प्रस्थान 37
37
कबल पशो सन्दोस सेल्शो
प्रस्थान २५:१०-२२
1मिनु बेचालेलमी बोल्यो शी के सन्दोस का सेल्तु। मेको आ लाइश्शो कुबीत निक्शी नु आधा, आ ब्रेम्शो कुबीत का नु आधा नु आ ग्येत्थ लाइश्शो कुबीत का नु आधा ङा पा सेल्तु। #३७:१ कुबीत का ०.५ मिटर, हात का खोदेंशो बाक्ब। 2मिनु मेको आ खिंङगा नु आ लाङगा नेल्ल क्येख सुनमी गिल्तु। मिनु एर ओंथ नेल्ल सुन के सुर सेल्तु। 3मिनु सुन के ४ ओटा मुन्द्रा सेल्तु। का पटटी निक्शी नु अर्को पटटी निक्शी पा सन्दोस आ ४ सुरमी क्येप्ताक्व। 4मिनु बोल्यो शी के कुरतीक कोक्के निक्शी सेल्शा, सुनमी गिल्तु। 5मिनु मेको कुरतीक कोक्के निक्शी मुन्द्रामी शुइश्शा, सन्दोस कुरने चाप्तेक्म।
सन्दोस सुम्तीक सेल्शो
6मिनु मेकोमी क्येख सुन के चेम्शा, सन्दोस सुम्तीके सेल्तु। मेको आ पित्थ लाइश्शो कुबीत निक्शी नु आधा नु आ ब्रेम्शो कुबीत का नु आधा सेल्तु। #३७:६ कुबीत का ०.५ मिटर, हात का खोदेंशो बाक्ब। 7मिनु परमप्रभु यावे आ स्वर्ग ङा गेय पाइब खोदेंशो सुन के करूब निक्शी चेम्शा सेल्तु। मेको सुम्तीके आ निम्फा पटटी ङा का का चेम्शा सेल्तु। 8का पटटी करूब का, अर्को पटटी करूब का चेम्शा सेला बाक्त। मेको सुम्तीके नु करूब निम्फा मख्रोंइसीशो सुन का रेन चेम्शा सेल्तु। 9करूब आस फ्रां हाम्शा, सुम्तीके फारपाइश्शा, खाल का ङा पा सन्दोस सुम्तीके गे कोव़पाइश्शा चेम्शा सेल्तु।
शोब्ले वोइक्तीक टेबल सेल्शो
प्रस्थान २५:२३-३०
10बोल्यो शी के टेबल का सेल्तु। मेको आ पित्थ लाइश्शो कुबीत निक्शी नु आ ब्रेम्शो कुबीत का नु आ ग्येत्थ लाइश्शो कुबीत का नु आधा ङा पा सेल्तु। #३७:१० कुबीत का ०.५ मिटर खोदेंशो बाक्ब। 11मिनु मेको कली क्येख सुनमी गिल्शा, आ एर ओंथ नेल्ल सिरपेच खोदेंशो पा सुन के सुर सेल्तु। 12मेको आ एर ओंथ ङा सुर नेल्ल ४ गुइ ब्रेम्शो सेल्शा, सिरपेच खोदेंशो पा बुटा आप्शा सेल्तु। #३७:१२ गुइ का ८ सेन्ती मिटर कि ३ आंइची खोदेंशो बाक्ब। 13मिनु ४ ओटा सुन के मुन्द्रा चेम्शा, मेको आ ४ ओटा खोइलीम टेबल आगाम क्येप्ताक्व। 14टेबल कुरचा कली मुन्द्रापुकी टेबल आ सुर आ नेक्था क्येप्ताक्व। 15मिनु टेबल कुरचा कली बोल्यो शी के कुरतीक कोक्के सेल्शा, सुनमी गिल्तु। 16मिनु टेबलम वोइक्चा माल्शो थाल, लोटा नु बोस नेल्ल नु तूचा थोव़क चढ़ेतीक लुक्चा कली लोटा नेल्ल क्येख सुन के सेल्तु।
सुन के बत्ती दातीक सेल्शो
प्रस्थान २५:३१-४०
17मेकोमी क्येख सुन के बत्ती दातीक का चेम्शा सेल्तु। आ थाम, आ राशी, आ दियारी, आ डल्ला नु फूपुकी ठेयब सुन का केन सेल्तु। 18मिनु मेको बत्ती दातीक आ थाम रे ६ ओटा राशी ग्रुंइशा, का पटटी रे सां नु अर्को पटटी रे सां राशी चेम्शा सेल्तु। 19मिनु मेको राशी कामी देसी बदाम आ फू खोदेंशो फू सां नु डल्ला सां रे ग्रुंइशो सेल्तु। अर्को राशीपुकी यो नेल्ल मोदेंशो पा सेल्तु। 20मेको बत्ती दातीक आ थामम चहिं ४ ओटा देसी बदाम आ फू खोदेंशो आन डल्ला रे ग्रूशो सेल्तु। 21थाम आ ङोंइती ङा डल्ला रे, आ दाते ङा डल्ला रे नु नोले ङा डल्ला रे निम्फा पटटी गे राशी निक्निक्शी ग्रूशो सेल्तु। 22मेको आ राशी नु डल्ला नेल्ल ठेयब क्येख सुन का केन चेम्शा सेल्तु। 23बत्ती दातीक ७ ओटा दियारी, आ कांइची नु आइक्च बोस नेल्ल क्येख सुन के चेम्शा सेल्तु। 24मेको नेल्ल टलेन्ट का क्येख सुन के चेम्शा सेल्तु।
धूप चोशा चढ़ेतीक सेल्शो
प्रस्थान ३०:१-५,२२-३८
25धूप चोशा चढ़ेतीके बोल्यो शी के कुबीत का लाइश्शो नु कुबीत का ब्रेम्शो ४ पाटे पा सेल्तु। आ ग्येत्थ लाइश्शो कुबीत निक्शी ङा सेल्तु। मेको नु मेको आ ग्रोव़ नेल्ल मख्रोंइसीशो शी का केन सेल्तु। #३७:२५ कुबीत का ०.५ मिटर, हात का खोदेंशो बाक्ब। 26मिनु मेको नेल्ल क्येख सुनमी गिल्शा, सिरपेच के खोदेंशो पा सुन के सुर सेल्तु। 27मेको आ सुर आगा निम्फा पटटी कली सुन के मुन्द्रा निक्निक्शी सेल्शा, आ सिरपेच खोदेंशो सुर आ दी निम्फा पटटी गे क्येप्ताक्व। मिनु मेको कुरतीक कोक्के शुइक्तीक दुम्त 28मिनु मेको कुरचा कली बोल्यो शी के कुरतीक कोक्के निक्शी सेल्शा, सुनम गिल्तु।
29मिनु मेकोमी ताम्बु ङा लुक्तीक तेल नु ब्रोव़शो रिना पाइब धूप जोक्ब मुरुम सेल्शो खोदेंशो पा सेल्तु।
Currently Selected:
प्रस्थान 37: SUSZ
Highlight
Copy
Compare
Share
Want to have your highlights saved across all your devices? Sign up or sign in
© 1992, 2011 Wycliffe Bible Translators Inc.
