Yeremías 3
3
Israel, kasá infiel di SEÑOR
1SEÑOR ta bisa:
‘Bo ta kere ku si un hòmber divorsiá di su kasá,
esaki bandon'é i bai kasa ku un otro hòmber,
e ta bolbe tuma e kasá akí bèk?
Esei lo tabata profanashon grave pa e pais.#Deuteronomio 24:1-4
Pero Mi ta bisa bo, Israel,
bo a mòrs ku kantidat di amante
i awor bo ke bini bèk serka Mi?
2Hisa bo kara wak kabes pelá di seru!
Akaso a keda un di nan
kaminda bo n' drumi ku bo amantenan?#Deuteronomio 12:2-3
Bo tabata sinta kantu di kaminda warda nan,
manera un beduino den desierto ta warda su víktima.
Bo a profaná e pais
ku bo inmoralidat i mal ehèmpel.
3P'esei Ami, SEÑOR, a wanta yobida,
awa pa kosecha no a kai.
Sinembargo bo a keda ku mirada frepòstu
manera prostituta, sin niun klase di bèrgwensa.
4Ki mishi bo ta bisa awor:
“Bo ta mi Tata,
Bo n' stima mi fo'i tempu mi tabata chikí?
5Bo n' ta keda pa semper rabiá ku mi tòg?
Bo rabia n' tin ku kita un dia?”
Pero ta ku boka b'a bisa esaki.
Echo ta, ku b'a sigui hasi mes tantu maldat ku bo tabata por.’
E dos ruman muhénan: Israel, solo birá i Huda infiel
6Tempu ku Yosías#2 Reinan 22:1—23:30; 2 Krónikanan 34:1—35:27 tabata rei, SEÑOR a bisa mi: ‘B'a mira kiko Israel, e muhé solo birá ei, a hasi? El a bira lomba pa Mi, subi tur seritu i kai drumi bou di kada palu bèrdè pa hasi prostitushon. 7Mi a pensa: “Dia e kansa e ta bolbe serka Mi”, pero e no a bolbe. I Huda, su ruman muhé infiel, a mira esei. 8Mi a duna e Israel solo birá ei su papel di divorsio i a mand'é bai pa motibu di su adulterio. Tòg M'a ripará ku Huda, su ruman infiel, no a kohe kurpa; e tambe a bai hasi prostitushon. 9El a kometé adulterio ku diosnan di palu i di piedra i el a profaná henter e pais ku su aktitut kabes habrí. 10Apesar di tur loke Israel a hasi, su ruman, e Huda infiel ei, no a bolbe serka Mi, es desir, no di kurason, solamente ku bunita palabra.’#Ezekiel 23; Hoséas 2:2-20 Asina SEÑOR a bisa. 11Kaba SEÑOR a bisa mi: ‘Israel, e solo birá ei, ta mihó pará kompará ku e Huda infiel ei.’
12P'esei SEÑOR a manda mi grita den direkshon nort:
‘Israel, solo birá, regresá!
Mi no ta traha kara rabiá pa bo mas,
pasobra Mi ta bondadoso.
Mi no ta keda pa semper rabiá ku bo.
13Djis rekonosé bo fayonan numa,
atmití ku bo a kibra tur relashon ku Mi, SEÑOR, bo Dios.
Konfesá ku bou di kada palu bèrdè
bo a plama bo enkantonan pa diosnan straño
i ku bo no a skucha Mi.’
Asina SEÑOR ta bisa.
14‘Bira bèk, yunan solo birá,
t'Ami so ta boso doño!’
SEÑOR ta bisa.
‘Mi ta kohe un o dos hende
for di kada siudat i famia di boso
i hiba nan seru di Sion.
15E ora ei Mi ta duna boso wardadó,
ku lo sòru pa boso manera mi kurason ta deseá,
ku lo guia boso ku sabiduria i kapasidat.
16Den e tempu ei, ora boso bira un pueblo numeroso ku ta pobla henter e pais, ya niun hende no tin mester di papia di e Arka di Aliansa#Éksodo 25:10-22 mas. Nan no ta kòrda riba dje ni kòrda mas kon e tabata. Nan no ta sinti su falta mas ni nan no ta traha otro Arka di Aliansa tampoko. 17Pasobra e ora ei henter Herusalèm lo ta mi trono. Tur pueblo lo ta reuní ei pa honra Mi. Nan lo no sigui konsehonan tèrko di nan kurason malbado mas. 18Boso, hende di Huda, lo djòin e hendenan di Israel i sali huntu for di nort pa bolbe e pais, ku Mi a duna boso antepasadonan komo propiedat permanente.’#Génesis 13:14-15
SEÑOR ta yama su pueblo pa bolbe serka djE
19SEÑOR di su parti a bisa:
‘Kuantu gana Mi n' tabatin di duna bo
e lugá di honor den mi yu hòmbernan
i tambe un pais fantástiko,
e patrimonio di mas bunita na mundu!
M'a kere ku bo ta yama Mi “Mi Tata”
i ku bo no ta bira lomba nunka mas pa Mi.
20Ma meskos ku un muhé infiel ta bandoná su kasá,
asina boso tambe, israelitanan,
a bira infiel na Mi i bandoná Mi.’
Asina SEÑOR a bisa.
21‘Bo ta tende bochincha riba kabes pelá di seru.
Ta pueblo di Israel ta yora i sklama pa pordon,
pasobra nan a lubidá Ami, SEÑOR nan Dios,
i nan a sigui e kaminda robes.
22Bira bèk, yunan solo birá,
Mi ta bai kura boso i sòru pa boso bolbe bira fiel.
Mare boso por bisa:
“Ata nos ta bini serka Bo,
pasobra Abo ta SEÑOR, nos Dios.
23Akaso tur e desòrdu i gritamentu riba seru- i seritunan
a yuda nos ku algu?
T'Abo so, nos Dios, por trese solushon pa Israel.
24E dios repugnante, Baal, a kome tur kos
ku nos antepasadonan a atkerí.
Te asina leu ku nos por kòrda,
el a devorá nos karné- i bakanan,
nos yu hòmber- i muhénan.
25Mihó nos kai drumi riba e kama di bèrgwensa
i tapa nos kurpa ku deshonra;
pasobra for di nos hubentut te dia djawe,
nos i nos antepasadonan a peka kontra SEÑOR;
nunka nos no a obedes'É.” ’
Currently Selected:
Yeremías 3: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013