Markus 1
1
Fare oyya ge Yohanna bage ke naa baptisma ne
(Mat 3:1-6, Luk 3:1-6, Yoh 1:19-23)
1Pe eya ge fare ge kwaɗa ge Jeso Kris ge Dok vya ne#1:1 «Dok vya» ne maktub ge zaŋgal a̰me ma zi to.. 2Ne a ne njaŋge ne maktub ge anabi Isaya ne zi go:
«Ndi, mbi teme mbi bage temeya mo ndwara zḛ,
ndwara ɗaɗe viya̰ ma.
3Ka̰l ge ndu ge ne oy ne ful pul zi ne:
Nṵsi me viya̰ ge Bageyal ne,
ɗaɗe me na viya̰ ma temel tat#Mal 3:1, Isa 40:3..»
4Yohanna bage ke naa baptisma mbo ya ful pul zi, ka oyya go: «Ke me baptisma ge ne ŋgay go aŋ dé ya haseya go, go no aŋ ba ɓol poreya ge aŋ sone ma ne.» 5Naa ge ne suwal Yuda go ma pet poseya ne naa ge ne Ursalima go ma mwaɗak a ka mbo ya na ta, ka ke nama baptisma maŋgaɗam Urdun se, a ka fut bama sone ma zum me.
6Yohanna ka kan ba̰r jambal susu, ne waa vwalla na pul go#2Gan 1:8., ka zam tere ma ne daaram ma me. 7Ka oyya go: «Ndu ge ne mbo ne mbi go̰r ya, a pool waɗe mbi. Mbi be mbyat ge hugi se ndwara saa na tyarko táál ma to. 8Mbi ke aŋ baptisma mam se, amma na sḛ mbo ke aŋ baptisma ne O̰yom ge mbegeya.»
Baptisma ne pe herra ge Jeso ne
(Mat 3:13—4:11, Luk 3:21-22, 4:1-13)
9Dam mbe ma pul zi, Jeso mbo ne Nazaret ge suwal Galile ne ya, Yohanna ke na baptisma maŋgaɗam Urdun se. 10Swaga ge ne ka ndé ne mam se ya digi, kwa pḭr hage tene, O̰yom mbo ya na pal dimma ne maale go. 11Ka̰l a̰me ndage ne pḭr zi ya go: «Mo mbi vya ge laar wanna ne, mbi sḛ ke tuli da ne mo#Kmb 2:7, Isa 42:1..»
12Swaga mbe go juju, O̰yom ɓyan na mbo ful pul zi ya. 13ke ful pul zi dam wara-anda, Saytan ka her na pe. Ka kat dagre ne kavaar ge ful zi ge ma, maleka ma ka ke temel hon na. 14Go̰r ge a ne wá̰ Yohanna daŋgay zi go ɗe, Jeso mbo Galile ya oy fare ge kwaɗa ge Dok ne. 15Ka Jan go: «Swaga mbyat go, muluk ge Dok ne ga gwa. Hase me, ho̰ me fareba ne fare ge kwaɗa.»
16Swaga ge ne ka kaleya maŋgaɗam Galile wak go, kwa Siman ma ne na ná vya Andrawus ne dol kool. Ago a naa ge wan sii ma ne. 17Jeso jan nama go: «Kare me mbi pe ya, mbi mbo saŋge aŋ naa ge wan naa dasana ma.» 18Se se no, a ya̰ bama kool, a kare na pe. 19Mbo zḛ ya nde, kwa Yakub ge Zebede vya ma ne na ná vya Yohanna ne fak go, a ka nṵsi bama kool. 20Swaga mbe go, tol nama. A ya̰ bama bá Zebede fak ya poseya ne naa ge temel ma. A kare na pe.
