Filibus ma 1
1
Wak sanna
1Bulus ma ne Timotawus, mo̰r ge Kris Jeso ne ma, ne naa ge mbegeya ge ne Kris Jeso zi ge ne suwal Filibus go ma pe pet, ne naa ga̰l ge ne dó ndwara ne ɓase ge Dok ne ma pal ma ne naa ge temel ma pe me. 2Kwa a̰se ne katɗa halas ge Dok ge nee Bá ne, ne ge Bageyal Jeso Kris ne na ka poseya ne aŋ.
Kaɗeya ge Bulus ne ne naa ge hon fareba ge ne suwal Filibus go ma pe
3Mbi gwan da ne gugu hon Dok ge mbi ne ɗaɗak swaga ge mbi ne dwat ne aŋ go. 4Ɗaɗak, ge kaɗeya ge mbi ne ma zi ne aŋ pe pet, mbi ka ke na da ne laar saal, 5ne mbarra ge aŋ ne mba mbi ne fare ge kwaɗa pe oyya, ne dam ge zḛ ge ya day ɗiŋ ma̰ no. 6No a kwarra ge mbi ne ne: Na ge ne e pe ke temel ge siŋli mbe no aŋ zi, mbo koy na kerra ɗiŋ na wak wi dam gwanna ge Jeso Kris ne ya go. 7A dosol ge mbi kat ne dwatɗa mbe no ne aŋ pe pet, ne da pe mbi laar wa̰ aŋ wan, ge daŋgay ge mbi zi, ge fare ge kwaɗa pe ɗaŋgeya zi ne jan naa go na fare ge fareba ne zi, aŋ pet aŋ ɓa̰ dagre ne mbi kwa a̰se ge Dok ne mbe zi. 8Ago Dok kwa kwa go mbi jan fareba: aŋ pet mbi laar hé aŋ ge be to, laar wanna ge Kris Jeso ne zi.
9Kaɗeya ge mbi ne zi, mbi kaɗe go, aŋ ka zuliya laar wanna zi, ne kwarra zi, ne hale fare ma pe zi pet, 10go no aŋ ba detɗa hale fare ge siŋli ma pe, ne da pe aŋ ba kat ŋgaraŋ be ge fare a̰me eya aŋ pal ne dam ge Kris ne pe, 11aŋ ba ka zuliya kaŋ kerra ge dosol zi, na ge ne mbo ne Jeso Kris ta ya, ge hormo ne uwareya ge Dok ne zi.
Wanna ge Bulus ne, ne zamma zḛ ge fare ge kwaɗa ne
12Ná vya ma, mbi ɓyare go aŋ kwa no: fare ge ne ɓo mbi e fare ge kwaɗa zam zḛ zo. 13Ago ge wanna ge mbi ne ma zi pet, ko swaga ge ɗogle ma go, zul ge mbi ne ma ŋgay go mbi ne daŋgay zi da ne Kris pe. 14Ná vya ma gḛ ge Bageyal zi, ne zul ge mbi ne pe, a á ta oy fare ge Dok ne ne dulwak ɗu, be vo me. 15A fareba, naa a̰me ma oy fare ge Kris ne da ne yil ma ne gaage, ge may ma oy na da ne dwatɗa ge kwaɗa. 16Nama mbe ma no, a ke na da ne laar wanna, a da ne kwarra go, a tó mbi da ne fare ge kwaɗa pe ɗaŋgeya. 17Nama ge zḛ ge mbe ma no, a waage Kris da ne o̰yom ge gaage, nama dwatɗa ma yaɗat to. Dwatɗa ge nama ne a e dṵṵl ge ɗogle ma mbi pal daŋgay ge mbi ne zi. 18Da̰a̰me mbi to! Ko nama ke na mbuɗiya zi ko fareba zi, ago a oy ne go fare ge Kris ne. Mbi da ne laar saal, mbi mbo gwan ke laar saal uwale. 19Ago mbi kwa kwa kaŋ kerra mbe ma no pet saŋge ya zur mbi, ne kaɗeya ge aŋ ne ma ta, ne mbarra ge O̰yom ge Jeso Kris ne ta me. 20Ɓyareya ge mbi ne zi, ne jobreya ge mbi ne, saaso mbo ke mbi ne kaŋ a̰me pe to bat. Amma á tene ge mbi ne kaŋ ma zi pet, ko ne zaŋgal ya day, ko ma̰ no, ago Kris mbo ɓol uwareya duur ge mbi ne zi, ko mbi ka ne ndwara, ko siya ge mbi ne zi. 21Ago ne mbi ta, kat ne ndwara a Kris, suya a kaŋ ɓol mam ne.
22Amma kadɗa kat ne ndwara ge mbi ne ge duur zi da ne pool hon mbi viya̰ ge ke temel ge kwaɗa, mbi kwa kaŋ ge mbi ba tal to. 23Mbi a̰re a̰re, mbi da ne sḛ tuli ge mborra ge mbo kat dagre ne Kris, ko a kaŋ ge siŋli gḛ ne ne naa gḛ ta. 24Amma ne aŋ pe, a kwaɗa waɗeya ge mbi kat duur no zi. 25Mbi da ne kwarra tyatyat, mbi kwa go mbi mbo gwan kat dagre ne aŋ pet, ne donna ge aŋ ne pe, ne laar saal ge aŋ ne hon fareba zi pe me. 26Ne da pe, gwanna ge mbi ne ya aŋ ta, na ho̰ aŋ viya̰ ge gwan uware ta Jeso Kris zi ne mbi pe.
Kyarga kerra ne fare ge kwaɗa pe
(1Tes 2:12-16, Ibr 10:32-36)
27Ɗeŋgo, kaŋ kerra ge aŋ ne ma ka dimma ne fare ge kwaɗa ge Kris ne go, ne da pe, ko mbi mbo ya ndil aŋ, ko mbi ka to, mbi ka za̰ go aŋ mḛya dagre o̰yom ge ɗu zi, aŋ ke kyarga dagre ne dulwak ɗu me, ge fareba honna ge fare ge kwaɗa zi. 28Be ge ya̰ ta ŋgwabeya ge naa ge ho̰l ma tok go to. Ne nama pe, a kaŋ ge ne ŋgay go nama ba̰ ban, amma ne aŋ pe, a kaŋ ge ne ŋgay go aŋ má má ne Dok ta. 29Ago na sḛ ho̰ aŋ bobo dḭl ge Kris ne zi, ne da pe aŋ ho̰ fareba na ta ɗeŋgo to, amma aŋ njó yál ne na pe me. 30Ne jo̰ aŋ ke kyarga ge aŋ ne ka kwa mbi kerra mbe, aŋ da ne na kwarra, ɗiŋ ne se no, mbi ke kyarga mbe gale ba.
Currently Selected:
Filibus ma 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.