E t'Esun ku a konfia mi i nombra mi pa sirbiÉ, 13ounke den pasado mi tabata papia malu di djE, persiguiÉ#Echonan 8:3; 9:4-5 i insult'É. Pero Dios a tene mizerikòrdia ku mi, pasobra ami, ku e tempu ei no tabata un kreyente, no tabata sa kiko mi tabata hasi. 14I nos Señor a drama su grasia abundantemente riba mi i a duna mi fe i amor di kua Kristu ta e fuente.
15E palabranan ku ta sigui ta konfiabel i ta meresé aseptashon kompleto: Kristu-Hesus a bini na mundu pa salba pekadónan. I ami ta esun di mas grandi! 16Pero Dios a tene mizerikòrdia ku mi: Kristu-Hesus a mustra ami, e pekadó di mas grandi, su pasenshi sin límite komo ehèmpel pa tur esnan ku despues lo bin kere den djE i risibí bida eterno. 17Honor i gloria na e Rei di tur siglo, na e Dios inmortal, invisibel i úniko! Amèn.
18Timoteo, mi yu, mi ta konfia bo ku e enkargo ku mi a duna bo, konforme ku loke bo a tende den e profesianan ku bo a yega di haña. Laga e profesianan ei ta un yudansa pa bo den lucha pa e bon kousa, 19armá ku fe i ku un konsenshi limpi. Algun hende ku no a skucha nan konsenshi a frakasá den nan fe. 20Den nan bo ta haña hende manera Himeneo i Alexander. Mi a entregá nan den man di satanas pa siña nan no blasfemá.
Currently Selected:
1 Timoteo 1: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013