FILIPENSES 1
1
1Pablo lo'o Timoteo laca cuare. Tyucuaa ya ndyu'ni ya cña ji'i̱ Jesucristo, bi' cha' nscua ya quityi re cha' ca̱a̱ ca slo cu'ma̱, cha' tya'a ñati̱ ji'i̱ ycui' Ndyosi laca na. Cua ngusñi na cha' ji'i̱ Jesucristo, bi' cha' laca na ñati̱ ji'i̱ ycui' Ndyosi. La cui' jua'a̱ lo'o quityi re chcui' ya xi lo'o lcaa ngu' cusu' nu laca loo ji'i̱ ña'a̱ taju cu'ma̱, jua'a̱ chcui' ya xi lo'o xa' la ngu' nu laca cña, nu ntsu'u cha' xtyucua ji'i̱ ma̱. 2Ndi'ya̱ nti' na', cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' ti̱ ti tyi'i̱ tyiquee ma̱ xqui'ya Jesucristo nu Xu'na na.
Nchcui' Pablo lo'o ycui' Ndyosi cuentya ji'i̱ ngu' Filipos bi'
3Lcaa quiya' lo'o ndyi'u ti' na' ji'i̱ cu'ma̱, li' tso'o tsa ntsu'u tyiquee na'; ndya na' xlya'be ji'i̱ ycui' Ndyosi cuentya ji'i̱ lcaa ma̱ li'. 4Lo'o nchcui' na' lo'o Ni cuentya ji'i̱ ma̱, chaa ti ti' na' nchcui' na' lo'o Ni li'. 5Tya lo'o ndyuna ma̱ cha' tso'o ji'i̱ Cristo tya clyo, ña'a̱ ti tsa cu' ti nxtyucua ma̱ 'na cha' chcui' na' cha' bi' lo'o xa' la ñati̱; 6bi' cha' cua jlo ti' na' juani cha' ña'a̱ ti tya cua'ni ycui' Ndyosi cña ne' cresiya ji'i̱ ma̱, ña'a̱ cuayá' nu tyu'u scua cña bi', nu lo'o tya̱a̱ Jesucristo chaca quiya', cha' la cui' ycui' Ni laca nu nguxana ngua'ni cña ne' cresiya ji'i̱ ma̱ tya clyo. 7Tso'o si culacua xi ti' na' jua'a̱ cuentya ji'i̱ cu'ma̱, xqui'ya cha' lcaa tsa̱ ntsu'u tsa tyiquee na' ña'a̱ na' ji'i̱ cu'ma̱; stu'ba ti ndyaca cha' ji'i̱ cu'ma̱ lo'o na', tso'o tsa ndyu'ni Ni lo'o na cha' ndyu'ni na cña ji'i̱ Jesucristo. Nguxtyucua ma̱ jna' tsubi' lo'o nguta'a̱ na' slo ngu' nu laca loo cha' nxacui̱ na' cha' ji'i̱ ngu' bi'; nacui̱ na' ji'i̱ ngu' cha' tso'o tsa laca cha' nu cua nda ycui' Ndyosi lo'o na, lo'o jua'a̱ ndacha' liñi na' ji'i̱ ngu' ñi'ya̱ laca cha' liñi bi'. Lo'o juani tya nxtyucua ma̱ 'na, masi ntsu'u na' ne' chcua̱ xqui'ya cha' nchcui' na' cha' ji'i̱ Jesús lo'o ñati̱. 8Cua jlo ti' ycui' Ndyosi cha' ñi'ya̱ ntsu'u tyiquee ycui' Jesucristo ña'a̱ Ni ji'i̱ lcaa cu'ma̱, la cui' jua'a̱ ntsu'u tsa tyiquee na' ña'a̱ na' ji'i̱ cu'ma̱. 9Ndi'ya̱ laca cha' nu nchcui' na' lo'o ycui' Ndyosi cuentya ji'i̱ ma̱: ndijña na' chacuayá' ji'i̱ Ni cha' ña'a̱ ti tso'o la tyu'u tyiquee ma̱ ña'a̱ ma̱ ji'i̱ tya'a ñati̱ ma̱, cha' jua'a̱ taca ca cuayá' la ti' ma̱ lcaa cha', cha' jua'a̱ taca culacua tso'o la ti' ma̱; 10ndijña na' cha' lcaa tyempo taca ca'ya cha' hique ma̱ ñi'ya̱ nu tso'o la cha' cua'ni ma̱. Jua'a̱ nga'aa tyaja'a̱ ma̱ cua'ni la ma̱ cha' cuxi, nga'aa tyanu yabe' hichu̱' ma̱ nu lo'o tyalaa tsa̱ cha' ca̱a̱ Cristo chaca quiya'. 11Quiña'a̱ tsa cha' tso'o taca cua'ni ma̱ lcaa su ndi'i̱ ma̱ chalyuu xqui'ya Jesucristo, cha' ndyu'ni Cristo cña ne' cresiya ji'i̱ ma̱; bi' cha' taca cua'ni tlyu ma̱ ji'i̱ ycui' Ndyosi, taca cua'ni chi̱ ma̱ loo Ni.
