San Juan 21
21
1Cuando tujcu'cam jetse, Jesusis yac vøco isvøjøtzøcyaj vyin ñøtuṉdøvø majraṉvini. Mar nøyipø'is Tiberias. Yø'cse tujcu. 2Tyumø'omna'ṉ ityaj Simón Pedro, Tomás nøjayajpapø mechipø, Natanael Caná cumgu'yombøte Galilea nasis cyojajmbamø; jendi ityajque't Zebedeo'is 'yuneta'm, y eyapø metzcuy Jesusis ñøtuṉdøvø. 3Simón Pedro'is ñøjayaju:
―Ma'ṉbø ataraya nøviti.
Eyata'mbø'is ñøjayaju:
―Øjtzi mati mi mba'jtaṉgue'te.
Maṉyaju y tøjcøyaj barco'omo, pero ni ti ja ñu'cyaj jicø tzu'cøsi. 4Cuando min sø'ṉbø'tzo'tznømi, Jesús queju nø' acapoya, pero ñøtuṉdøvø'is ji'ṉna'ṉ myusyaje o'ca jetete. 5Entonces Jesusis ñøjayaju:
―Ø mi unenda'm, ¿nuctamutija?
Y je'is 'yandzoṉyaju:
―Ji'nda, ni ti ja nucta'møjtzi.
6Entonces Jesusis ñøjmayaju:
―Cojtam mi ataraya mi barco tzø'na'ṉomo, y jetse maṉba nuctame.
Jetse chøcyaju, y entonces jøsijcam ji'namna'ṉ jyø'ñaje vacø mus jyuṉbutyaj ataraya porque tasumna'ṉ sone coque'is. 7Entonces jicø nøtuṉdøvø más syunbapø Jesusis, je'is ñøjay Pedro:
―¡Jicø ndø Comite!
Apena myan Simón Pedro'is que ndøjtze Ṉgomi, myes tyucu vingøspø porque chajcupøna'ṉete, y tøjcøy nø'cø'mø. 8Eyata'mbø ñøtuṉdøvø nu'cyaj nø' acapoya barcoji'ṉ. Nømna'ṉ jyøcøyaju ataraya tasu coqueji'ṉ, como cien metrosye'ṉomo jojmona'ṉ ityaju. 9Cuando putyaj nascøsi, isyaj juctyøc ju'yi y tum coque ju'yicøsi y isyajque'tuti pan. 10Jesusis ñøjmayaju:
―Nømindam mye'chtiyø coque nømdøc mi nømbujtamupø.
11Simón Pedro qui'm barco'omo y jøcønøput ataraya acapoya, tasupø møjapø coqueji'ṉ. Ijtuna'ṉ ciento cincuenta y tres coque. Aunque vøti ijtu, ja chitz ataraya. 12Entonces Jesusis ñøjmayaju:
―Mindamø, mi ucaṉsa'tamø.
Y ni jutipø nøtuṉdøvø'is ja ityajøna'ṉ valor va'cø 'aṉgøva'cyaj iyete. Porque myusyajpana'ṉ que ndø Comimete. 13Jicsye'c Jesús nu'cu, pyøc cyø'ji'ṉ pan, vye'nayaj ñøtuṉdøvø, y jetseti vye'nayajque't coque.
14Jetse ta'n tu'cay nac que Jesusis yaj cyejayaj vyin ñøtuṉdøvø visa'u'jcam oyu'cam ca'e.
Jesusis ñøvejvejnepya Simón Pedro
15Ucaṉsa'yaju'cam, Jesusis 'yaṉgøva'c Simón Pedro:
―Simón, Jonasis mi 'yune, ¿mijtzi más ndø sunbaja que yø'ṉista'm?
Pedro'is 'yandzoṉu ñøjayu:
―Jø'ø, ø mi Ngomi, mitz mi muspa que øtz mi su'nbøjtzi.
Jesusis ñøjayu:
―Entonces como cyoquenbapø'is pyø'nøpya byorrego une, jetse mitz coquejnayaj va'ṉjamyajpapø'stzi.
