Kaŋ mballa ma 94
94
Dok a bage geleya ne
1O Bage ɗiŋnedin, Dok bage geleya,
Dok bage geleya, dya̰ tene ya zum.
2Bage ne kun sarya suwar pal, ɗage digi,
gwa̰ ya, gwa̰ ne naa ge jegreya ma potɗa.
3O Bage ɗiŋnedin, ɗiŋ ma swaga go ga ɗaa?
Ɗiŋ ma swaga go ga, naa ge sone ma ba ka uware bama pala ɗaa?
4A jan fare asar, a ka sal fare,
nama ge ne ke ya̰l ma pet a uware ta.
5O Bage ɗiŋnedin, a ke mo ɓase ma yál,
a twacwage mo joo bama koo zi.
6A hun kumur ma ne vya gwasal ma,
a vyan kya̰le ma.
7A ka janna go: «Bage ɗiŋnedin kwa ne go to,
Dok ge Yakub ne wan pe ne go to!»
8Naa ge dale ma, kwa me fare.
Daal ma, a ma swaga go ɗo, aŋ ba gá wan fare pe ɗaa?
9Bage ne ɗḭ togor, a na kat ma̰ be ge za̰ fare to ne ɗaa?
Bage ne ke ndwara, a na kat ma̰ be ge kwa swaga to ne ɗaa?
10Bage ne mḛre pehir ge ɗogle ma,
a na kat ma̰ be ge mḛre naa to ne ɗaa?
Bage ne hon naa dasana ma kwarra,
11Bage ɗiŋnedin, kwa dwatɗa ge naa dasana ma ne kwa,
ago nama dwatɗa ma saam ne baŋ#1Kor 3:20..
12O Bage ɗiŋnedin, ndu ge mo ne mḛre na,
ge mo ne hate na eya ge mo ne ma da ne laar saal.
13Ɓol ɗigliya dam ge yál ma zi,
kat da̰reya a á tuul ne ndu ge sone pe.
14Ago Bage ɗiŋnedin dol naa ge na ne ma uzi to,
saŋge na joo na go̰r to.
15Ago sarya kunna ge dosol mbo gwan ya,
naa ge dulwak ɗeŋger ma mbo kare na pe.
16A wuɗi mbo ɗaŋge mbi pe naa ge sone ma pal ne ɗaa?
A wuɗi mbo mḛ mbi pe go ge naa ge ke ya̰l ma ndwara zi ne ɗaa?
17Te go Bage ɗiŋnedin ba sya mbi ko̰r to,
mbi te ya wat naa ge ne gá katɗa wak ɗamal ma buwal zi.
18Swaga ge mbi ne jan go: «Mbi det det!»
O Bage ɗiŋnedin, kwa a̰se ge mo ne ka mbyale mbi digi.
19Swaga ge dwatɗa ma ne waɗe pool,
mo ka iyal mbi laar, mo ka hon mbi laar saal.
20Mo wak dagre ne naa ge ne kun sarya ya̰l pal,
ge a ne é naa njot yál, ge a ne twacwage eya ma bama koo zi mbe ma ɗaa?
21A ɓan tok ndu ge dosol pal,
a kun sarya naa ge naji ma pal.
22Amma Bage ɗiŋnedin mbi swaga woy tene ne,
Dok ge mbi ne a mbi njal woy tene ne.
23Mbo gwan ne nama ya̰l nama pal,
mbo dibi nama wak nama sone ma pal,
Bage ɗiŋnedin Dok ge nee ne mbo dibi nama wak.
Currently Selected:
Kaŋ mballa ma 94: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
