Numbers 23
23
1Bâlaamiblo Bâlak oᴋautivâ: Tunerguserviliorit sevenenik tamâne, tuktuvangniglo sevenenik angusalungniglo sevenenik atuinaruterigit uvamnut.
2Bâlakelo piniarpoᴋ sôrlo Bâlaamib oᴋautingmago; Bâlakelo Bâlaamelo tunerguserpuk tuktuvangmik Angusâlormiglo tunerguservingne tamaine.
3Bâlaamiblo Bâlak oᴋautivâ: Nangilerit tunergutivît ôtâb seniane, aularniarpungalo; imaᴋa Nâlekab pagrearniarpânga; unertutijangalo uvamnut, oᴋautiginiarpara ilingnut. Imnaublo ᴋânganôrpoᴋ.
4Gûdiblo Bâlaam pârpâ, tâpsomalo (Bâlaamib) oᴋautivâ: Tunerguservit sevenit âᴋikauvakka, tunerguserlungalo tuktuvangmik angusalormiglo tamaine.
5Nâlekablo Bâlaamib ᴋaninga pitatserpâ oᴋautsimik, oᴋautilugolo: Uterit Bâlakemut, imâglo oᴋauseᴋarit.
6Uterporlo tâpsomunga, ahâglo, tâmna nangerpoᴋ tunergutime ôtâb seniane, tâmnalo Moabiblo angajoᴋângit.
7Imgerutinelo issuᴋsivâ, oᴋarlunelo: Aramemit tikiutitipânga Bâlakib, Moabib ataningata, ᴋaᴋᴋanit unanêtunit; ᴋaigit, pivlunga Jakokut ôminarsijauᴋokit, ᴋaigit, Israêlikut oᴋarnilutigikit.
8ᴋanoᴋ ôminarsijauᴋojijungnarᴋêk Gûdib ôminarsijauᴋolungitanganîk? ᴋanoᴋ oᴋarnilutigijungnarpakkâ Nâlekab oᴋarnilutigilungitangît?
9ᴋairtut ᴋânganit takogapkit, ᴋaᴋᴋanillo ulernairtorpakka; ahâk, inugiartoᴋsôvut aptersimajut, inôᴋatigêksoarnullo kitiᴋatauniangilat.
10Kina kititsijungnarᴋâ Jakokut saninginik, oᴋautigilugillônêt Israêlikut sitamangît? Tarniga toᴋolerle idluartut toᴋoninginik, sorairviksaralo pile tâpsoma sorairviksangatut.
11Bâlakiblo Bâlaam oᴋautivâ: Sumik piniarvigivingâ? Tigulauᴋpagit ôminarsijauᴋojiᴋovlutit ômigijimnik, sunaubvalo saimarsarpatit.
12Tâmnalo kiovoᴋ, oᴋarlunelo: Kamatsiartuksaungilangâ oᴋarᴋovlunga Nâlekab ᴋanimnut pititanganîk?
13Bâlakiblo oᴋautivâ: Ilagilaungatôᴋ tamattoma assianut, tautugviginiartarnut tâpkoninga; ungardlinginik kissênik tautuᴋovlutit, iluengarningillo takonagit; tagvangallo pivlunga ôminarsijauᴋokit.
14Apâlo annelingmut Zofime, ᴋaᴋᴋab Pisgab ᴋângane, tunerguserviliorlunelo sevenenik, tunerguserpoᴋ tuktuvangmik angusâlormiglo tamaine.
15Bâlakemullo oᴋarpoᴋ: Nangilerit tunergutivît ôtâb seniane, ikungarniartilunga Nâlegaᴋ pâgomavlugo.
16Nâlekablo Bâlaam pârpâ, pititsivorlo oᴋausermik ᴋaninganut, oᴋarlunelo: Uterit Bâlakemut, imâglo oᴋauseᴋarit.
17Tikipâlo, ahâglo, tâmna nangerpoᴋ tunergutime ôtâb seniane, Moabiblo angajoᴋângit ilagilugit. Bâlakiblo oᴋautivâ: Sumik Nâlegaᴋ oᴋarᴋâ?
18Imgerutinelo isuᴋsivâ, oᴋarlunelo: Makitit, Bâlak, tusarlutillo: nâlalaunga, Zipporib erninga;
19Gûde inôlungilaᴋ saglosômik, erniolungilarlo inungmut ᴋaᴋialersômik: oᴋarsimangilâᴋ, piniarnialungilaûglô? Oᴋauseᴋalauᴋâlônêt nelautsitinialungitaminîk?
20Ahâk, saimartitsiᴋojauvunga: tâmnalo saimartitsisimavoᴋ, uvangalo oggotitsungnangilara.
21Idluitomik takolungilaᴋ Jakokune, tatitosarnermiglônêt Israêlikune: Nâlegaᴋ Gûdinga tâpsomanêpoᴋ, ataniublo ᴋaggudlarutauninga tâpkoa akornganêpoᴋ.
22Gûdib aularutivait Egiptenemit, nukkeᴋarpoᴋ tuktuvaub nujoartûb nukkingatut.
23Jakokut angakoᴋtortaujungnangilat, Israêlikullo nelautainerluktaujungnangilat: Neliuningane oᴋartoᴋalârpoᴋ Jakokut Israêlikullo pivlugit: Tagga Gûdib tatamnartuliningit!
24Ahâk, inugiartoᴋsuit nikoptiput loevetut arnatut, loevetullo makitatsiarput; aᴋopiniangilat nerriᴋârtinagit aᴋsârnigamingnik, imerᴋârtinagillo toᴋotab aunganik.
25Bâlakiblo Bâlaam oᴋautivâ: Ahâk, ôminarsijauᴋoniarnagit, saimausertauᴋoniarnagillônêt.
26Kiovlunelo Bâlaamib Bâlak oᴋautivâ: Oᴋautilaungilagît, oᴋarlunga: Nâlekab oᴋautigijangit tamaita piniaraksarivakkâ?
27Bâlakiblo Bâlaam oᴋautivâ: ᴋailaurit, tamattoma assianut âniarpagit; imaᴋa Gûdib idluariniarpâ ôminarsijauᴋoniarangne pivlunga tagvangat.
28Bâlakiblo Bâlaam âpâ Peorib ᴋânganut, takonârviksaujomut sunaᴋajuitomik.
29Bâlaamiblo Bâlak oᴋautivâ: Pivlunga tunerguserviliorlaurit sevenenik tamâne, tuktuvangniglo sevenenik angusâlungniglo sevenenik âᴋiksoilaurit.
30Bâlakelo piniarpoᴋ sôrlo Bâlaamib oᴋautingmago, tunerguservingnelo tamaine atunit tunerguserpoᴋ tuktuvangmik atautsemik angusâlormiglo atautsemik.
Currently Selected:
Numbers 23: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
