Uk-ukom 1
1
Parmeken dagiti Tribu ti Juda ken Simeon ni Adonibezek
1Kalpasan ti ipapatay ni Josue, nakiuman dagiti Israelita ken ni Yahweh. Sinaludsodda, “Siasino kadagiti tribumi ti umuna a mapan mangraut kadagiti Cananeo iti masakupanmi?”
2“Dagiti tattao ti Juda,” insungbat ni Yahweh. “Ipasakupko kadakuada ti daga.”
3Kinuna dagiti tattao ti Juda kadagiti tattao ti Simeon, “Tulongandakami a mapan manggubat kadagiti Cananeo iti sakup a naited kadakami, ket kuyogendakayto met a mapan iti sakup a naituding kadakayo.”
Iti kasta, nagkukuyog dagiti tribu ti Simeon 4ken Juda a napan nakigubat. Pinagballigi ida ni Yahweh. Inyawatna kadakuada dagiti Cananeo ken Perezeo ket pinarmekda ti 10,000 a lallaki idiay Bezek. 5Nasarakanda sadiay ni Adonibezek ket ginubatda. 6Naglibas ni Adonibezek, ngem kinamatda agingga a natiliwda. Pinutedda dagiti tangan dagiti ima ken sakana.
7Kinuna ni Adonibezek, “Inikkatko ti tangan ti ima ken saka dagiti 70 nga ar-ari ket nagpidpidutda iti murkat iti sirok ti lamisaanko. Binalesnakon ti Dios gapu iti inaramidko kadakuada.”
Naipan ni Adonibezek idiay Jerusalem, ket sadiay ti nakatayanna.
Parmeken ti Tribu ti Juda ti Jerusalem ken Hebron
8Rinaut dagiti tattao ti Juda ti Jerusalem ket sinakupda. Pinapatayda dagiti tattao sada pinuoran ti siudad. 9Insarunoda a napan ginubat dagiti Cananeo nga agnaed iti katurturodan, idiay Negeb#9 NEGEB: Maysa a natikag a lugar iti akin-abagatan a paset ti Palestina. ken iti tanap. 10Ginubatda met dagiti Cananeo idiay Hebron a maaw-awagan idi iti Kiriat-Arba. Pinarmekda dagiti siudad da Sesai, Ahiman ken Talmai.
Parmeken ni Otniel ti Siudad ti Debir
(Jos. 15:13-19)
11Manipud sadiay, napan ginubat dagiti tattao ti Juda ti siudad ti Debir a maaw-awagan idi iti siudad ti Sefer. 12Kinuna ni Caleb, “Yasawakto ni Acsa nga anakko iti siasinoman a makaparmek iti siudad ti Sefer.”
13Ni Otniel nga anak ni Kenaz nga adien ni Caleb ti nakaparmek iti siudad ket isu ti nangasawa ken ni Acsa. 14Iti aldaw a panagkasarda, binilin ni Otniel#14 binilin ni Otniel; wenno sinugsogan ni Acsa ni Otniel. ni Acsa a dumawat ken ni amana iti talon. Napan ngarud ni Acsa ken ni Caleb. Apaman a nakadissaag iti asnona, dinamag ni amana no ania ti gagarana.
15“Kayatko nga ikkannak kadagiti ubbog,” kinunana. “Ngamin, natikag ti daga nga intedmo kaniak.”
Inted ngarud ni Caleb kenkuana ti maysa a disso a yan ti akingngato ken akimbaba nga ubbog.
