Biy 17

Pawulo bo na Sila ku Tesalonika

1Bu bataba Amfipoli na Apolonya, bo batubuka ku Tesalonika kwaba Bayudayo na nzo-nkutukunu. 2Bunu bwaba kifu kyaandi, Pawulo wayende ku bamono. Nde wadzoonso na bo mu Matinu mu biluumbu bya mpuumunu bitatu. 3Nde wabaangula na wasoongo ti: Kiristo waba wayelemene kumono mpasi, na kufuluka mu bafwa, na ti: "Yesu, wu nyiri mu kuluyaabisa me wunde ngo Kiristo." 4Babamosi mu bo bataambula mamo, na babvuutuna na Pawulo na Sila, ha kimosi na mpuumbu Bahelene, bari na kinzaambi, na bakyeetu balaka ba lukiinsu. 5Kasi Bayudayo bamono musoki, na baholo baatu ba babakala bari na mutima-bubi, babakutukisa na basa kisaangila kunsa bvula. Bu batubuka ha nzo Yasoni, bo basaka Pawulo na Sila mu ku banata ha busu bwa baatu. 6Bahelaa kubamono, bo banata Yasoni na bampaangi babamosi kuri batsuundisi, na babeke mu kwefula misaakulu ti: "Baatu bamaba ngo bakotisiri tungu mu nsi yansiina, mu lumalu beki hamaha." 7Yasoni wubataamburyee ku nzo yaandi, na bobanso bakwetuungukila misiku mya Kayisari, bo bakweleele ti kuri mbyaasi yikimi, yiri nkuumbu Yesu." 8Bu bayuka bubwo, mpuumbu baatu na bamfumu ba nsi batekete. 9Bamfumu bu baholo mboongo kuri Yasoni na baatu bakaka, ha ba bapatula.

Pawulo na Sila ku Beroya

10Hanaho, mu butsuku bampaangi, basiindika Pawulo na Sila ku Beroya. Bu batubuka, bayende ku nzo-nkutukunu ya Bayudayo. 11Babo baba babvuri bitsimi bubwete ti na bari Tesalonika. Bo bataamburi maampu mu kiminu kyalaka. Mpisi kiluumbu, bo baba fyongokinaana Matinu, mu kumono kari myominso myatswiika. 12Mu bo, baatu balaka basiiri kanyi, kwaba Bahelene, bakyeetu ba lukiinsu, na babakala balaka. 13Ngo kasi Bayudayo ba ku Tesalonika, bayabaana ti Pawulo wuri mu kweyaabisa maampu ma Nzaambi ku Beroya, bo bayende kukwo na babeke kunyiingisa mpuumbu na kusa kisaangila. 14Hanaho, bampaangi baholo baatu mu kunata Pawulo ku teke mubu; Sila bo na Timoteho ngo bari basii sala ku Beroya. 15Baba kweyende Pawulo, bamunata natee ku Atena. Tumi bo babvutuka na mukeensu wuri ti Sila bo na Timoteho beende mu mawasu kuri kari nde.

Pawulo ku Atena

16Pawulo mu ntaangu yi kaba kingaana bambaasi ku Atena, wabama kunsa mitima waandi bu kamono ti bvula didyo dyaba dyaluula mu biteki. 17Nde waba dzoonsaana ku nzo-nkutukunu bo na Bayudayo, na minsaambiri Nzaambi, na ha kibeendu kya bobanso mpisi kiluumbu, nde waba dzoonsaana na baatu baba haho. 18Babamosi se baba kooleelaa ti ba-epikure na ba-estoyiko baba yolaa na nde. Bamosi baba leelaa ti: "Ngaa-lusuku wu se ti nki katiiri kuleele?" Bakaka ti: "Bunu ti muyikisi banzaambi banzeense nde kari", bukuri nde waba yaabisaana Musamu wamubwete wa Yesu na mfulukulu ya bafwa. 19Bo bamukangaana bamunata ha kibeendu kya mfuundu bakuutu ba bvula, ha bamuleele ti: "Buri beetu lo tutsiitsiri kuyaaba nkya nyikusulu dzamoono ye wuri mu kweyaabisa? 20Ye wuri mu kuyukusa beetu misamu myanzeense na beetu tutiiri kuyaaba mambangukulu mu myo." 21Mukwongo, bari Atena na banzeense badzakala ha bvula didyo baba lutisaa ntaangu yaaku mu kudzoonso, bunu pe kuyuka mampolo mamoono. 22Pawulo katelemaa ha kakati dya kibeendu kya mfuundu bakuutu, wabeke mu kuleele ti: "Baatu ba ku Atena, me nyiri mu kumono ti beenu luri na kinzaambi kyalaka mu myominso. 23Bu nyabee kweyunga, na kwetala bimama byeenu byangisi, me nyamwiini dziku dimosi di bari batina ti: "kuri nzaambi yiri bayiyaa ko." Ngo, bibyo bi luri mu kwesaambila kwahele kuyaaba, bibyo me nyiisiri mu kuluyabisa. 24Nzaambi yiyo ya yirika nsi na byobinso biri mu nsi, nde ngo Mfumu yulu na butoto, nde ka koodzakala mu manzo-nzaambi matuungu mu myooko mya baatu ko. 25Nde wahele se na nzala kuri ti myooko mya baatu mimusalisa, kari na nzala kitotolo ti kimosi se ko, nde koohaanaa kuri bobanso kidziingu na muwuumunu na byobinso. 26Mu muutu mosi, nde wayirika bitsuumbu byobinso bya baatu, na wabasuusa ha butoto bwabutsiina, nde wasa mandilu mu mantaangu, mandilu ma mansi ma kwedzakala baatu, 27mpisi bemusaka, ti ha yuka ba kwebumbula mu nzala kumudzuukila, koomosoko nde wahele la na mpisi muutu mu beetu. 28Mukwongo, mu nde beetuneenu turi bamwooyo, na turi mu kwedyaata, na turi na kidziingu. Bunu bwa leele babamosi mu baatu bangaa-lungwensu ti: "Beetu se turi mu kitsuumbu kya nde." 29Ngo bu turi kitsuumbu kimosi na Nzaambi, lo yaa tutsima ko ti nde wafwanikina na woolo, na palata, na tari bunu pe kiteki kyahala mu bunkete na mu bitsimi bya baatu. 30Nzaambi wahele kubweese kutsima mantaangu ma bunzimbu bwa baatu, mu lumalu nde wuloombo kuri baatu ba mansi momanso ti bayiinga madyeele. 31Bukuri nde wasoolo kiluumbu ki katsuundisa nsi mu nsungumunu, mu muutu wunde wu kari kasoolo, na nde wasoongo kimbaangi kuri bobanso mu kumufulukisa mu bafwa." 32Bu bayuka mfulukulu ya bafwa, babamosi bamusiila munsiku, bakaka baleele ti: "beetu ngo bari tumi bee tukuywiila mu mamo kiluumbu kikimi." 33Haho, Pawulo kayisika ha kakati dya bo. 34Mukwongo, baatu babamosi bakaangamini mu nde, basiila kanyi, mu bo kwaba Deni mosi waba mu mfuunda bakuutu, na mukyeetu wuri nkuumbu Damari na bakaka se.

Currently Selected:

Biy 17: MW2013

Highlight

Copy