Marko 1
1
Huan Boutista ta prepará kaminda pa Hesus
(Mateo 3:1-12; Lukas 3:1-9,15-17; Huan 1:19-28)
1Kuminsamentu di e bon notisia tokante Hesu-Kristu, e Yu di Dios. 2Ta skibí den buki di profeta Isaías ku Dios ta bisa:
Ata, Mi ta manda mi mensahero Bo dilanti
pa e drecha kaminda pa Bo.#Malakías 3:1
3Un hende ta grita den desierto:
‘Prepará kaminda pa Señor.
Hasi kaminda korkobá règt
pa E pasa.’#Isaías 40:3
4Asina Huan a kuminsá batisá hende den desierto i prediká ku nan mester kombertí i batisá pa Dios pordoná nan piká. 5For di henter region di Hudea i for di Herusalèm, tur hende tabata bini serka dje. Nan tabata konfesá nan piká i e tabata batisá nan den riu Yordan. 6Huan tabata bisti paña trahá di lana di kamel i e tabatin un faha di kueru mará na su sintura.#2 Reinan 1:8 E tabata kome dalakochi i miel di abeha di mondi. 7E tabata proklamá: ‘Despues di mi ta bini Esun ku ta muchu mas poderoso ku mi; mi no ta sirbi ni pa bùk kita su sandalia. 8Ami ta batisá boso ku awa ma É lo batisá boso ku Spiritu Santu.’
Boutismo di Hesus. Hesus den desierto
(Mateo 3:13—4:11; Lukas 3:21-22; 4:1-13)
9A sosodé ku den e tempu ei Hesus a sali for di Nazarèt den region di Galilea pa laga Huan batis'É den riu Yordan. 10Nèt ora E tabata sali for di awa, Hesus a mira shelu sker habri i Spiritu Santu baha riba djE manera un palomba. 11A zona un stèm for di shelu: ‘Abo ta mi Yu stimá, Bo ta legria di mi kurason.’#Génesis 22:2; Salmo 2:7; Isaías 42:1; Mateo 3:17; 12:18; Marko 9:7; Lukas 3:22
12Djis despues Spiritu Santu a pon'É bai den desierto. 13El a keda aya kuarenta dia largu i durante e tempu ei satanas tabata purba di lag'É kai den tentashon. El a biba meimei di bestia feros i angelnan tabata sirbiÉ.
Hesus ta kuminsá prediká
(Mateo 4:12-17; Lukas 4:14-15)
14Despues ku nan a kohe Huan prezu, Hesus a bai Galilea i E tabata anunsiá e bon notisia di Dios. 15E tabata bisa: ‘E dia a yega: reino di Dios ta serka! Kombertí i kere e bon notisia akí.’#Mateo 3:2
Hesus ta yama su promé disipelnan
(Mateo 4:18-22; Lukas 5:1-11)
16Un bia Hesus tabata kana kantu di lago di Galilea i El a mira Simon i Andreas, dos ruman piskadó. Nan tabata tira reda den lago. 17Hesus a bisa nan: ‘Sigui Mi i lo Mi hasi boso piskadó di hende.’ 18Nan no a pèrdè pa gana, mesora nan a laga nan reda para i siguiÉ. 19Hesus a sigui kana un poko mas leu i a mira Hakobo i Huan, dos yu di Zebedeo. Nan tabata sintá den boto ta prepará nan reda. 20Asina Hesus a mira nan, El a yama nan pa nan siguiÉ. Hakobo i Huan a bai laga nan tata Zebedeo ku su trahadónan den e boto i sigui Hesus.
Hesus ta saka mal spiritu for di un hòmber
(Lukas 4:31-37)
21Nan a drenta Kafárnao i asina ku sabat a yega, Hesus a bai snoa. Aya El a instruí e hendenan. 22Nan a keda babuká di tende kon E tabata siña nan. Pasobra E tabata siña nan ku outoridat i no manera e dòktornan di lei.#Mateo 7:28-29 23Nèt e ora ei, tabatin den snoa un hòmber ku tabatin mal spiritu den dje. El a kuminsá grita: 24‘Ta kiko Bo ke di nos, Hesus di Nazarèt? Akaso Bo a bini pa kaba ku nos? Mi sa bon bon ta ken Bo ta; Bo ta e Santu di Dios!’ 25E ora ei Hesus a skual e spiritu i El a orden'é: ‘Keda ketu i sali for di e hòmber ei!’ 26E spiritu a pone e hòmber kai djimpi, el a dal un gritu duru i sali for di e hòmber. 27Tur hende a keda asina asombrá ku un tabata puntra otro: ‘Ta kiko esaki? Un siñansa nobo, ku outoridat; asta mal spiritu e hòmber akí ta ordená i nan ta obedes'É!’ 28No a dura muchu ku su fama a plama rònt region di Galilea.
Hesus ta kura hopi hende
(Mateo 8:14-17; Lukas 4:38-41)
29Asina nan a sali for di snoa, nan#1:29 Asina nan…, nan; otro manuskrito tin: Asina El…, El a bai kas di Simon i Andreas huntu ku Huan i Hakobo. 30Suegra di Simon tabata drumí malu ku keintura; for di ora Hesus a yega nan a kont'É dje suegra. 31El a bai serka e suegra, kohe su man tene i yud'é lanta riba. Su keintura a kita i el a kuminsá sirbi nan.
32Anochi, ora solo a kaba di baha, nan a trese tur hende malu i tur hende poseé serka Hesus. 33Henter e pueblo a bin para dilanti di porta di e kas. 34Hesus a kura hopi hende di tur sorto di malesa i El a saka hopi demoño. E no tabata pèrmití e demoñonan papia, pasobra nan tabata sa ta ken E ta.
Hesus ta biaha rònt Galilea
(Lukas 4:42-44)
35Mardugá grandi, ora tabata skur ainda, Hesus a lanta i sali for di kas pa bai resa na un lugá solitario. 36Simon i e otronan a bai busk'É. 37Ora nan a hañ'É, nan a bis'É: ‘Tur hende ta buska Bo.’ 38El a kontestá nan: ‘Ban e otro pueblonan den bisindario pa Mi por prediká einan tambe. Ta pa e motibu ei Mi a bini.’ 39Asina Hesus a biaha rònt Galilea; E tabata prediká den snoa i saka demoño.#Mateo 4:23; 9:35
Hesus ta kura un leproso
(Mateo 8:1-4; Lukas 5:12-16)
40Un hòmber ku tabata sufri di lepra, a bini serka Hesus, hinka rudia su dilanti i rog'É: ‘Si Bo ke, Bo por kura mi.’ 41Yen di kompashon, Hesus a saka su man mishi kuné i bisa: ‘Mi ke, sea kurá.’ 42Mesora e lepra a kita i e hòmber a kura. 43Hesus a mand'é bai pero a atvertié severamente: 44‘Mira pa bo no bai konta niun hende kiko a pasa, sino bai sí serka saserdote i lag'é wak bo. Ofresé pa bo purifikashon e sakrifisio ku Moises a ordená.#Levítiko 14:1-32 E ora ei tur hende tin prueba ku segun lei bo ta kurá.’ 45E hòmber a bai i kuminsá konta tur hende loke a pasa; el a plama e historia tur kaminda. P'esei Hesus no por a drenta e siudatnan públikamente mas; E tabata keda pafó di e siudatnan na lugánan solitario. Ma for di tur skina hende tabata bini einan serka djE.
Currently Selected:
Marko 1: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013