Sca ti cha' nti' Pablo nde chalyuu, cha' caca yu cña ji'i̱ Cristo
12Cu'ma̱ ngu' tya'a ngusñi na cha' ji'i̱ Cristo, nti' na' cha' caca cuayá' tso'o ti' ma̱ cha' cua lijya̱ ngañi la cha' tso'o ji'i̱ Jesús laja ngu' quichi̱ re, xqui'ya cha' cuxi nu ndyaca 'na re. 13Nga'a̱ na' ne' chcua̱ juani, bi' cha' jlo ti' lcaa ñati̱ nu ndi'i̱ ni'i̱ tlyu ji'i̱ gobierno re, cha' cua ngusu'ba ngu' 'na ne' chcua̱ xqui'ya cha' ndya'a̱ na' lo cña ji'i̱ Cristo; masi lcaa sendaru nu ndi'i̱ ca nde, masi xa' la ñati̱, cua jlo ti' ngu'. 14Lo'o jua'a̱ cua ña'a̱ ca ngu' tya'a ngusñi na cha' ji'i̱ Jesús, tsa ndu̱ cua tso'o la jlya ti' ngu' cha' ji'i̱ nu Xu'na na juani, cua tlyu la xi tyiquee ngu' juani; nga'aa ntsi̱i̱ ngu' chcui' ngu' cha' ji'i̱ ycui' Ndyosi lo'o xa' ñati̱, xqui'ya cha' ná ntsi̱i̱ na' lo'o ntsu'u na' ne' chcua̱ re.
15Chañi cha' ntsu'u ñati̱ nu nchcui' cha' ji'i̱ Cristo lo'o tya'a xqui'ya cha' chi̱i̱ ti nti' ñati̱ bi', na cua nti' tsa ñati̱ bi' xu̱u̱ tya'a lo'o ya; pana tya ntsu'u la xi xa' la ngu' nu nchcui' cha' bi' xqui'ya cha' tso'o ti tyiquee ngu'. 16-17Ntsu'u tsa tyiquee ngu' bi' ña'a̱ ngu' ji'i̱ ycui' Ndyosi, lo'o jua'a̱ jlo ti' ngu' cha' cua nda Ni cña 'na cha' xacui̱ na' cha' ji'i̱ ñati̱ nu xu̱u̱ tya'a lo'o na xqui'ya cha' tso'o ji'i̱ Cristo. Nu ñati̱ nu chi̱i̱ nti' ni, si'i na tyucui tyiquee ñati̱ bi' nchcui' ngu' cha' ji'i̱ Cristo; laca cha' cua nti' ngu' tyiji̱loo ngu' ji'i̱ tya'a ngu'. Lo'o jua'a̱ cua nti' tsa ngu' cha' ta la ngu' cha' ti'í 'na laja lo'o ndi'i̱ na' ne' chcua̱. 18Ná ndube ti' na' ñi'ya̱ ndyu'ni ngu' bi', masi tyucui tyiquee chcui' ngu' cha' ji'i̱ Cristo lo'o ñati̱, masi cha' cuiñi ti ntsu'u tyiquee ngu' nu lo'o nchcui' ngu' cha' bi'; pana tso'o tsa nti' na' si ña'a̱ ti tya cañi la cha' ji'i̱ Cristo bi'.
