Sofoniya 1
1
1Fare ge Bage ɗiŋnedin ne jya̰ Sofoniya ge Kuch vya, ge Gedaliya baŋ, ge Amariya baŋ kon ge azi, ge Ezekiyas baŋ kon ge ataa. Jya̰ na fare mbe zaman ge Yozias ge Amon vya ne ka gan ge suwal Yuda pal go.
Dok a ho̰l ne suwar pet
2Ka̰l ge Bage ɗiŋnedin ne, mbi mbo burmi kaŋ ge ne suwar pal ma pet uzi.
3Mbi mbo burmi naa dasana ma, ne kavaar ma,
ne njoole ma, ne sii ma.
Mbi mbo burmi naa ge sone ma
ne kaŋ ge ne e nama ke fare ge sone ma uzi.
Mbi mbo burmi naa dasana ma ne suwar pal uzi.
Ka̰l ge Bage ɗiŋnedin ne.
Ho̰l ge Dok ne suwal Yuda ma ne Ursalima pal
4Mbi mbo ke ho̰l ne suwal Yuda ma,
ne naa ge ne ka ne suwal Ursalima go ma,
mbi mbo burmi kaŋ ge ne gá ne sḭḭm Baal pe ne swaga mbe go uzi.
ɓanna ne naa ge ne ke na tuwaleya ma dḭl ma uzi.
5Mbi mbo burmi nama ge ne ndé bama jwaklak ma pala digi
uware kaŋ ge ne pḭr zi ma,
ne nama ge ne uware mbi ma,
a ka saŋge bama ndwara guni ta ne dok Molok ma me.
6Mbi mbo burmi nama ge ne saŋge mbi bama go̰r ma,
ge a ne ɓyare mbi pe to ma,
ne nama ge ne ele fare pe ne mbi ta to ma.
7Zane me Bageyal, Bage ɗiŋnedin ndwara se!
Ago dam ge Bage ɗiŋnedin ne gá gwa.
Ago Bage ɗiŋnedin ke kaŋzam ge tuwaleya ne ya go,
mbege naa ge na ne tó nama ya ma ya go.
8Ge dam tuwaleya ge mbi ne go,
mbi mbi mḛre naa ga̰l ge temel ma,
ne gan vya ma,
ne pet nama ge ne syal jalaw kan ba̰r ge pe ɗogle ma.
9Dam mbe go, mbi mbo mḛre nama ge ne yele yele wat zok zi ma pet,
poseya ne nama ge ne wi bama ga̰l ma yàl ma ne kaŋ maŋgeya ma,
ne kaŋ ge bama ne ɓó mbuɗiya zi ma.
10Dam mbe go, ka̰l ge Bage ɗiŋnedin ne,
naa mbo za̰ ka̰l fyaso pyanna ge zok wak ge sii ma ne go,
ne yo̰re ta ma ge ndwala pul ge giya̰l go,
ne waageya ge ɓaŋlaŋ ge njal ma ne.
11Naa ge ne ndwala pul ge le seɗe ge go ma,
puwale me fyalla digi,
ago naa ge ke suk ma mwaɗak a mbo burmi uzi.
naa ge er bware ma pet a mbo pur uzi.
12Swaga mbe go, mbi mbo gat ol mbi tok go
ɓyare Ursalima yàl buwal lelet,
mbi mbo mḛre naa ge ne mwaɗe fiya cwagat ma,
ge ne dwat go, Bage ɗiŋnedin ke a̰me ge kwaɗa ko ge sone to ma.
13Ago, a mbo pál nama kaŋ ɓolla ma,
nama yàl ma mbo gá pṵṵl.
A mbo sin zok ma, amma a mbo kat nama zi to bat,
a mbo ɗḭ oyo̰r ma, amma a mbo njot nama jiya̰l ma to bat me.
Dam ge Bage ɗiŋnedin ne
14Dam ge ɓaŋlaŋ ge Bage ɗiŋnedin ne gá gwa,
mbo ya go avun cap,
mborra ge na ne ya mbo e naa fyal fyaso ge zwalla,
ko ndu ge pateya puy, mbo tol swaga a sya na ko̰r.
15Dam mbe mbo kat dam pore juliliya,
dam kḭḭmi ne wak nonna,
dam burmiya ne a̰seya,
dam tṵ ɗiglim ne pḭr sebeya pisil ɗeɗek.
16Mbo kat dam sun tṵ
ne puwaleya ge naa ge mbal pore ma ne,
ge suwal ge ne ve ne gulum ga̰l digi ma
ne bama swaga ge njole swaga ge haal ma pal.
17Mbi mbo zwal yál ya naa dasana ma pal,
a mbo gá mbo viya̰ ne ɓaal ma go,
ago a ke sone mbi ndwara se.
nama swama ma mbo sor suwar zi vit
nama siya ma mbo gá kanna buwal go.
18Ko nama bware ma, ko nama dinar ma puy,
a mbo zur nama dam pore juliliya ge Bage ɗiŋnedin ne go to.
Ne ol ge pore juliliya ge na ne
mbo burmi suwar uzi mwaɗak.
Mbo kat haŋle ge be to,
mbo burmi naa ge ne suwar pal ma uzi mwaɗak.
Currently Selected:
Sofoniya 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.