Hesekiel 16

1Nalekablo oᴋausingata tikipânga ama, oᴋarlune:

2Inûb erninga, Jerusalem ᴋaujitiuk maᴋojungnartulinerijanginik, oᴋarlutit:

3Imâk oᴋarpoᴋ Nâlegaᴋ Nâlegaujoᴋ Jerusalemut: Kanaanemiut nunangat pigiarvigilauᴋpat inungorvigilugolo; atâtait Amoritereolauᴋpoᴋ, anânaillo Hetitereovlune.

4Inungornîllo imailauᴋpoᴋ, uvlorme inûlervigilauᴋtarne ᴋalasît kipijaulaungilaᴋ, imermullo ubvartaulaungilatit ipêrutitauᴋovlutit; tarriomullo niogartaulaungilatit immusertaunaglo.

5Ijib atautsiblônêt naiperᴋutigilaungilâtit tamakkoninga piniarvigijomavlutit, ilapjugijomavlutit; egitaulauᴋpotille naternamut, inûleravit sinaungagijaulauᴋpotit uvlorme inûlervigilauᴋtarne.

6Sennerᴋogapkille takolutillo aksapaloavlutit aungne, oᴋautilauᴋpagit: aungnêgaloaruvit, inôgit; ila, oᴋautilauᴋpagit: aungnêgaloaruvit, inôgit;

7Unuksivaliatilauᴋpagit ᴋuglungajotut natername, unuksilauᴋpotillo angijororlutillo, pinnarnarsilutillo; iviangîkik angijororpûk, nujatillo perorput; usingalauᴋpotille kangunarlutillo.

8Sennerᴋogapkille takonârlutillo, ahâk, pinasuaraksaunît neliutisimalauᴋpoᴋ; uligalo issivilauᴋpara ilingnut, ussinganît uliklugo: ila, tunganartomik oᴋarvigilauᴋpagit angiᴋatigilutillo, oᴋarpoᴋ Nâlegaᴋ Nâlegaujoᴋ, perᴋutigilauᴋpagillo.

9Ubvalauᴋpagit tagva imermut: ila, aungînaunît ubvalauᴋpara ilingnit, orᴋsumullo mingoarlutit.

10Annorâtsiartârpagit nuilapaujaksajanik, kammiktârlutillo ᴋissijanik, ᴋeteruserlutillo ilupâᴋsajamik ᴋaᴋᴋoriktomik, uliklutillo saidemut.

11Pinnarnarsitilauᴋpagit pinnarnarsautinut, tajangniglo pititsivunga talingnut, ᴋelaumgujangoaniglo ᴋongesingnut.

12Tuglerumiglo pititsivunga ᴋingangnut, siutemiutaniglo siutîngnut, niaᴋotemiglo piojôdlartomik niaᴋungnut.

13Taimak pinnarnarsititaulauᴋpotit goldemut silberemullo; attisimavlutillo ilupâtsiamik ᴋaᴋᴋoriktomik, saidemiglo, nuilapaujaksajamiglo; nerᴋiksaᴋalauᴋpotit senaugatsiamik, igupsaujârtullo orᴋsuanik, orᴋsumiglo; takoranidlalauᴋpotillo, ataniolilauᴋpotillo.

14Pinnarnarnîllo unipkautauvoᴋ inôᴋatigêksuit akorngane; innersimalaungmat, pinnarnarnera ilingnut pititara pivlugo, oᴋarpoᴋ Nâlegaᴋ Nâlegaujoᴋ.

15Pinnarnarnîlle tatigilauᴋpat, unipkautaunîllo nertûtigivlugo, sennerᴋotullo ilûnaita innapatit uivesârnermut, ajortuligosungnîllo nelonailivat ᴋângertunut tamainut; ᴋunungilatit tâpkoninga.

