Ezekel 1
1
Dyanna ge Bage ɗiŋnedin ne Ezekel ta
1Dam anuwa̰y ge saba ge anda ne go, del ge tapolɗu ne pul zi, ne jo̰ mbi ka naa ge paal ma buwal zi, ge maŋgaɗam Kebar wak go, mbi kwa pḭr hage tene uzi, mbi ɓol daalam ne Dok ta. 2Saba dam ge anuwa̰y mbe no go, gan Yoyakin ke ya paal zi del anuwa̰y#2Gan 24:8-17, 2Maa 36:9-10.. 3Fare ge Bage ɗiŋnedin ne dyan ya mbi ge Ezekel ge bage tuwaleya Buzi vya ta ge Kaldeya ma suwal go, maŋgaɗam Kebar wak go. Swaga mbe go, pool ge Bage ɗiŋnedin ne kat ne na.
4Mbi ndil swaga, ndi, mbi kwa saam labreya ne kuu ya, ka in pḭr sebeya, ne ol ɗaabeya. Kwaya̰l ver na se, na tuŋsi ge ŋga zi, ka kaal kekeŋ dimma ne ol ne zon walam go. 5Na tuŋsi zi, mbi kwa kavaar ma anda, nama dir dimma ne ndu dasana go. 6Ge daage ka da ne ndwara ma anda, ne ganwak ma anda me. 7Nama koo ma ka temel tat, nama koo ma ne se a dimma ne nday vya koo gwap go, a ka serra dimma ne fool ŋgirma gurgiya go. 8Ge ganwak ge daage pe se, nama tok ma ka dimma ne naa dasana ma tok ma go, saŋgeya keŋ ge anda ma go. Nama ndwara ma, ne nama ganwak ma ka andanda. 9Nama ganwak ma a ka tat ta. A ka mbo bama ndwara zḛ sat be ge saŋge ta se. 10Nama sḛ ma anda mwaɗak a ka da ne ndwara ma andanda: Nama ndwara ge zḛ ge ma di naa dasana ma ndwara ma, nama ndwara ge keleŋ le matoson go di sonne ndwara, ge le magul go di nday ndwara, ge le baŋgay ya di gegelo ndwara me. 11Nama ganwak ma ka bareya ndwara digi, ge azi ma wak ma ka tat ta, ge azi ma ka laar nama sḛ ma me. 12Ge daage ka mbo na ndwara zḛ sat, ge swaga ge saam ne zwal na go, swaga ge bama ne ɓyare mborra go, be ge saŋge ta se to. 13Kavaar mbe ma dir ka dimma ne ol wak yeŋgel go, a ka zen dimma ne gil wak ol go. Gil mbe ka anna kavaar mbe ma buwal zi, ka serra cicim, mam serra ka dwagle serra ne ol mbe zi ya. 14Kavaar mbe ma ka syaya, a ka gwan’a avun cap dimma ne mam ne ser go.
15Mbi ka ndil kavaar mbe ma, ndi, mbi kwa pus koo suwar se ge kavaar ge ndwara anda mbe ma ziyar go. 16Pus koo mbe ma ka serra dimma ne njal sergeleŋ krisolit go, nama sḛ ma anda mwaɗak a di ta. Kerra ge nama ne ka dimma ne a ne wá ta pul zi go. 17Swaga mborra ge nama ne keŋ ge anda ma go, a mbo zḛ be ge viŋgriya to. 18Nama koo ma haal hon naa vo, nama koo mbe ma anda mwaɗak a koŋleya se ne ndwara ma. 19Swaga ge kavaar mbe ma ne mbo zḛ, pus koo mbe ka mbo nama ziyar go, swaga ge a ɗage digi, pus koo mbe ma ka ɗage digi me. 20A ka mbo swaga ge bama laar ne ɓyare mborra go, pus koo mbe ma ka mbo dagre ne nama me, ago o̰yom ge kavaar mbe ma ne ya pus koo mbe ma zi me. 21Swaga ge a ne mbo zḛ, nama sḛ ma ka mbo zḛ me, swaga ge a ne mḛ se, nama sḛ ma ka mḛ se, swaga ge a ne ɗage digi, nama sḛ ma ka ɗage digi me, ago o̰yom ge kavaar mbe ma ne ya pus koo mbe ma zi me.
22Ge kavaar mbe ma pala digi, kaŋ a̰me ne pḭr kulbiya go ka serra dimma ne njal sergeleŋ kristal go, kat abeya nama pala digi ya. 23Ge pḭr pe se, nama ganwak ma ka bareya ta ndwara zi, ge azi ma ka lar nama sḛ ma me. 24Mbi ka za̰ ko̰r ge nama ganwak ma ne swaga ge a ne ka mborra go, ko̰r ge nama ne ka dimma ne ko̰r ge maŋgaɗam ga̰l sḭ́ḭ́l ne go, ne ko̰r ge Bage pool pet ne go, ne ko̰r ge tabeya ge ɓase ma ne go. Swaga ge a ne mḛ se, a yá̰ bama ganwak ma se. 25Ka̰l a̰me ndage ne pḭr kulbiya ge ne nama pala digi zi ya. 26Ge pḭr kulbiya ge ne nama pala digi mbe pala digi, kaŋ a̰me dimma ne njal sergeleŋ safir go kat dimma ne hool gan go me. Ge hool mbe pala digi, dir a̰me kat dimma ne ndu dasana go. 27Mbi kwa kaŋ a̰me dimma ne walam ne zon ol zi go, dimma ne ol wak yeŋgel go ver na se, ne na swaga pe go mbo digi, ne na swaga pe go mbo koo se me. Mbi kwa kaŋ a̰me zenna dimma ne ol go ver na se. 28Ka dimma ne bakḭ ne dyan pḭr digi dam ge mam ne ɓyare swarra go go. Go no ka serra cicim verra se dimma ne hormo ge Bage ɗiŋnedin ne go. Mbi kwa na, mbi kubi mbi pul se, mbi za̰ ka̰l farra#1:28 Dyanna ge Dok ne Ezekel ta, ge dyanna ge Dok ne ge Daalam 4:1-11 zi me..
Currently Selected:
Ezekel 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.