16Jesusis 'yaṉgøva'cvøjøtzøjcu metzana'jcøsi ñøjayu:
―Simón, Jonasis mi 'yune, ¿mi ndø sunbaja?
Pedro'is 'yaṉdzoṉu:
―Jø'ø, ø mi Ṉgomi, mitz mi muspa que øjtzi mi su'nbøjtzi.
Jesusis ñøjayu:
―Entonces tø coquejnay va'ṉjamyajpa'is øjtzi como si fuera ø mborregose.
17Tu'cañajcøsi 'yaṉgøva'jque'tu ñøjayu:
―Simón, Jonasis mi 'yune, ¿mi ndø sunbaja?
Pedro maya'u porque 'yaṉgøva'c tu'cañajcøsi o'ca syunba, y Pedro'is ñøjayu:
―Ø Ṉgomi, mitz mi muspa mumu tiyø, mitz mi muspa que øtz mi su'nbøjtzi.
Jesusis ñøjayu:
―Entonces coquejnayaj va'ṉjamyajpapø'stzi como si fuera ø mborregose. 18Viyuṉsye mi ndzajmapyøjtzi, cuando mastøcna'ṉ mi syoca'øc mi ṉgya'møpyana'ṉ mi ⁿvin, y myaṉbana'ṉ jut syunbana'ṉ mi myavø; pero cuando mi ⁿ'yachpø'aju'jcam, sajpe'yu maṉba mi ndzaṉaṉvac mi ṉgø', y eyapø'is maṉba mi ⁿyac tucumese. Y maṉba mi ñømaṉyaje jut ji'n sunimø mi ⁿmyavø.
19Jesusis chajmayu jetse va'cø cha'maṉvajcay Pedro jujche maṉba ca'e va'cø yaj quejay Diosis myøja'ṉo'majcuy. Jøsi'cam Jesusis ñøjay Pedro:
―¡Mi tø pa'tø!
Nøtuṉdøvø syunupø Jesusis
20Cuando que'najvitu'u, Pedro'is isu que nømna'ṉ myaṉ pya't jic nøtuṉdøvø'is lo que jutipø más syungo'nba Jesusis, y mismo nøtuṉdøvø cuando nø cu'taṉbacyaju'c Jesusis syaya'om ijtu, y oyuna'ṉ 'yaṉgøva'que: “Ø Ṉgomi, ¿is manba mi ñchi'ocuyaj mi enemigocøsi?” 21Cuando Pedro'is isu jic nøtuṉdøvø, 'yaṉgøva'c Jesús Pedro'is:
―Ø Ṉgomi, ¿y jic pø'nis ti maṉba chøqui?
22Jesusis ñøjayu:
―O'ca øtz su'nbøjtzi jic pøn va'cø quena hasta que øtz vitu'pacsye'ṉomo, ¿tiyø cuenta mi mba'tpa mijtzi? Mitz mi tø pa'tø.
23Por eso nø chamyajtøju que jic nøtuṉdøvø ji'na'ṉ ma cya'e. Pero Jesusis ja ñøjayø que ji'na'ṉ ma cya'e, na más que nømu: “O'ca øtz su'nbøjtzi va'cø cyena øtz vitu'pacsye'ṉomo, ¿ti cuenta mi mba'tpa?”
24Yøṉete mismo nøtuṉdøvø cyotestigosajpapø'is yøcsepø tiyø y jyachø'yupø'is, y ndø mustamba que cyotestigosajpa viyuṉsyepø tiyø.
25Itque'tuti sone eyata'mbø tiyø chøjcupø Jesusis. O'ca jachø'yuna'ṉ muma'ṉgø'i lo que Jesusis chøjcuse, ji'ṉa'ṉ ma tøjcøpø'i libro nascøsi, tascocøjtumna'ṉ nasacopac libruji'ṉ jyayupø'omo ti chøc Jesusis. Amén.
Currently Selected:
San Juan 21: zos
Highlight
Share
Copy
Want to have your highlights saved across all your devices? Sign up or sign in
© 1978, Wycliffe Bible Translators, Inc. All rights reserved.