16Annorâvillo ilanginik tigusilauᴋpotit, iksivautaᴋsoaliorlutillo taᴋsapatâlingnik, tâpkoalo ajortulivigilauᴋpatit: taimaitoᴋalautsangilaᴋ, pijoᴋartuksaungilarlônêt.

17Tigusivotillo pinnarnarsautivit goldeᴋotima silbereᴋotimalo ilanginik, tunilauᴋtama ilingnut, angutingoaliorutigilugillo, tâpkoalo ajortulijutigilauᴋpatit.

18Annorâtillo nuilapaujaksajat tigulauᴋpatit, tâpkonungalo uliklugit, orᴋsuᴋotigalo tipitsiariksauteᴋotigalo ilivatit tâpkoa sânginut.

19Nerᴋiksaralotauᴋ tunijara ilingnut, senaugatsiaᴋ, orᴋsorlo, igupsaujârtullo orᴋsungat, nerᴋiksautilauᴋtakka ilingnut, aglât tâpkoa ililauᴋpatit taipᴋoa sânginut tipigiksauteoᴋovlugit; taimaiporlo, oᴋarpoᴋ Nâlegaᴋ Nâlegaujoᴋ.

20Ernitillo panitillo, uvamnut erniarilauᴋtatit, tiguvatit, tunergutautilugillo tâpkonunga nerrijauᴋovlugit. Ajortulinitit mikijôvât?

21Kitorngakka aglât toᴋogangne, tâpkonungalo tunilugit ôtaksautilugît?

22Maᴋojungnartulinernelo ajortulinernelo tamaine erᴋailungilatit inôsungnivit uvlunginik, ussingalauravit kangunarlutillo, aksapaloalauravillo aungne.

23Mânalo idluitulinivit, tamaita kingorngatigut, (ila, kapianarmêk, kapianarmêk igvit! oᴋarpoᴋ Nâlegaᴋ Nâlegaujoᴋ,)

24Iniksaliorpotit poᴋtojunik ᴋaᴋᴋârsungoaliorlutillo apᴋosineâlungne tamaine.

25Apᴋosinit tamaita issungine ᴋaᴋᴋârsungoaliorpotit, pinnarnarnîllo maᴋojungnartungortipat, ittikatillo ablâktipatit ᴋângertunut tamainut, ajortulinitillo unuksitipatit.

26Egiptenemiullo silalitit, uvineᴋortojut ajortuliᴋatigilauᴋpatit, assiniarnitillo unuksitipatit ningartitsomavlunga.

27Taimaimat, ahâk, aggakka issakpakka ilingnut, piksatillo ikitlitipakka, tunilutillo ômigijivit, Filisterit paningita, pijomajanginut, tâpkoa iluserijatit kangunartut kangusûtigivait.

28Assiriamiuttauᴋ ajortuliᴋatigilauᴋpatit, nâmaksinermik saperavit; ila tâpkoatauᴋ ajortuliᴋatigivatit, sullelo nâmaksititaulungilatit.

29Assiniarnitit unuksitilauᴋpatit nuname Kanaaneme, aglât Kaldêamut; sullelo tamakkonunga nâmaksititaulungilatit.

30Omatit sangêdlarmat keta, oᴋarpoᴋ Nâlegaᴋ Nâlegaujoᴋ, tamakkoa tamaita piniarnerivatit, arnab kangusujuitub uivesârtûb piniarningit;

31Iniksalioravit poᴋtojunik apᴋosinit tamaita issungine, ᴋaᴋᴋârsungoalioravillo apᴋosineâlungne tamaine; anguniarpaktotullo ilingalaungilatit, akkilertauneᴋ erᴋagilaunginangne.

32Arnaᴋ uilik assiniarpaktoᴋ! takorngartanik ilaliortoᴋ uine pinago!

33Anguniarpaktut pilitausôngovut piliutinik: igville piliutitit tunivatit ajortuliᴋatigijarnut tamainut, pajuklugillo, ilûnânit tikiᴋovlugit ilingnut ajortuliᴋatigilutillo.

