Matthieu 3
3
Mber kile le Jean ke njèkule dooge manné njonm
(An-in Marc 1.1-8; Luc 3.1-18; Jean 1.19-28 tɔ)
1Kêm ndɔnge’t nè nga, Jean ke njèkule dooge manné njonm unde loo tee aw kêm dile’t ke ɓeekon ke Judée ile mber ede nè:
2– I turi hal si tede Konɓee ke danran nain ngɔr ta.
3Esaie njèribe-dè-tà ke tà Nube’t tam tà ɔje’n dè Jean kété ede nè:
«E ndu è ke njèkile mber kêm dile’t:
I gɔli rebe le Kuwe-ɓee,
i rai ngann rebege le’n adi asinan lêtêt-lêtêt.»
4Jean ule Kubu ke d’ojo se bin lugman rann’t. E dɔ ɓede’n se ndar. Bêteĝe se wubu tuju ke walé á è nyankuse’n se ndɔ’n-ndɔ’n. 5Dooge ke kêm ɓee-bò ke Jérusalem se njé ke ɓeekon ke Judée bere mbak se njé ke ngann ɓeege’t ke gan dè ba ke Jourdain malang reei rann’t. 6Dooge nè nga malang reei ra Jean’t ɔri gir kaiyage le de ke nata adi nin ade ule’n de manné njonm dann ba ke Jourdain.
7Loo ke Jean an Pharisienge se Saddusienge bule reei rann’t le kade ule de manné njonm ɓaa, è tam se de ede nè:
– Sei ke i tooi asinan se li jênênnge, ké nan tɔje sei rebe kan-in wong le Nube ke ndi à ree nga wa? 8I turi hal si, i rai nyanrage ke maje. 9I piti ra si sei edi nè: «Jè jè ngannkà Abraham.» Man m’ede sei ndàt, kuberi herge ke tooi nè nga Nube asekum tel de ke ngannkà Abraham karè. 10Kunge ke janm tò ngire kagege’t ɓá. Kage ke rara ke ann majelé ɓaa, d’a tuge’n gang’n kile’n poro. 11Man ɓaa, mann á m’ule sei njonm tutu karè kade i turi hal si. Nè doo karé ke tɔgmong le’n dum le’m à ree goom’t gugu non. Gabang ke njann’t géa, man m’asekum tɔr se dè ra’m lé. Doo nè nga à ɔr sei kunde sei se ninn si gai se Ndil-Kêmnda a, se por a tɔ. 12Doo nè nga, kéee le’n è jinn’t. A ɔi kêm gar le’n ndát-ndát a, a ɔse nja ko le’n nan’t kêm dam’t a tɔ. Nè a ró tise ko se por ke doo ase tɔl ndan lé.
Jésu ade Jean ule’n manné njonm
(An-in Marc 1.9-11; Luc 3.21-22 tɔ)
13Jésu in kêm ɓeekon ke Galilée ree inge Jean tà ba ke Jourdain tede kade ule’n manné njonm. 14Nè Jean in se’n dè’t ede nè:
– Man m’aw ndoo kade i á ule’m manné njonm. Nè ké i kuwe i tel i ree ram’t taɓai wa?
15Nè Jésu tel ile’n dè’t ede nè:
– Inye ade m’ra ɗarinè. Ra nyan ke kêm Nube ndige tɔl mbas nga, tuwe jè ɗêw titeke bè.
Jean inye Jésu ade ra titeke bè. 16Loo ke Jean ule Jésu manné njonm ɓá ɓaa, Jésu unde loo tee nata. An! ke loon’t nè kuwe, kum danran teen halal ade an ndil Nube rise ndi dènn’t tite der-nda bè. 17An! ke loon’t nè kuwe, ndu doo ɓar danran ede nè:
– E nè nga è Ngonn’m ke m’tár’n ngain a, ra’m nel’m dènn’t ngain a tɔ.
Currently Selected:
Matthieu 3: GUL04
Highlight
Share
Copy
Want to have your highlights saved across all your devices? Sign up or sign in
Magtub Mann-ra ke Kige ©Alliance Biblique du Tchad, 2004