E kanto di tur kanto 1
1
1E kanto di mas bunita den tur kanto, di Salomon.#1:1 di Salomon; otro posibel tradukshon: dediká na Salomon òf riba Salomon#1 Reinan 4:32; E Kanto di tur Kanto 3:9-11
Kanto di introdukshon
Mucha muhé
2Ai, mare e por sunchi mi,
mare su boka por pega na di mi…
Bo karisianan ta mas sut ku biña mes!
3Fragansia di bo perfume ta ekskisito,
zonido di bo nòmber ta zonza mi.
P'esei tur mucha muhé gusta bo.
4Ranka mi bai kuné! Ban, hasi lihé!
Bo ta mi rei;
hiba mi den bo kamber
pa nos fiesta huntu
i pa mi gaba bo karisianan
mas ku biña mes.
N' ta por nada tur mucha muhé gusta bo.
5Maske mi koló a bira brùin,
mi ta bunita sí.
Mi parse tènt di lona skur,#1:5 di lona skur; hebreo tin: di Kedar. Kedar ta nòmber di un tribu bibá zùit di Israel. Nan tèntnan tabata trahá di lana di kamel òf kabritu.
pero tambe tapeit real.#1:5 tapeit real; literalmente: tapeitnan di Salma
Damitanan di Herusalèm,
6no wak mi ku menospresio
pasobra mi koló ta skur!
Ta solo a kima mi;
mi ruman hòmbernan a rabia ku mi,
pone mi kuida nan hòfinan di wendrùif,
anto mi propio hòfi sí m'a deskuidá.
7Bisa mi antó, amor di mi bida,
na unda bo ta laga bo karnénan kome yerba,
na unda nan ta sosegá mèrdia.
E ora ei mi n' tin mester di kana baga#1:7 kana baga; otro posibel tradukshon: kana ku belo bistí. Prostitutanan tabata bisti belo ora nan tabata buska hende hòmber; kompará Génesis 38:14.
serka e trupanan di karné di bo kompañeronan.
(Mucha muhénan di stat)
8Ta sa bo n' sa esei antó, mucha bunita?
Sigui pista dje karnénan numa
i laga bo kabritunan kome yerba
banda di e chosanan di e wardadónan.
Mucha hòmber
9Dushi di mi,
mi ta kompará bo ku kabai di parada,
mará dilanti di un kitrin real.#1:9 un kitrin real; hebreo tin: kitrin di fárao
10Bo ta lusi presioso, bo sa,
ku e kadenanan ei na bo band'i kara,
e koyarnan ei na bo garganta.
11Pero…nos ta bai traha kadena di oro pa bo,
ku kònòpi di plata!
Mucha muhé
12Tanten ku mi rei ta riba su sofá
mi bálsamo di nardo ta manda un dushi holó.
13Mi amor ta pa mi
un sakitu di mira oloroso,
sosegando meimei di mi pechunan.
14Mi amor ta pa mi
un tròshi di flor di hèna
fo'i den hòfi di wendrùif di En-Gèdi.#1:14 En-Gèdi: un oásis na kosta wèst di Laman Morto
Kanto di Bunitesa
Mucha hòmber
15Esta bunita bo ta, dushi di mi,
esta bunita!
Bo wowonan parse palomba.
Mucha muhé
16Abo tambe, mi amor,
bo tambe ta nèchi, bo ta tipo!
Yerba bèrdè ta nos kama;
17takinan di palu di seder
ta forma biganan di nos kas,
palunan di siprès su skòtnan.
Currently Selected:
E kanto di tur kanto 1: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013