Leviticus 17
17
1Nâlekablo Mosese oᴋarvigivâ, oᴋarlune:
2Aron, erningillo, Israêliblo ᴋitorngangit ilûnaita oᴋarvigikit, oᴋautilugillo: Tamadja Nâlekab perᴋojanga, oᴋarlune:
3Angutit naliat Israêlib ᴋitornganginit toᴋotsijok tuktuvangmik saugârsungmiglônêt tuktungajomiglônêt tupersuit akorngane, toᴋotsijorlônêt tâpsominga tupersuit avatâne,
4ᴋaiᴋârnagolo ilagêktut tupingata upkoangata sânganut, tujutigijomavlugo Nâlekamut Nâlekab tupingata sângane; auk ilingatitauniarpok angutimut tâpsomunga; kovisilaukpok aungmik; angullo tâmna avitaujuksauvok inôᴋatime akornganit;
5Israêlib ᴋitorngangit ᴋaitsiᴋovlugit tunergutiksamingnik, tunergutigijamingnik mânetuinak silame, Nâlekamut, ilagêktut tupingata upkoanganut, ajoᴋertuijomut, tunergutigilugillo tunergutiksautilugit ᴋujaliutiksamik Nâlekamut.
6Ajoᴋertuijûblo auk serᴋerautigijaksarivâ Nâlekab tunerguservinganut ilagêktut tupingata upkoangata sângane, tunnualo ôtitaksarivâ tipitsiariksautiksak Nâlekamut.
7Tunergutiksatik tunijaksaringilait mânamit Satanasingoarnut ajortuligosugvigijamingnut. Perᴋojak tamanna soᴋosijuituksauvok tâpkonunga kinguvânginullo.
8Oᴋautijaksarivatillo, inuit naliat Israêlib ᴋitornganginit, ilagingitapselônêt akunapsingnêtut naliat tunitjijok tunergutiksamik ôtaksamik toᴋotaksamiglônêt,
9ᴋaiᴋârnago ilagêktut tupingata upkoanganut tunergutigijomavlugo Nâlekamut; angut tâmna avitaujuksauvok inôᴋatime akornganit.
10Inuillo naliat Israêlib ᴋitornganginit, ilagingitapselônêt akunapsingnêtut naliat auktortok; kênara sâtitsomavara tarnelingmut tâpsomunga auktortomut, avigomavaralo inôᴋatime akornganit.
11Timib inôsinga aungmêngmat, tunivaralo ilipsingnut tunerguservingme ulapᴋutiksauᴋovlugo tarnipsingnut; inôsek pitjutigivlugo naliat auktortuksaungilak.
12Tamanna pivlugo Israêlib kitorngangit oᴋautivakka: Inôᴋatipse nalliallônêt auktortuksaungilak, ilagingitapselônêt akunapsingnêtut nalliat auktortuksaungilak.
13Inuillo naliat Israêlib ᴋitornganginit, ilagingitapselônêt akunapsingnêtut naliat, nergjutimiglônêt tingmiarmiglônêt nerrijausômik pigune ômajoᴋsiornerme; tâpsoma aunga pêjaraksarivâ saulugolo siorᴋanut.
14Uvinilit ilûnatik inôsingat pitjutigivlugo, tâpsoma aungata tâpsoma inôsinga adsigivâ; tamanna pivlugo Israêlib ᴋitorngangit oᴋautivakka: Uviniliub sunablônêt aunga nerrijaksaringilase; uvinilit ilûnatik inôsingat aunginêngmat; nerrijok taimaitomik avitaujuksauvok.
15Ilûnatiglo nerrijut ingminik toᴋojomik, aliktortaumajomiglônêt ômajomut, ilagijaselônêt ilagingitaselônêt, annorâne ergortoraksarivait, ubvarlunalo nangminerminik imermut, ivsornarniarlunalo unnuk tikidlugo; tungânalo sujungainiarpok.
16Annorânele ergortulungipagit, ubvalungipallo nangminerminik, nangmalârpok idluinerminik.
Currently Selected:
Leviticus 17: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