Dagiti Balligi ti Tribu da Juda ken Benjamin
16Pimmanaw dagiti kaputotan ti Kineo a katugangan ni Moises ken dagiti tattao ti Juda idiay Jerico a siudad ti palma. Napanda idiay let-ang ti Juda nga abagatan ti Arad ket nakipagnaedda kadagiti Amalekita.#16 AMALEKITA kuna ti sumagmamano a kadaanan a patarus. Iti Hebreo, dagiti tattao. 17Nagtipon dagiti tattao ti Juda ken Simeon a napan nanggubat kadagiti Cananeo nga agnaed iti siudad ti Sefat ket pinarmekda ida. Inlunod ken dinadaelda ti siudad ken binaliwanda ti naganna. Pinanagananda iti Horma.#17 HORMA: Pannakadadael ti kayatna a sawen iti Hebreo. 18-19Tinulongan ni Yahweh dagiti tattao ti Juda ket sinakupda ti katurturodan. Ngem dida sinakup#18-19 dida sinakup kuna ti maysa a kadaanan a patarus. Iti Hebreo, sinakupda. ti Gaza, Askelon wenno Ekron ken dagiti kabangibangda a lugar. Adda dagiti lugan a landok dagitoy a tattao nga agnaed iti igid ti baybay, isu a dida kabaelan a pinapanaw ida. 20Kas#Jos. 15:13-14. imbilin ni Moises, naited ti Hebron ken ni Caleb a nangpaksiat kadagiti tallo a familia a nagtaud kadagiti annak ni Anak. 21Ngem#Jos. 15:63; 2 Sam. 5:6; 1 Cron. 11:4. saan a pinapanaw dagiti kameng ti tribu ti Benjamin dagiti Jebuseo nga agnanaed idiay Jerusalem. Agpapan ita, makipagnaed dagiti Jebuseo kadagiti Benjaminita.
Parmeken dagiti Kaputotan ni Jose ti Betel
22-23Napan met ginubat dagiti tribu ti Efraim ken Manases ti Betel a maaw-awagan idi iti Luz. Tinulongan ida ni Yahweh. Pinasiimda ti siudad. 24Nakakita dagitoy iti lalaki a naggapu iti siudad ket kinunada kenkuana, “Isurom no kasano ti iseserrekmi iti siudad tapno saandaka a dangran.”
25Iti kasta, impakitana ti dalan. Pinapatayda amin a tattao iti siudad, malaksid iti daytoy a lalaki ken ti familiana. 26Kalpasanna, napan daytoy a lalaki iti daga dagiti Heteo. Nangbangon iti siudad sadiay a pinanagananna iti Luz a naganna pay laeng agpapan ita.
Dagiti Tattao a Saan a Napaksiat dagiti Israelita
27Saan#Jos. 17:11-13. a pinapanaw ti tribu ti Manases dagiti agnaed kadagiti siudad ti Bet-sean, Taanac, Dor, Ibleam, Megiddo ken kadagiti kabangibang nga il-ili. Nagtultuloy ti panagnaed dagiti Cananeo sadiay. 28Idi pimmigsan dagiti Israelita, pinilitda nga agtrabaho kadakuada dagiti Cananeo, ngem dida pinapanaw ida.
29Di#Jos. 16:10. met pinapanaw ti tribu ti Efraim dagiti Cananeo nga agnaed idiay siudad ti Gezer, ket nakipagnaedda kadagiti Israelita.
30Saan a pinapanaw ti tribu ti Zabulon dagiti agnaed kadagiti siudad ti Kitron ken Naalol. Nakipagtaeng dagiti Cananeo kadakuada, ket pinagtrabaho ida dagiti Israelita.
31Saan a pinagtalaw ti tribu ti Aser dagiti agnaed kadagiti siudad ti Acco, Sidon, Alab, Aksib, Helba, Afic ken Rehob. 32Nakipagnaed dagiti Aserita kadagiti Cananeo a tubo sadiay agsipud ta dida pinapanaw ida.
33Saan a pinagtalaw ti tribu ti Neftali dagiti agnaed kadagiti siudad ti Betsemes ken Bet-anat. Nakipagyanda kadagiti Cananeo nga agnaed sadiay ngem pinagtrabaho ida dagiti Israelita.
34Sinunson dagiti Amorreo ti tribu ti Dan iti katurturodan ket dida intulok a sumalogda iti tanap. 35Nagtultuloy a nagnaed dagiti Amorreo iti bantay Heres, Aijalon ken Saalbin. Ngem inturayan ida dagiti tribu ti Efraim ken Manases, ket pinilitda ida nga agtrabaho kadakuada. 36Daytoy ti sakupen dagiti Amorreo: ti sang-atan ti Akrabim manipud Sela nga agpangato.
Currently Selected:
Uk-ukom 1: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society