Yuda 1
1
Wak sanna
1A mbi Yuda, mo̰r ge Jeso Kris ne, ge Yakub ná vya njaŋge maktub hon naa ge a ne tó nama, ge Dok Báá laar ne wa̰ nama, ge a ne koy nama ne Jeso Kris zi ma. 2kwaɗa kerra, ne halas, ne laar wanna ka zuliya aŋ pal.
Anabi ge hale ma
(2Bit 2:1-17)
3Naa ge laar wanna ma, mbi ka ne sḛ tuli gḛ go mbi njaŋge aŋ maktub ge fare ge máya ge nee ne dagre pal, a ŋgat go mbi njaŋge aŋ maktub ndwara moɗege aŋ aŋ mbá pore ne fareba honna pe, na ge a ne ho̰ naa ge mbegeya ma na ndwara ɗu kikit. 4Ago naa a̰me ma ɓur ja aŋ buwal zi, nama ge a ne njaŋge sarya kunna nama pal ne zaŋgal ya day ma, Naa ge ya̰l ma, ge a er kwa a̰se ge nee Dok ne ne seŋgre kerra, a kuri be ge kwa nee Bageyal ge ɗu kikit, ne nee Bageyal Jeso Kris.
5Aŋ ge aŋ ne kwa fare mbe ma no pet, mbi ɓyare vot aŋ pala ndwara ɗu go, swaga ge Bageyal ne zu ɓase ma ne suwal Masar diŋ ya, burmi naa ge ne ho̰ fareba to ma uzi#Wat 12:51, Isi 14:29-30.. 6Maleka ge a ne koy hormo ge bama ne to ma, ge a ne ya̰ bama swaga katɗa ma, koy nama fetɗa ya go ɗiŋnedin ge tṵ ge ɗeret zi ne dam sarya ge ga̰l pe. 7Dimma ne suwal Sodom ma ne Gomor, ne suwal ge ne nama ziyar go ma, a ne ho̰ ta ene ge sḛ duur ne zi, a ka mbo fi ta ne duur ge ɗogle ma, a ga fare sḭ ne nee pe. Dok burmi nama uzi ne ol ge ɗiŋnedin. 8Naa mbe ma ke go no me. Jegreya ge nama ne zi, a hat bama duur seŋgre, a ndil pool ge Bageyal ne kaŋ senna, a sal kaŋ ge hormo ge ne digi zi ya ma. 9Ko Maleka ma ga̰l Mikayel#Dan 10:13,21, 12:1, Daa 12:7. puy, swaga ge a ne Saytan ne ka gage ta, ne harge ta sḛ duur ge Musa ne, be ɓyare gace na fare ne saaso to, amma jya̰ na go: «Bageyal mḛre mo ne!» 10Amma naa mbe ma ɗe, a sal kaŋ ge bama ne kwa nama to ma, kaŋ ge a ne kwa na bama duur go dimma ne kavaar ma ne dwatɗa to go, a kaŋ mbe ma sḛ ban nama ne. 11Woo ge nama ne! Ago a bole kaŋ kerra ge Kaynu ne, Ne bware pe, a ya̰ ta ya̰meya dimma ne Balaam go, a su uzi, ne da pe a kuri Dok wak dimma ne Kore go#1:11 Kaynu: Ndi Pe 4:3-8, Balaam: Ndi Isi 22:1-35, Kore: Ndi Isi 16:1-35.. 12A nama hat ba̰a̰n zamma ge aŋ ne seŋgre ne, a zam dagre ne aŋ be vo, nama sḛ ma ɗame ta ne: A pḭr ge be mam ge saam ne in nama ma ne, uwara ge ne det ya somor pala go be ge tolla ma, a su su ndwara azi, mbugiya digi, 13sḭḭl potɗa ge maŋgaɗam ga̰l yuwam ne, a in hore ge bama kaŋ kerra ge saaso ma ne bama ndwara zḛ, guwa̰r ma ge ne an, nama ge Dok e tṵ ge ɗeɗek ne nama pe ɗiŋnedin.
14A nama pal Enok ge Adam baŋ kon ge ɓyalar ne waage go: «Ndi, Bageyal mbo ya go ne na naa ge mbegeya ge dubu ma, 15ndwara kun sarya naa pal pet. Mbo kun sarya naa ge ya̰l ma pal pet ne nama kaŋ kerra ge ya̰l ma, ne nama fare asar ge a ne jya̰ Dok pal ma pe.» 16Naa mbe ma kat da ne wak cwaɗeya, ne sun ta ɗaɗak, a mbo ene ge bama ne pal, nama wak ma kat da ne fare asar janna, a hon ndu hormo da ne kaŋ ge bama ne ɓol ne na ta pe.
Moɗegeya ne naa ge hon fareba ma pe
17Amma aŋ ɗe, naa ge laar wanna ma, dwa me ne fare ge naa ge temeya ge nee Bageyal Jeso Kris ne ma ne jya̰ aŋ nama ne zḛ ya day. 18A ka jan aŋ go: «Dam pe aya go, naa ge kalam ma, nama ge a ne mbo ne ene ge bama ne ma pal ma, a mbo kat.» 19A nama mbe ma ne! A naa ge varse naa ma ne, naa ge ne hal kavaar ma, naa ge be O̰yom ma ne. 20Amma aŋ ɗe, naa ge laar wanna ma, sḭ me ta digi fareba honna ge aŋ ne ge hatal zi, kaɗe me O̰yom ge mbegeya zi. 21Koy me ta laar wanna ge Dok ne zi, swaga da̰re kwaɗa kerra ge nee Bageyal Jeso Kris ne ge ɗiŋnedin go.
22Kwa me naa ge tumriya ma a̰se. 23Zó me ge may ma ne ol zi ya zum, ge may ma uwale, kwa me nama a̰se ne vo. Abe me ta uzi ne nama ta, ne jo̰ ko nama ba̰r ma puy, a fatɗa dodorob ne nama kaŋ kerra ge duur pal ma.
Uwareya
24Na ge ne mbya koy aŋ ne koo syalla ge daage go, ge ne mbya koy aŋ hormo ge na ne zi, be fatɗa, ge laar saal zi, 25Dok ge ɗu kikit ge nee Bage máya, ne nee Bageyal Jeso Kris ta, hormo, ne pateya, ne pool, ne muluk a na ne ma ne, ne zaŋgal ya day, ne se no, mbo ɗiŋnedin! A go!
Currently Selected:
Yuda 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.