34Arnat assivit ilusingit mumiksimavut ilingne ajortulinerne, maliktoᴋangimat ilingnik ajortuliᴋatigijomavlutit: igvillo tunitjivotit akkiliutinik, tunitjiviongilatille akkiliusianik, taimaimat mumiksimavotit.

35Tamanna pivlugo, anguniarpaᴋtotit, Nâlekab oᴋausinga tusaruk:

36Imâk oᴋarpoᴋ Nâlegaᴋ Nâlegaujoᴋ: Kênaujatit siamangatitaulaungmatta, kangunarnîllo ulêrtaungmat ajortulinerne ajortuliᴋatigijarnut; maᴋojungnartulinivillo gudingoangit pivlugit, ᴋitorngavillo, tunijavit tâpkonunga, aungit pivlugit;

37Tamanna pivlugo, ahâk, katersoromavakka ajortuliᴋatigijatit tamaita ᴋuviasuluᴋatigijatit, ungagijatillo tamaita ilagilugit; ila, ilingnut katersoromavakka avatingnit tamainit, kangunarnîllo ulêromavara tâpkonunga, takoᴋovlugit kangunarnernik tamainik.

38Erᴋartoromavagillo sorlo arnat nuliarêngnermik asseroijut aungmiglo kovisijut erᴋartortaungmatta; ningaumajârnerublo ilungertornerublo aunga tikiutijomavara ilingnut.

39Tunijomavagillo tâpkoa agganginut, tâpkoalo oggotitsomârpait iniksaliarimajatit poᴋtojut, serᴋomilugillo ᴋaᴋᴋârsungoaliarimajatit; mattaromârpâtillo, pinnarnarsautitillo piojut tigulugit; ᴋemagomârpâtillo ussingavlutit sunaᴋarnaglo.

40Katimgajoᴋsoarniglo majortitsijomârput ilingnut, milloromârpâtillo ujarᴋanut, ulimârlutillo saviksoamingnut.

41Iglotillo ikitsomârpait ikomamut, pidlaromârlutillo arnagasaksuit sângine; assiniarungnaititsomârpagillo, tunitjijungnaituksaulârpotillo akkiliusianik kingorngane.

42Taimaglo ningaumajârnera nâmaksititsomavara ilingne, ilungertorneralo anigoromârpoᴋ ilingnit, merngoerseromavungalo, ningaromairpungalo kingorngane.

43Inôsungnivit uvlungit erᴋaumalunginangne, ningartinamgale tamakkonane tamaine; tamanna pivlugo, ahâk, apᴋutigijatit tikiutijomârpakka niaᴋungnut, oᴋarpoᴋ Nâlegaᴋ Nâlegaujoᴋ: kangunartulineᴋ tamanna piniarnerilaunginangnê maᴋojungnartulinerijarnit tamainît?

44Ahâk, ilûnatik oᴋausiovaktunik atortut, oᴋausiovaktoᴋ una atulârpât pivlutit: Sorlo anânaᴋ ingmat, taimak paninga ipoᴋ.

45Anânavit panigivâtit, aipaminik ᴋitorngaminiglo ariutsijub; ᴋatangutivillo ᴋatangutigivâtit, tâpkoalo ariutsilaurivut aipamingnik ᴋitorngamingniglo; anânait Hetitereolauᴋpoᴋ, atâtaillo Amoritereolauᴋpoᴋ.

46Angajuit tagva Samaria, saumikpit tungâne nunalik, tâmnalo paningillo; nukaillo, talerpikpit tungâne nunalik, tagva Sodoma paningillo.

47Igville arvertalaungilatit tâpkoa apᴋutigijangine, pinialaungilatillônêt tâpkoa maᴋojungnartuliningit maliklugit; tamannale mikijoᴋotigivlugo, sugalulualauᴋpotit tâpkonangat apᴋotingne tamaine.

