Kaŋ mballa ma 96
96
Mbá me kaŋ mballa ge giya̰l ne Bage ɗiŋnedin pe
(1Maa 16:23-33, Kmb 105, 106)
1Mbá me kaŋ mballa ge giya̰l ne Bage ɗiŋnedin pe.
Naa ge ne suwar pal ma pet,
mbá me kaŋ ne Bage ɗiŋnedin pe.
2Mbá me kaŋ ne Bage ɗiŋnedin pe,
uware me na dḭl.
Waage me máya ge na ne dam ne dam.
3Wa̰ me hormo ge na ne pe pehir ge ɗogle ma ta,
na kaŋ ajab ma pe ɓase ma ta pet.
4Ago Bage ɗiŋnedin ga̰l,
mbya uwareya,
mbya naa sya na vo,
na sḛ ya dok ma pala digi pet.
5Ago dok ge pehir ge ɗogle ma ne ma pet a kaŋ sḭḭm ma ne baŋ.
Amma a Bage ɗiŋnedin ke pḭr ne.
6Na ndwara serra cicim ne siŋli,
pool ma ne hormo ya na gúr ge mbegeya zi.
7Pehir ge ne dunya zi ma, ho̰ me Bage ɗiŋnedin,
ho̰ me Bage ɗiŋnedin hormo, ne pool.
8Ho̰ me Bage ɗiŋnedin dḭl hormo!
Mbo me ya tyare tuwaleya na yapul go!
9Gū me Bage ɗiŋnedin ndwara se ne kaŋ pareya ge mbegeya ma,
naa ge ne suwar pal ma pet, ndá me na ndwara se.
10Jya̰ me pehir ge ɗogle ma buwal zi go:
«Bage ɗiŋnedin gan ne.
A na ɗù dunya pe se ne, ndat to no,
a na kun pehir ma sarya dosol pal ne.
11Pḭr ke tuli, suwar ke laar saal,
maŋgaɗam ga̰l yuwam,
ne kaŋ ge ne na pul se ma pet,
nama suwa̰le digi!»
12Ful, ne kaŋ ge ne na pul zi ma pet,
nama puwale digi,
uwara ge ne murum zi ma pet,
nama suwa̰le digi.
13Ge Bage ɗiŋnedin ndwara se,
ago na sḛ mbo ya go,
mbo ya go ndwara kun sarya suwar pal.
Mbo kun dunya sarya dosol pal,
pehir ma sarya fareba ge na ne zi.
Currently Selected:
Kaŋ mballa ma 96: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
