2Gan ma 1
1
Dok mḛre Ahaziya ne moy
1Go̰r siya ge gan Achab ne go, Mowab ma, ɗage ke ho̰l ne Israyela ma. 2Ago dam a̰me ɗu, gan Ahaziya det ne na zok burgu ge ne Samariya go, ne fenetre digi ya se. Ɓol jwaŋ ge ga̰l na ta. Teme naa mbo ele Baal-Zebub#1:2 Baal-Zebub: Dok ge suwal Ekron ne mbe dḭl ge fareba Baal-Zebul, a saŋge na Baal-Zebub ndwara cot ta ne na, na bageyal ge susu ma ne ne. dok ge ne suwal Ekron go fare, ndwara go na ma̰ kat ge na kat ne ndwara go̰r detɗa ge na ne go de. 3Amma maleka ge Bage ɗiŋnedin ne jan Iliya ndu ge suwal Tisbe ne go: «Ɗage digi mbo naa ge gan ge Samariya ne teme nama ya ma ndwara zi, jya̰ nama go: ‹A ndwara go Dok be gwan gá ne suwal Israyela go to ɗo, aŋ mbo mbo ele Baal-Zebub, dok ge ne suwal Ekron go fare no ɗaa?› 4Ne pe no, Bage ɗiŋnedin jan go: ‹Saŋgal ge mo ne fí ne na pul go mbe no, mo mbo gwan ɗage digi ne na go to, ago mo mbo sú ŋgat›.» Go̰r go Iliya gwan. 5Naa ge Ahaziya ne teme nama, a gwan’a na ta, Ahaziya ele nama go: «Aŋ te gwa̰ ya gyana ɗaa?» 6Nama sḛ ma gwan ne na janna go: «Ndu a̰me ɓo i viya̰ zi, jya̰ i no go: ‹Gwa̰ me mbo gan, na ge ne teme aŋ ya ta ya, jya̰ me na go: Bage ɗiŋnedin jan go: A ndwara go, Dok be gwan ga ne suwal Israyela go to ɗo, aŋ mbo ele Baal-Zebub dok ge ne suwal Ekron go fare no ɗaa? Ne pe no, saŋgal ge mo ne fí moy ne na go mbe no, mo mbo gwan ɗage digi ne na go to. Ago mo mbo sú ŋgat›.» 7Gan Ahaziya jan nama go: «Dir ge ndu ge ne ɓo aŋ, ge ne jya̰ aŋ fare mbe ka gyana gyana ɗaa?» 8A jan na go: «A ndu son ne, ka da ne ba̰r ge ɓiya̰ susu ne na ta, ne bit ge waa vwalla na pul go.» Gan Ahaziya jan nama go: «A Iliya ndu ge suwal Tisbe ne#Mat 3:4, Mar 1:6..»
Ahaziya teme a wa̰ na Iliya ya
9Gan teme ga̰l ge na asagar ma ne, ne naa wara anuwa̰y na pe go, a ndé mbo Iliya ta njal pala digi ya, ago ka njal pala digi. Ga̰l ge asagar ma ne jan na go: «Ndu ge Dok ne, gan jan go: ‹Mo ka̰ mo koo ya seɗe!›» 10Iliya gwan ne ga̰l ge asagar ma ne janna go: «Kadɗa mbi ndu ge Dok ne ne ɗe, ya̰ ol ɗage ne digi zi ya, na tí mo poseya ne mo naa ge wara anuwa̰y ma.» Sese no, ol det ne digi ya, til na poseya ne naa ge wara anuwa̰y ma uzi kucup#Luk 9:54.. 11Gan Ahaziya gwan teme ga̰l ge asagar ma ne ya ne naa wara anuwa̰y Iliya ta, ga̰l ge asagar ma ne jan na go: «Ndu ge Dok ne, gan jan go: ‹Mo ka̰ mo koo ya se avun cap!›» 12Iliya jan nama go: «Kadɗa go mbi ndu ge Dok ne ne ɗe, ya̰ ol ɗage ne digi zi ya, na tí mo poseya ne mo naa ge wara anuwa̰y ma uzi!» Ndi ol ɗage ne digi ya, til na poseya ne naa ge wara anuwa̰y ma uzi kucup. 13Ge ndwara ataa uwale, gan Ahaziya gwan teme ga̰l ge asagar ma ne poseya ne naa wara anuwa̰y. Swaga ge ga̰l mbe ne dé ya, gur na koo Iliya ndwara se, fiyal tene na ta go go: «O! Ndu ge Dok ne, kwa mbi a̰se poseya ne mbi naa ge wara anuwa̰y mbe ma no. 14Ndi ol ɗage ne digi ya ti ga̰l ge asagar ma ne ge azi ma poseya ne bama naa ge wara anunuwa̰y ma no, amma kwa mbi a̰se ne se no nde!» 15Maleka ge Bage ɗiŋnedin ne jan Iliya go: «Mbo poseya ne na, sya na vo to.» Iliya ma ne na, a mbo gan ndwara se ya. 16Swaga ge Iliya ne dé gan ndwara se ya ɗe, jan na go: «Bage ɗiŋnedin jan go: Ne jo̰ mo teme naa mbo ele Baal-Zebub dok ge suwal Ekron ne fare dimma ne mo jo̰ Dok be gwan ga ne suwal Israyela go ge ndu ba gwan ele na fare to go ɗe, ago mo mbo ɗage digi ne saŋgal ge mo ne fí moy ne na go to, a ŋgat go mo sú sú.»
17Ahaziya sú dimma ne fare ge Bage ɗiŋnedin ne jya̰ Iliya go. Ne jo̰ Ahaziya ka be vya ɗe, Yoram ge na naa vya zam gan na byalam go. Ame gan swaga ge Yoram ge Yosafat vya ne ke del azi na gan zi suwal Yuda pal go.
18Ahaziya temel ge ne ke ge ɗogle ma ne na kaŋ kerra ma, a njaŋge nama ya Maktub Maana ge Gan ge Israyela ma ne zi.
Currently Selected:
2Gan ma 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.