Leviticus 16
16
1Nâlekablo Mosese oᴋarvigivâ, Aronib ernîkita toᴋôkita kingorngane, Nâlekab sânganôrmanik, toᴋolutiglo.
2Nâlekablo Mosese oᴋautivâ: Aron angajuit oᴋautiuk naliunerne sunatuinarne itertuksaungimat ivsornaitovingmut; upkôb ungatânut, iksivaviub saimarvigijauviub iklerviub kigligiutjinektaliub ᴋânganêtûb sânganut, toᴋoᴋonago; uvanga sakᴋeromagama nuvujarme iksivavingme saimarvigijauvingme.
3Imaitulijarlune Aron itertuksauvok ivsornaitovingmut: tuktuvârarmik tunergutiksamik ajoᴋêrutiksamik, saugarmiglo angusâlormik tunergutiksamik ôtaksamik.
4Atijaksarivâ ullik ᴋablunâktajatsiak ivsornaitok, ᴋarlillo ᴋablunâktajatsiak uviningmine, tapserutelijartuksauvorlo tapserutemik ᴋablunâktajatsiarmik, nessarlugalijartuksauvorlo; tâpkoangovut annorât ivsornaitut; ubvartuksauvorlo uviningminik imermut, atilugillo.
5Tigusijuksauvorlo ilagênit Israêlib ᴋitornganginit tuktungajûngnik angusâlûngnik maggûngnik tunergutiksamik ajoᴋêrutiksamik, saugarmiglo angusâlormik tunergutiksamik ôtaksamik.
6Aroniblo tuktuvârak tunergutiksak ajoᴋêrutiksak nangminine pivlugo tunijaksarivâ, ulapᴋosêjutigilugolo nangminine iglomioᴋatinalo pivlugit.
7Tuktungajûglo tamarmik tigujaksarivak âlugiglo Nâlekab sânganut ilagêktut tupingata upkoangane.
8Imerautigijaksarivaglo; aipâ Nâlekamut ilingatilugo, aipangalo Azazelemut ilingatilugo (ᴋenugijaksautilugo).
9Aroniblo tuktungajok imerautimut Nâlekamut ilingatitaujok tigujaksarivâ tunergutigilugolo tunergutiksamik ajoᴋêrutiksamik.
10Tuktungajorle Azazelemut ilingatitaujok imerautimut, ômavlune Nâlekab sânganôrtitaujuksauvok, ulapᴋoseraksarilugo, aulartilugolo Azazelemut sunaᴋajuitomut.
11Aroniblo tuktuvârak tunergutiksak ajoᴋêrutiksak, nangminine pivlugo pijok, ulapᴋosêlunalo nangminerminik iglomioᴋatiminiglo, tuktuvâraᴋ, nangminine pivlugo pijok, toᴋotaksarivâ;
12Tigusijuksauvorlo pujôrtitsivingmik aumanik tatatomik tunerguservingmit Nâlekab sângane, agganalo tatalugit isserluanerutiksanik mamaktunik serᴋalisimajunik, âlugillo upkôb iluanut;
13Isserluanerutiksallo pititaksarivait ikomamut Nâlekab sângane, isserluanerutiksat issingat uliᴋovlugo iksivavingmik saimarvigijauvingmik kigligiutjineᴋtaliub ᴋânganêtomik, toᴋoᴋonago;
14Tuktuvâraublo aungata ilanga tigujaksarivâ tikerminullo serparsautigilugo iksivaviub saimarvigijauviub sânganut ununga sangmijomut; saimarvigijauviublo sângane auk serparsautigijaksarivâ tikerminut sevenertorlune.
15Tungânalo tuktungajok tunergutiksak ajoᴋêrutiksak inôᴋatigêksuit pivlugit toᴋotaksarivâ, aungalo upkôb iluanut âlugo, aungalo piniarutigijaksarivâ sôrlo tuktuvâraub aunga piniarutigilaungmago, serparsautigilugolo iksivavingmut saimarvigijauvingmut sânganullo;
16Ivsornaitoviglo pivlugo ulapᴋosêjuksauvok, Israêlib ᴋitorngangita ivsornarningit pivlugit, tappatojoksôningillo pivlugit, ilâ, ajorningit ilûnaita pivlugit; taimailiortuksauvorlo ilagêktut tupingat, tâpkonanêtok ivsornartoksôningita akorngane, pivlugo.
17Inuᴋartuksaungilarlo ilagêktut tupingane, tâmna iterpat ulapᴋosêjomavlune ivsornaitovingme, aniᴋârtinago, ulapᴋosêjarêrlune nangminine pivlugo, iglomioᴋatinalo pivlugit, Israêlib ilagêktoksôningit pivlugit.
