YouVersion Logo
Search Icon

2Timotawus 1

1
Wak sanna
1Bulus, bage temeya ge Kris Jeso ne, ne laar ɓyareya ge Dok ne ta, na ge a ne ho̰ na temel waage wak tuli ge ndwara Kris Jeso zi, 2njaŋge maktub hon Timotawus, mbi vya ge laar wanna. Dok Báá, ne nee Bageyal Kris Jeso nama kwa mo a̰se, nama ke mo kwaɗa, nama ho̰ mo swaga katɗa ge halas me.
Gugu gwanna hon Dok, ne moɗegeya ne temel kerra pe
3Mbi gwan ne gugu hon Dok, na ge mbi ne ke na temel mbi bá ma pe go be ge dulwak wanna, kaɗeya ge mbi ne ma zi ɗaal ne gyala, mbi ka dwat da ne mo ɗaɗak. 4Swaga dwat ne mo mḭḭm go, mbi da ne ene ge mbi kwa mo ndwara, go no laar saal ba wi mbi tap. 5Mbi dwat da ne hon fareba ge mo ne ge be gitɗa, na ge dḛ ne ka mo náke Loyis zi, ge ne ka mo ná Iniki zi, mbi da ne hon fareba go, na ya mo zi me.
6Ne da pe no ɗe, mbi vot mo pala go, mo koy bobo ge Dok ne ge ne mo zi, na ge mo ne ɓo na swaga ge mbi ne e mbi tok mo pal go. 7Ago Dok be hon nee O̰yom ge ŋgwabeya to, amma ho̰ nee O̰yom ge pool, ge laar wanna, ne ge wan ta ndiŋ. 8Kaage mo ke saaso be ge waage fare ge nee Bageyal ne to, ke mbi ge ne ke daŋgay ne na dḭl pe saaso to me. Amma njó yál dagre ne mbi ne fare ge kwaɗa pe, ge pool ge Dok ne zi. 9Na ge ne má nee, ge ne tó nee ya ne tolla ge mbegeya, be ne temel kerra ge nee ne ta to, amma laar ɓyareya ge na ne zi, ne kwa a̰se ge na ne zi, na ge ne ho̰ nee na Kris Jeso zi ne pe dolla ndwara zḛ ya day. 10Se no, kwa a̰se mbe dya̰ ya zum da ne mborra ge nee Bage máya Kris Jeso ne ta, na ge ne há siya, ge ne bḛ ndwara ma ne suya to ya kwaya̰l go ne fare ge kwaɗa ta.
11Da ne fare ge kwaɗa mbe pe a é mbi bage oy fare, ne bage temeya, ne bage hateya no. 12Da ne na pe mbi njot yál mbe no. Go no puy ɗe, saaso ke mbi to, ne da pe mbi kwa ndu ge mbi ne ho̰ fareba na ta kwa. Mbi da ne kwarra tyatyat go, na da ne pool ge koy kaŋ ge a ne deŋge na ne mbi tok go ndiŋ mbo dam mbe ya go.
13Bole fare ge hatal ge mo ne za̰ nama ne mbi ta, ge hon fareba zi, ne laar wanna zi ge Kris Jeso zi. 14Koy hateya ge kwaɗa ge a ne ho̰ mo nama, ne pool ge O̰yom ge mbegeya ge ne nee zi ta.
15Mo kwa kwa go, naa ge ne suwal Asiya go ma mwaɗak, a saŋge mbi bama go̰r, dimma ne Fijalus ma ne Hermogenes go. 16Bageyal na ŋgay laar wanna ge na ne ge yàl ge Onesiforus ne ta, ago ɗaɗak ka iyal mbi dulwak, be ke saaso ne mbi zul ma to. 17Swaga ge ne dé ya suwal Roma go, ɓyare mbi pe lelet, ɗiŋ ɓo mbi no. 18Bageyal na ŋgay na kwa a̰se na ta ge Bageyal ta dam mbe go. Kaŋ ge na sḛ ne ke mbi nama ge suwal Efesus go, mo kwa nama waɗe naa ge may ma pet.

Currently Selected:

2Timotawus 1: FGN2013

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy