Kaŋ mballa ma 92
92
A ma kaŋ kwaɗa ne ge ndu uware Bage ɗiŋnedin
1Kaŋ mballa, kaŋ mballa ge dam ɗigliya ne.
2A kwaɗa ge ndu uware Bage ɗiŋnedin,
ge ndu siya̰le mo dḭl, o Bage ne digi zi ya,
3ge cya̰wak vḛ ndu waage kwa a̰se ge mo ne,
ne fareba ge mo ne ɗaal zi,
4ne biliŋ ge taal wol ma, ne biliŋ ma, ne ŋgeleŋ ma me.
5O Bage ɗiŋnedin, mo kaŋ kerra ma ke mbi sḛ tuli,
mbi mbal kaŋ ne laar saal ne mo kaŋ kerra ma pe.
6O Bage ɗiŋnedin, mo kaŋ kerra ma ɓaŋlaŋ,
mo dwatɗa ma ɗugul helek!
7Ndu ge dale kwa na to,
ndu ge daal wan ge no mbe pe to.
8Kadɗa naa ge sone ma don ya go dimma ne sugur go,
ko kadɗa naa ge ya̰l ma zam zḛ ya go puy ɗe,
ago nama pe mbo burmi uzi ɗiŋnedin.
9Amma mo ɗe, digi zi ya, mo Bage ɗiŋnedin ne ɗiŋnedin.
10O Bage ɗiŋnedin, ndi mo naa ge ho̰l ma,
ndi, mo naa ge ho̰l ma pe mbo burmi uzi,
naa ge ne ke ya̰l ma pet a mbo ɓarse se sasar.
11Mo ho̰ mbi pool dimma ne sáy go,
mo ka̰ num ge iyalam mbi pal#92:11 Kan num ndu pal, a ndwara go mo ame na da ne laar saal, ne sḛ tuli..
12Mbi ndwara gá ndil mbi naa ge ho̰l ma detɗa,
mbi togor gá za̰ naa ge sone ma fyaso.
13Naa ge dosol ma don dimma ne moɗe ga̰l go,
a don ga̰l dimma ne uwara Sedre ge Liban ne go.
14Ɗḭya ge zok ge Bage ɗiŋnedin ne zi,
a don ge zok ge Dok ne yapul go.
15Sabar ge nama ne zi puy, a tol vya ma,
a ka kat ne pam, nama gaar ma kat lwarra dadab.
16Waage me go, Bage ɗiŋnedin dosol.
Njal ge mbi ne, a̰me ge ya̰l ne na zi to.
Currently Selected:
Kaŋ mballa ma 92: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