Jeso zon ndu ge ne o̰yom ge seŋgre
(Luk 4:31-37)
21A mbo suwal Kafarnahum ya. Dam ɗigliya go, wat Sinagog zi, ɗage hate naa. 22Naa ge a ne ka za̰ na ma, a ka ke ajab ne hateya ge na ne. Ago ka hate nama dimma ne ndu ge ne pool go, amma a be dimma ne naa ge njaŋgeya ma go to. 23Swaga mbe go, ndu a̰me ge ne o̰yom ge seŋgre ka nama Sinagog zi. Ka oyya go: 24«Jeso ge Nazaret, mo ɓyare da ne i ta ɗaa? Mo mbo ya ban i ɗaa? Mbi kwa mo kwa, mo mbegeya ge Dok ne ne!» 25Jeso mḛre na, jan na go: «Zane, wa ne na zi zum.» 26O̰yom ge seŋgre mbe ɗage pil na, ka oyya ne ka̰l ndaar, wat ne na zi zum. 27Vo wan nama, a ka jan ta go: «A ma kaŋ ne go ɗaa? A hateya ge giya̰l ne, hon na da ne pool! Ko o̰yom ge seŋgre ma puy, hon nama wak, a ka gwan ne bama pala na pe se.» 28Swaga mbe go, na dḭl dasare swaga ma go pet, suwal ge Galile ne ma go mwaɗak.
Jeso zon Bitrus tisi ge gwale
(Mat 8:14-15, Luk 4:38-39)
29Swaga ge ne wá ne Sinagog zi ya zum, a ne Yakub ma ne Yohanna ma mbo Siman ma ne Andrawus ya. 30Siman tisi ge gwale ne fiya ne se, ka da ne haare, a jan na na fare. 31Ndar tene ya na ta, wan na tok digi, haare ya̰ na, gá ke temel hon nama.
Jeso zon moy ma pe hini hini
(Mat 8:16-17, Luk 4:40-41)
32Gasamal, swaga ge gyala ne di, a gene na naa ge moy ma ya, ne naa ge ne o̰yom ge seŋgre ma me. 33Naa ge ne suwal diŋ ma mwaɗak a kote ya zok wak go. 34Zon moy ma pe hini hini gḛ, ka yan o̰yom ge seŋgre ma gḛ ne naa zi uzi, ka ya̰ nama viya̰ ge jan fare to, ne da pe a kwa na kwa.
Fare oyya ge Galile go
(Luk 4:42-43)
35Le cya̰wak pala, swaga gale ne pisil pupurum, ɗage, mbo ful pul zi ya, ka ke kaɗeya swaga mbe go. 36Siman ma ne na kaam ma mbo ɓyare na. 37Swaga ge a ne ɓó na, a jan na go: «Ndi, naa pet, a ɓyare ne go mo!» 38Na sḛ gwan ne nama janna go: «Mbo me nee suwal vya ge ɗogle ma go, ne da pe, mbi mbo waage fare swaga mbe ma go me, ago mbi mbo ya da ne pe.» 39Mbo suwal ge Galile ne ma go pet, ka waage fare nama Sinagog ma zi, ka yan o̰yom ge seŋgre ma me.
Jeso zon ndu ge kun swama
(Mat 8:1-4, Luk 5:12-16)
40Ndu ge kun swama a̰me mbo ya na ta, gur na ndwara se kaɗe na go: «Kadɗa mo vinna, mo da ne pool hat mbi harcal.» 41Jeso kwa na a̰se, tyare na tok, tat na, jan na go: «Mbi vin go, há harcal.» 42Swaga mbe go juju, swama kunna abe ne ne ta, zon. 43Jeso mḛre na ndaar kaka, ba ɗage ya̰ na mborra. 44Jeso jan na go: «Za̰ kwaɗa, jya̰ ndu a̰me to, mbo ŋgay tene naa ge ke tuwaleya ma ta, mo tyare tuwaleya eya ge Musa ne pal, ne da pe na ka kaŋ sayda nama ta pet#Lev 14:2-32..» 45Swaga ge ne wá zum, ɗage oy fare mbe digi dasareya naa ta pet, kat ge be ge Jeso gwan wat suwal diŋ naa ndwara kwaya̰l go to, amma ga katɗa suwal go̰r zum babur pul ya. Naa ka mbo ya na ta ne swaga ma ya pet.
Currently Selected:
Markus 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.