48Sorlo mikseᴋârtomik inôgama, oᴋarpoᴋ Nâlegaᴋ Nâlegaujoᴋ, Sodoma nukait, tâmnalônêt paningillônêt, taimak pinialungilat sorlo igvit panitillo piniarapse.

49Ahâk, tagga nukavit Sodomab idluininga: piojorineᴋ, nerritoneᴋ, erᴋeasungnerlo, ajoᴋsanginerub maliktinga, tâpsomanêpoᴋ paninginelo; aklujullo ajoᴋsartullo ikajulungilait.

50Pimariuterpullo maᴋojungnarlutiglo sâmne; tamanna pivlugo pêjalauᴋpakka takogapkit.

51Ama Samaria idluitulinerilauᴋtavit abvanginiglônêt idluitulingilaᴋ; igville maᴋojungnartulinersaungijaidlaravit tâpsomangat, ᴋatangutitillo idluarsitipatit maᴋojungnartulinernut piniartarnut.

52Taimaimat kangusuktitaunît nangmaruk, igvit ᴋatangutitit erᴋartulaurangne; idluitulinernut piniarnerijarnut angiluartomik tâpkonangat, tâpkoa idluarnersauvut ilingnit: ila, kangusuktitaulerit, kangusuktitaunîllo nangmaruk ᴋatangutitit idluarsitinangne.

53Uvangale tâpkoa aularutijauningit utertitsomârpakka, Sodomab paningitalo aularutijauningit, Samariablo paningitalo aularutijauningit, aularutijaujoᴋotivillo aularutijauningit tâpkoa ilagilugit:

54Nangmineᴋ nangmarᴋovlutit kangusuktitaunernik, kangusuᴋovlutillo piniarnerijatit tamaita pivlugit manigorutiksaugavit tâpkonunga.

55Katangutitillo, Sodoma paningillo, utertuksaulârput ilinganerilauᴋtamingnut sivorngane, Samarialo paningillo utertuksaulârivut ilinganerilauᴋtamingnut sivorngane, igvillo panitillo utertuksaulârivose ilinganerilauᴋtapsingnut sivorngane.

56Katangutille Sodoma ᴋanernut oᴋautaulaungilaᴋ piojorinivit uvlungine;

57Idluitulinît nelonaijartauᴋârtinago, sorlo taipsomanetut Siriab paningita mitautigingmatit, avalingitalo ilûnatik, Filisterillo paningita naggogingmatit ilûnâne.

58Kangunartulinivit maᴋojungnartulinivillo nênertorpâtit, oᴋarpoᴋ Nâlegaᴋ.

59Imâk oᴋarmat Nâlegaᴋ Nâlegaujoᴋ: Piniarvigijomavagit sorlo igvit piniaravit, angermaringneᴋ naggogigangne angiᴋatigêngneᴋ uniorlugo.

60Taimailioraloartilutille uvanga erᴋaumajomavara angerutiga inôsungnivit uvlungine, angiᴋatigijomârpagillo soᴋosijuituksaujomik.

61Igvillo apᴋutigijatit erᴋaumajomârpatit, kangusuklutillo, ᴋatangutitillo angajuklit nukardlillo ilalioromârpatit: tunijomârpakkalo ilingnut paniolerᴋovlugit, angernerilauᴋtalle pitjutigilugo-ungitoᴋ.

62Angiᴋatigêngneralo ilingnut atsungersoromârpara; ᴋaujijuksaujomârpotillo uvangaugama Nâlegaᴋ;

63Erᴋaiᴋovlutit kangusuᴋovlutillo, oᴋausiksairutiᴋovlutit kangusungnit pivlugo; issumagijungnaivigigupkit tamainik piniarnerijarnik, oᴋarpoᴋ Nâlegaᴋ Nâlegaujoᴋ.

Currently Selected:

Hesekiel 16: LIHB08

Highlight

Copy