Filemon 1
1
Saludo
1Esaki ta un karta di Pablo, prizonero pa kousa di Kristu-Hesus, i di ruman Timoteo pa Filemon, nos kerido kompañero di trabou, 2i pa e iglesia ku ta reuní na su kas. E karta akí ta bai tambe pa nos ruman muhé Apfia#1:2 nos ruman muhé Apfia; otro manuskrito tin: nos ruman stimá Apfia òf: kerido Apfia i pa Argipo,#Kolosensenan 4:17 nos kompañero den lucha. 3Dios nos Tata i Señor Hesu-Kristu duna boso grasia i pas.
Pablo ta resa pa Filemon
4Mi ta gradisí mi Dios, kada be ku mi kòrda riba bo den mi orashonnan, 5pasobra mi a tende kuantu fe bo tin den Señor Hesus i kuantu stimashon bo tin pa Dios su pueblo. 6Mi ta resa, pa e fe ku bo ta kompartí ku e otro kreyentenan, hiba bo na un komprondementu berdadero di tur e kosnan bon ku nos#1:6 nos; otro manuskrito tin: boso por hasi pa Kristu. 7Mi ruman, bo amor a hasi mi mashá kontentu i a kurashá mi hopi, pasobra el a sirbi pa animá kurason di e rumannan.
Pablo ta pidi un fabor pa Onésimo
8P'esei, ounke apelando na Kristu mi tin derecho di bisa bo kiko bo mester hasi, 9tòg mi ta preferá di hasi un petishon na bo a base di amor. I mi ta hasi e petishon ei komo Pablo, un hòmber bieu kaba i asta prezu awor akí pa kousa di Kristu-Hesus. 10Mi ke pidi bo pa mi yu Onésimo;#Kolosensenan 4:9 ta den prizòn mi a bira su tata spiritual. 11Un tempu e no tabata sirbi bo pa nada, pero awor el a bira útil pa nos tur dos.
12Mi ta mand'é bèk pa bo i ta manera ta mi kurason mes mi ta saka manda pa bo!#1:12 Tin manuskrito ku ta añadí: Risibié bon anto. 13Lo mi tabatin gana di ten'é serka mi pa e por a yuda mi na bo lugá, tanten mi ta prezu pa kousa di e bon notisia. 14Sinembargo mi no ke hasi nada sin bo aprobashon, pa bo no haña bo ta hasi un bondat fòrsá, ma di e manera akí bo por hasié di bo mes boluntat.
15Por ta mashá bon ku ta pa un tempu el a alehá for di bo, djis pa bo hañ'é bèk pa semper. 16Pasobra awor e no ta djis un simpel katibu: mas ku un katibu e ta un ruman stimá. Anto spesialmente pa mi, e ta mashá stimá! Pero pa abo e mester ta mas stimá ainda, komo katibu i komo ruman den Señor.#Sirag 33:31-32
17Ke men si bo tin mi pa kompañero, risibí Onésimo manera lo bo a risibí mi mes. 18Si el a perhudiká bo den ki forma ku ta òf si e ta debe bo algu, laga esei pa mi kuenta. 19Awor mi mes man ta skibi esaki: ‘Ami, Pablo, ta paga bo bèk!’ Klaro ku no ta nesesario pa mi kòrda bo ku bo tin un debe serka mi, esta bo mes! 20Sí, mi ruman, hasi mi e fabor akí pa Señor; animá mi kurason komo ruman den Kristu!
21Mi ta skibi bo ku konfiansa ku bo ta skucha mi. Mi sa ku lo bo hasi muchu mas tantu ku loke mi ta pidi bo. 22Tambe ta bini aserka ku bo mester prepará un lugá pa mi keda, pasobra mi ta spera ku Dios lo skucha boso orashonnan i entregá mi bèk na boso.
Saludo final
23Kumindamentu di Epafras,#Kolosensenan 1:7; 4:12 ku ta prizonero huntu ku mi pa kousa di Kristu-Hesus. 24Kumindamentu di mi kolaboradónan Marko,#Echonan 12:12,25; 13:13; 15:37-39; Kolosensenan 4:10 Aristargo,#Echonan 19:29; 27:2; Kolosensenan 4:10 Demas#Kolosensenan 4:14; 2 Timoteo 4:10 i Lukas.#Kolosensenan 4:14; 2 Timoteo 4:11 25Grasia di Señor#1:25 Señor; otro manuskrito tin: nos Señor Hesu-Kristu sea ku boso.#1:25 Tin manuskrito ta añadí: Amèn.
Currently Selected:
Filemon 1: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013