18Anijuksauvorlo tunerguservingmut Nâlekab sânganêtomut ulapᴋoserlugolo; tigusijuksauvorlo tuktuvâraub aungata ilanganik, tuktungajûblo aungata ilanganik, pitilugolo tunerguserviub nakjunginut avatânêtunut.
19Aublo ilanganut serparsaraksarivâ tikkerminut sevenertorlune, sujungaitilugolo ivsornaitilugolo Israêlib ᴋitorngangita ivsornarninginit.
20Ulapᴋosêjarêrpallo ivsornaitovik pivlugo, ilagêktullo tupingat pivlugo, tunerguserviglo pivlugo, tuktungajok ômajok tigujaksarivâ;
21Aroniblo aggane iglotut ilijaksarivait tuktungajûb ômajûb niaᴋoanut, tâpsomalo ᴋângane kigligiutjijuksauvok Israêlib ᴋitorngangita idluininginik tamainik, tappatoninginiglo tamainik, ila, ajorninginik tamainik; ilijaksarivaillo tuktungajûb niaᴋoanut, tâmnalo aularutijaksarivâ angutib tamattomunga ilingatitaujûb aggangitigut sunaᴋajuitomut;
22Tuktungajûblo nangminermine nangmaraksarivait tâpkoa idluitulininginik tamainik; tuktungajorlo aulartitaksarivâ sunaᴋajuitome.
23Aronalo itertuksauvok ilagêktut tupinganut, annorânalo ivaloksajat, atilauktangit iterame ivsornaitovingmut, pêraksarivait ᴋemaklugillo tagvunga;
24Uvininalo ubvaraksarivâ imermut ivsornaitovingme, annorânalo atilugit, anilunalo, tunergutiksanalo ôtaksak, inôᴋatigêksuillo tunergutiksangat ôtaksak tunergutigilugik, nangmininalo inôᴋatigêksuillo ulapᴋoserlugit.
25Tunergutiksablo ajoᴋêrutiksab tunnua ôtitaksarivâ tunerguservingme.
26Ipsomalo aularutjijûb tuktungajomik Azazelemut annorâne ergortoraksarivait, uvininalo ubvarlugo imermut, taimailiorᴋârdlunalo tangmartervingmut aijungnarpok.
27Tuktuvârarlo tunergutiksak ajoᴋêrutiksak, tuktungajorlo tunergutiksak ajoᴋêrutiksak, tâpkoa aungat itertitaulauktok ulapᴋosêjutigilugo ivsornaitovingme, âtaujuksauvok tupersuit avatânut; ôtitaksarivaillo ikomamut amîgik nerᴋîgiglo anangillo.
28Otitsijûblo tâpkoninga annorâne ergortoraksarivait, uvininalo ubvarlugo imermut, taimailiorᴋârdlunalo aijungnarpok tangmartervingmut.
29Tamadjalo iluserijaksarivase soᴋosijuitomik, takᴋit seveningita uvlungita teningane tarnise nikanarsartitaksarivase suliaᴋartaililuselo sunamiglônêt, mânemiorlônêt tujormijarlônêt akunapsingnêtok;
30Uvlorme tâpsomane ulapᴋosertauniarapse sujungaititauᴋovluse; ajornipsingnit tamainit sujungaititaujuksaugapse Nâlekab sângane.
31Sabbateovok merngoerserviksak erᴋarnadlartok ilipsingnut, tarniselo nikanarsartitaksarivase; perᴋojak tamanna soᴋosijuituksauvok.
32Ajoᴋertuijorlo, mingoartaujok ilijaujorlo ajoᴋertuijingorᴋovlugo atâtane inangerlugo, ulapᴋosêjuksauvok, annorâllo ivaloksajat, ila, annorât ivsornaitut atijaksarivait;
33Tâmnalo ulapᴋosêjuksauvok ivsornaidlartovik pitjutigilugo, ulapᴋosêjuksauvorlo ilagêktut tupingat pivlugo, tunerguserviglo pivlugo, ulapᴋosêjuksauvorlo ajoᴋertuijut pivlugit ilagêktoᴋsuillo inungit ilûnaita pivlugit.
34Tamannalo ilusiojuksauvok soᴋosijuitok ilipsingnut, ulapᴋosêᴋovluse Israêlib ᴋitorngangit pivlugit atausiarluse jâreme ajorningit tamaita pitjutigilugit. Taimailiortoᴋarporlo sôrlo Nâlekab Mosese perᴋolaungmago.
Currently Selected:
Leviticus 16: LIHB08
Highlight
Copy
Compare
Share
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.
