Joel 1
1
1Daytoy ti imbaga ni Yahweh ken ni Joel nga anak ni Petuel.
Sangitan dagiti Tattao ti Pannakadadael dagiti Apit
2Dakayo a lallakay, dumngegkayo;
denggendak, dakay amin nga agnaed iti Juda.
Adda kadin kastoy a napasamak iti panagbiagyo
wenno idi tiempo dagidi ammayo?
3Ibagayo daytoy kadagiti annakyo;
ibagadanto met kadagiti annakda
a mangibaganto met iti kaputotan
a sumaruno kadakuada.
4Nagsasaruno a pangen ti dudon ti immay
ket nagdissoda kadagiti mulmula;
ti tinedda ti maysa a pangen,
inibus ti simmaruno a pangen.
5Agriingkayo, dakayo a mammartek;
agsangitkayo, dakayo a managinum iti arak;
nadadaelen dagiti ubas a maaramid nga arak.
6Adda#Pal. 9:8. pangen ti dudon a nangraut iti dagatayo;
nabilegda ket di mabilang ti kaaduda.
Natadem ti ngipenda
a kas kadagiti leon.
7Inkisapda dagiti mulatayo nga ubas;
kinibkibanda dagiti kayotayo nga igos.
Inukkisanda ida a namimpinsan;
uray la pimmuraw dagiti sangada.
8Agdung-awkayo a kas iti balasang a mangdung-aw
iti ipapatay ti pakayasawaanna.
9Awan ti trigo wenno arak
a maidaton iti Templo.
Agladingit dagiti papadi
ta awanen ti maidatonda iti Apo.
10Langalang dagiti taltalon.
Agladingit ti daga
ta nadadael dagiti dawa,
kimbet ti bunga dagiti ubas
ken nalaylay dagiti kayo ti olibo.
11Agsangitkayo, dakayo a mannalon;
agladingitkayo, dakayo nga agay-aywan kadagiti kaubasan.
Ngamin, nadadael ti trigo ken ti sebada,
kasta met dagiti amin a mula.
12Nagango dagiti ubas ken dagiti kayo ti igos;
nalaylay amin a kayo nga agbunga iti makan, ket natayda.
Awanen ti rag-o dagiti tattao.
13Dakayo a papadi nga agserserbi iti altar,
agkaweskayo iti nakersang a lupot ket agsangitkayo.
Inkay iti Templo
ket agpatpatnag nga agsangsangitkayo.
Awanen ti trigo wenno arak
a maidaton iti Diosyo.
14Ibilinyo ti panagayunar dagiti tattao;
mangangaykayo iti gimong nga agdaydayaw.
Ayabanyo dagiti papangulo
ken dagiti amin a taga-Juda.
Ummongenyo ida iti Templo ti Apo a Diosyo,
ket umasugkayo kenkuana.
15Asidegen#Is. 13:6. ti aldaw ti Apo;
ti aldaw a panangyeg ti Mannakabalin-amin iti didigra.
Nakabutbutengto dayta nga aldaw!
16Buybuyaentayo ngem awan maaramidantayo,
bayat ti pannakadadael dagiti mulatayo;
awan ti rag-o iti Templo ti Diostayo.
17Matay dagiti bukel iti natikag a daga;
awan ti trigo a maipempen,
iti kasta, agrakaya dagiti sarusar nga awan nagyanna.
18Aguga dagiti baka gapu iti bisinda,
ta awan ti pagarabanda;
agsagaba met ti arban dagiti karnero.
19Umasugak kenka, O Apo,
agsipud ta nagango dagiti karuotan
ken dagiti kayo, a kasla ketdin inda nauram.
20Uray dagiti atap nga animal umasugda kenka,
ta nagmagan dagiti waig.
Currently Selected:
Joel 1: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society