Daniel 7

1Belsazarib, Babilonib ataningata, jâringita sivorlipângani, Danieli sinnartômavluni takotitjumik takovoᴋ niaᴋomigut, iglimini inangagami: sinnartômaniᴋ tagva aglagutigivâ, pijoᴋartullo unipkautigilugit.

2Danielilo niplipoᴋ oᴋarlunilo: Unnuarmi takotitjutipkut takovunga, ahâglo, ᴋilaub anoringit sitamat imarbiksoarmut tikiput.

3Omajullo angijut sitamat ᴋaᴋivut imarbingmit, ilûnatik adsigêngitut.

4Sivorliᴋ loivitun-ipoᴋ, isaroᴋarluni naktoraliub pingatut: takonârpunga isarungit iritartauᴋârtinagit, nunamillo ᴋangatartitauvoᴋ nikovititauvlunilo itikamingni maggungni inuktut, tunitjiviovorlo inûb ômatinganik.

5Ahâglo, ômajub tâpsoma assia, tuglia, nanoᴋtun-itoᴋ, nikovipoᴋ, sigguminilo kigutimi akorngani tôgâᴋarpoᴋ pingasunik: tâpkoalo oᴋautivât: Nikovigit niᴋitorlutillo angijomik.

6Mattoma kingorngani takonârpunga, ahâglo, assia, pûsivâluktut, ᴋatigaminilo isaroᴋarpoᴋ sitamanik tingmiab pingatut; ômajorlo tâmna niaᴋoᴋarpoᴋ sitamanik; tunitjiviovorlo nâlegaunimik.

7Mattoma kingorngani takotitjunik takovunga unnuarmi, ahâglo, ômajut sitamangat, takominaidlartoᴋ iᴋsinadlarlarmelo, sangijoᴋsôdlarlarmilo; kigutiâluᴋarpoᴋ kikiangnik: nirridlarpoᴋ siᴋalitsilunilo, amiakôjullo tullirajârpait itikaminut; ômajullo sivorlini adsigilungimarikpait; nakjuᴋarporlo 10nik.

8Nakjuillo ᴋimigovakka, ahâglo, tâpkoa akorngani nakjuit tâpkoa assia, mikijoᴋ, nuivoᴋ, tâpsomalo nuijûb ininganit nakjuit pingasut sivorlit nusuktauvut; ahâglo, nakjungmi ijiᴋarpoᴋ inûb ijingititut, ᴋaniᴋarlunilo oᴋausisoarnik oᴋâlajomik.

9Takonârpunga iksivautaᴋsuit ilijauᴋârtinagit, uvlullo inuᴋoartungat ingipoᴋ; annorângit aputitut ᴋaᴋortigivut, niaᴋungatalo nujangit saukat miᴋungititut iput; iksivautaᴋsoanga ikoâlajoinaujotut ipoᴋ, aksaloangillo ikomauvut ikoâlajoᴋ.

10Sânganit aularluni kôk ikomainaujoᴋ kôkpoᴋ; tausendit tausenditorlugit kivgartorpât, 10tausendillo 10tausenditorlugit nangiput sângani; iᴋartuivik pigiarpoᴋ, aglaillo makpitauvut.

11Takonâdlarpunga taipsomani oᴋausisuit, nakjûb oᴋausirijangita nipingat pitjutigivlugit; takonârpunga ômajoᴋ toᴋotauᴋârtinago, timingalo assirotauvluni, ikoâlatiksangortitauvluni ikomamut.

12Omajullo tâpkoa assingita nâligauningit aᴋsârnigauvut; inôsingilli piganititauvut piviksaᴋ naliuniksarlo nâvlugit.

13Takotitjutini unnuarmi takovunga, ahâglo, ᴋilaub nuvujangini ᴋaijoᴋarpoᴋ inûb iningatun-itomik, tikiporlo uvlut inuᴋoartunganut, âpâllo tâpsoma sânganut.

