Sun ta ma 1
1
Ursalima gá ya dimma ne gwale kumur go
1Hat! Gá ya hini,
suwal ge naa ne ka na diŋ ɓase,
gá ya dimma ca ne gwale kumur go!
Na ge ne ka suwal ge ɓaŋlaŋ ge suwal ge ɗogle ma buwal zi,
gan vya ge gwale ge suwal ge may ma ne,
gá ya ke temel mo̰r.
2Ga ya yo̰re tene fyalla ɗaal ma zi,
mḭḭm ga ya sorra na ndwara go mbḭḭ.
Na kondore ma pet,
ndu a̰me ge iyal na laar to bat.
Na koŋkale ma saŋge na ya bama go̰r
a saŋge ya na naa ge ho̰l ma.
3A pál suwal Yuda go,
ya yál njotɗa, ne temel mo̰r kerra zi.
gá ya katɗa pehir ge ɗogle ma buwal zi,
swaga ɗigliya ne na pe to.
Nama ge a ne ka yan na pe ma pet,
a terse na ya ge yál njotɗa ma zi.
4Viya̰ ge mbo Siyona ya ma ya kḭḭmi zi,
ndu ge gwan mbo koteya ne vḛso kerra ma pe to.
Ago, na swaga koteya ma burmi ya uzi.
Na naa ge ke tuwaleya ma ya yo̰reya zi,
na vya kale ma puy, a ya laar pisil zi,
ko Siyona puy ya kḭḭmi zi.
5Na naa ge huur ma waɗe ya na pal,
na naa ge ho̰l ma ga ya katɗa halas.
Ago, a Bage ɗiŋnedin sḛ é na njot yál ne,
ne kuri wak ge na ne ma pe.
Na naa ge ho̰l ma pál na vya ge jabso ma ya mbo mo̰r.
6Siyona ban na hormo ya go mwaɗak,
na naa ga̰l ge temel ma ga ya dimma ne nii
ge ne ɓol zám zamma to ma go.
A ga ya kaŋleya syaya ge bage ne yan bama pe ndwara zḛ.
7Ursalima dwat da ne na dam ma ge yál njotɗa,
ne na dam ge tandaŋgeya ma,
dwat da ne na kaŋ ɓolla ge siŋli ma ge dḛ zaŋgal day ma.
Swaga ge na ɓase ne dé bage ho̰l tok go,
ndu ge sya nama ko̰r be kat to,
a ka cot ta ne nama,
a ka man nama ne nama ne burmi uzi pe.
8Ursalima ke sone ge ɓaŋlaŋ,
da ne pe no saŋge ya seŋgre no.
Nama ge a dḛ ne ka hon na hormo ma,
a ga ya sen na sen.
Ne jo̰ a kwa na suli ya go,
na sḛ ga abe tene uzi ya, ne fyaso.
9Sone ge na ne fá ya na ba̰r ga̰l wak go,
na sḛ be dwat ne kaŋ ge ne mbo detɗa na pal pal to.
Dé detɗa ge sone ge be to,
ndu ge iyal na laar to.
Ga ya janna go: «O Bage ɗiŋnedin, ndi yál ge mbi ne,
mbi naa ge ho̰l ma hal mbi ya go.»
10Naa ge ho̰l ma pál na kaŋ ge siŋli ma ya mwaɗak
na sḛ kwa pehir ge ɗogle ma watɗa ja zok ge mbegeya zi,
na ge, Bage ɗiŋnedin ne tele go
pehir ge ɗogle ma wá ya nama buwal zi to.
11Na ɓase ma mwaɗak a sun ta,
a ɓyare kaŋzam.
A hon bama kaŋ kwaɗa ma ya uzi ne kaŋzam pe,
ne da pe, bama ɓó pool.
Ndi Bage ɗiŋnedin, kwa senna ge mbi ne.
12Aŋ pet ge ne kale ne viya̰ go ma,
mbi yál mbe ke aŋ yál to’a?
Ndi me gale,
ndu ge ne ɓó yál mbyatɗa ne ge mbi ne go ya go’a!
Yál na ge a ne é mbi njotɗa,
na ge Bage ɗiŋnedin ne ho̰ mbi na
ge na dam pore juliliya zi go.
13Ne digi zi ya,
teme ol ya mbi kal wak ma zi,
a na sḛ ne kaŋ ma pal ne.
Hu boy mbi ndwara zḛ,
ɓya̰ mbi ya ne mbi go̰r.
saŋge mbi ya joo pala baŋ,
mbi gá njot yál dam ne dam.
14Jug ge mbi sone ne a vwalla mbi ka̰l zi,
a vwá ya na tok go,
Mbi sone ma wan mbi ya mbi ka̰l zi cal.
Bageyal á mbi pool ya go,
sot mbi ya ge naa ge mbi ne mbya
pili tene ne nama to ma tok go.
15Bageyal ɓyan mbi naa ge pateya
ge ne ka mbi go ma ya uzi ya mwaɗak,
e dam ne mbi pe
ndwara burmi mbi bool ma uzi.
Bageyal ɓerse suwal Yuda ya
dimma ne naa ne ɓerse oyo̰r swaga ke jiya̰l go go.
16Da ne pe, mbi fyal no,
mḭḭm ɓá mbi ndwara no.
Ago ndu ge iyal mbi laar to,
ndu ge hon mbi pool ne mbi ta gwa to.
Mbi vya ma banna go,
ne da pe, bage ho̰l ka pool waɗeya.
17Siyona kaɗe na tok puy ɗe,
ndu ge iyal na laar to.
Bage ɗiŋnedin toge Yakub
naa ge ho̰l ge ne na ziyar go ma ja na pal.
Ursalima saŋge ya seŋgre nama buwal zi.
18Bage ɗiŋnedin dosol,
ago mbi kuri na wak.
Ɓase ma pet, za̰ me gale,
ndi me yál njotɗa ge mbi ne ɗaŋ!
Mbi vya ge kale ma ne mbi bool ma
a pál nama ya swaga.
19Mbi tó mbi kondore ma,
nama sḛ ma ndi mbi kaŋ senna.
Mbi naa ge ke tuwaleya ma ne mbi naa ga̰l ma
a su suwal diŋ,
ne jo̰, a ka ɓyare kaŋzam ndwara ɓol pool puy ɗe,
a be ɓol to.
20O Bage ɗiŋnedin, ndi yál njotɗa ge mbi ne!
Mbi ya iigiya zi.
Mbi dulwak be fi se to,
ne wak kuriya ge mbi ne pe.
Viya̰ zum, kasagar á mbi vya ma go,
yadiŋ, siya ya go.
21A za̰ mbi sun tene,
ndu ge iyal mbi laar to.
Mbi naa ge ho̰l ma mwaɗak a za̰ yál ge mbi ne,
a ke laar saal ne yál ge mo ne é mbi ta pe.
A dam ge mo ne waage na mbe ya̰ ya ne.
Ke ne nama dimma ne mo ne ke ne mbi go me.
22Ya̰ sone ge nama ne dé ya mo ndwara se,
ke ne nama dimma ne mo ne ke ne mbi go,
ne wak kuriya ge mbi ne ma pe pet.
Ago sun tene ge mbi ne ma gḛ ge be to,
mbi sḛ tyane go.
Currently Selected:
Sun ta ma 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.