Lo'o jua'a̱ tya caca chaa la ti' na' tyempo nde loo la. 19Ndu̱ ti' na' cha' yala ti caca tso'o la cha' jna' re, cha' cua jlo ti' na' ñi'ya̱ ndijña tsa ma̱ ji'i̱ ycui' Ndyosi cha' tyu'u na' ne' chcua̱ re, cha' tyu'u na' nde liya'; jlo ti' na' cha' nxtyucua tsa la cui' Xtyi'i ycui' Jesucristo 'na. 20Ndi'ya̱ nti' na' cua'ni na': nti' tsa na' cha' ná caca tyuju'u ti' na' lo'o chcui' na' cha' ji'i̱ Jesús lo'o ñati̱; masi tyempo nu lijya̱ nde loo la, masi tyempo juani, tlyu caca tyiquee na' lo'o chcui' na' cha' ji'i̱ Jesús. Jua'a̱ nti' na' cua'ni na', cha' ña'a̱ ti cua'ni tlyu na' ji'i̱ Cristo, masi tya lu'ú ti na', masi cua ngujuii na'. 21Sca ti cha' nti' na' cua'ni na' nde chalyuu, cha' caca na' cña ji'i̱ Cristo. Tso'o la masi cajaa na', nti' na', cha' li' taca ña'a̱ na' ji'i̱ ycui' Ni; 22pana ná jlo ti' na' na laca nu tso'o la cha' cua'ni na', cha' ná tyiquee' tya taca cua'ni na' tya quiña'a̱ la xi cña ji'i̱ nu Xu'na na, si tya tyi'i̱ la na' xi chalyuu. 23Tyucuaa lo cha' nti' na' cha' caca 'na lacua: Nti' tsa na' cha' xtyanu na' ji'i̱ chalyuu re, cha' li' taca tyi'i̱ na' lo'o Cristo, cha' bi' nu tso'o la nti' na'; 24pana juani ni, ndulo la cha' ji'i̱ cu'ma̱ si tya tyi'i̱ la na' xi chalyuu. 25Nda ti' na' cha' jua'a̱ caca 'na, cha' tya tyi'i̱ la na' xi chalyuu. Li' taca xtyucua la na' ji'i̱ lcaa cu'ma̱, cha' xñi tso'o la ma̱ cha' ji'i̱ Cristo; jua'a̱ caca chaa la ti' ma̱ lo'o jlya tso'o ti' ma̱ ji'i̱ Ni. 26Lo'o ca̱a̱ na' cha' tyi'i̱ na' slo ma̱ chaca quiya', li' tso'o tsa caca tyiquee ma̱ cuentya ji'i̱ Jesucristo xqui'ya na'.
27Bi' cha' juani, cui'ya ma̱ cuentya ñi'ya̱ nga'a̱ cha' cua'ni ma̱ chalyuu cuentya ji'i̱ cha' ji'i̱ Cristo nu cua ngusñi ma̱. Si jua'a̱ ndu'ni ma̱, li' ná ndu'ni cha' masi ca̱a̱ na' ca quichi̱ tyi ma̱, masi ná caca ca̱a̱ na'. Ná tyiquee' caja cha' 'na cha' sca ti cha' ntsu'u tyiquee ma̱ lo'o tya'a ma̱, cha' ndalo tsa tyiquee ma̱ ji'i̱ tya'a cusu̱u̱ ma̱ ca bi'; ná tyiquee' stu'ba ti culacua ti' ma̱ lo'o tya'a ma̱ laja lo'o tyiquee' tsa nchcui' ma̱ lo'o ngu' cha' xñi ngu' cha' tso'o bi' ji'i̱ Cristo. 28Lo'o ndu'ni ma̱ jua'a̱, li' nga'aa ntsu'u cha' cutsi̱i̱ ma̱ ji'i̱ ngu' tya'a cusu̱u̱ ma̱, cha' taca ca cuayá' ti' ngu' cha' cua nscua cha' cuityi̱ ycui' Ndyosi ji'i̱ lcaa ñati̱ cuxi. Pana cu'ma̱ ni, cua ngulaá ma̱ ji'i̱ nu cuxi bi'; ycui' Ndyosi ndu'ni cha' taca tyiji̱loo ma̱ ji'i̱ ñati̱ cuxi bi'. 29Tso'o tsa laca cha' nda ycui' Ndyosi chacuayá' cha' ngusñi ma̱ cha' ji'i̱ Cristo; pana cua nscua cha' caja xi cha' ti'í ji'i̱ ma̱, nu lo'o cua ngusñi ma̱ cha' ji'i̱ Cristo bi'. 30Stu'ba ti ndyaca cha' ji'i̱ cu'ma̱ lo'o na', ti'i̱ tsa cña nu cua ngujui ji'na. Pana cua na'a̱ ma̱ ñi'ya̱ ngua'ni na' cña tya tsubi' la, cha' lye tsa nxu̱u̱ tya'a na' lo'o nu cuxi; lo'o ña'a̱ ti taca ca cuayá' ti' ma̱ cha' lye tsa ndyu'ni na' cña juani.
Currently Selected:
FILIPENSES 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.