14Tunitjiviovorlo nâlegaunimik, ânanaunimiglo, ataniovingmiglo, inôᴋatigêt, nunaᴋatigêllo, oᴋausiᴋatigêllo ilûnatik kivgartorᴋovlugit tâpsominga; nâligauninga nâligauniovoᴋ issoᴋangitoᴋ, sorairniangilaᴋ, atanioningalo assirotauniatsangilaᴋ.

15Uvangali Danieli, aninira kiksarpoᴋ timimni, niaᴋumalo takotitjutigijangita ulapipânga.

16Najornikpunga tagvani nangitut ilanganik, ᴋinuvigivlugolo ᴋaujititaujomavlunga tamakkoa ilûnatik ᴋanoᴋ tukkiᴋarmangâta. Oᴋautivânga tagva, nalonaijaivigivlungalo tukkigijanginik.

17Omajut angijut ukkoa sitamat ataniovut sitamat sakᴋiromârtut nunami.

18Kotsingnipângojûbli ivjornaitoᴋotingita ataniovik pigilârpât, piᴋutigitsainarlugolo, ilâ, issoᴋangitoᴋsoarmut aglât.

19Tusudlarpunga tagva ᴋaujititaujomavlunga ômajut sitamangat pivlugo, tâmna assiminit tamainit assiangongmat, iᴋsinartoᴋsoaᴋ, kigutilik kikiangnik, kukiliglo ᴋaᴋorlinik; nirridlartoᴋ siᴋalitsidlartorlo, tullirajârijorlo amiakôjunik itikaminut;

20Nakjuillo 10 niaᴋunganêtut pivlugit, nakjuglo tâpkoa assiat nuijoᴋ, tâpsomalo nuiviani pingasut katakput; ilâ, nakjuk imna ijilik, ᴋaniliglo oᴋausisoarnik oᴋâlajomik, angiluartorlo saniliminit.

21Takonârpunga, ahâglo, nakjûb tâpsoma ivsornaitut sorᴋsugvigivait, sâlagilugillo.

22Uvlut inuᴋoartungat tikerᴋârtinago, ᴋotsingnipângojûb ivsornaitungit idluarsartauvut; naliutivorlo ivsornaitut ataniovik pigilimatsuk.

23Imâk oᴋarpoᴋ: Omajut sitamangat tagva ataniovît nunami sitamaksangat, ataniovît assingit tamaita adsigingilait, nunaᴋsoarlo ilûnât êjomârpâ, tullirajârlugolo, sikalilugolo.

24Nakjuillo 10 tagva atanît 10 ataniovingmit tamattomangat makitsomârtut; tâpkoalo kingorngani assia makitsomârpoᴋ; tâpsomalo sivorlit adsiginiangilait, atanîllo pingasut oggotitsomârpait.

25Tâpsomalo ᴋotsingnipângojoᴋ oᴋarnilutigijomârpâ, ᴋotsingnipângojûblo ivsornaitungit unangmidlarlugit; issumaᴋalârporlo naliunirit piᴋojallo ablatsangortitsomavlugit, tâpkoalo tunijaujomârput tâpsoma agganginut naliutoᴋ, naliutullo, naliutûblo abvanga nâvlugit.

26Tagva iᴋartuivik naliutilârpoᴋ, aᴋsârnigomârpullo tâpsoma nâligauninganik, suksaujungnaitilugo assirolugolo naggatiksaᴋ tikidlugo.

27Atanioviglo nâlegaunilo ataniovîllo angijôningit ᴋilaub ilûnani atâni tunijaujomârput ᴋotsingnipângojûb ivsornaitungita inunginut; tâpsoma ataniovinga atanioviovoᴋ issoᴋangitoᴋ, nâligaunirillo ilûnatik kivgartoromârpât nâlaklugolo.

28Tamakkoa tagva nâvut tamâni. Uvangali Danieli, issumama ulapidlarpânga, tautugalo ablatsangolipoᴋ; tamannali torᴋorpara ômatimni.

Currently Selected:

Daniel 7: LIHB08

Highlight

Copy