SAN JUAN 6
6
Nda Jesús na ndyacu ca'yu mil tya'a ñati̱
1Tiya' la li' ndu'u Jesús ndyaa nde chaca tsu' tayu' Galilea, la cui' tayu' Tiberias naa tayu' bi'. 2Tsa tlyu ti ndyaa lca'a̱ quiña'a̱ ñati̱ ji'i̱ yu, bi' ñati̱ laca nu cua na'a̱ cña tonu nu ngua'ni yu lo'o ngua'ni yu cha' ndyaca tso'o ngu' quicha. 3Li' ndyaa Jesús sca lo cuati̱i̱, ndyaa tucua xi ca bi' lo'o ñati̱ nu ndyaca tsa'a̱ ji'i̱. 4Cua ngulala ti ta'a pascua ngua bi' li', ta'a tlyu ji'i̱ ngu' judío. 5Lo'o li' na'a̱ Jesús cha' tsa tlyu ti ndyalaa quiña'a̱ tsa ñati̱ ca su ntucua ycui'. Li' nchcuane yu ji'i̱ Felipe:
―¿Macala cui'ya na tyaja cha' cacu ñati̱ quiña'a̱ cua? ―nacui̱ Jesús.
6Jlo ti' Jesús ñi'ya̱ cua cua'ni ti ycui', pana cua nti' yu cua'ni cuayá' yu ji'i̱ Felipe ñi'ya̱ ña'a̱ cua'ni nu Felipe bi'. 7Lo'o li' nguxacui̱ Felipe cha' ji'i̱ yu:
―Ná tyu'u scua tucua mil paxu cha' cui'ya na na cacu lcaa ngu' re, masi xca ti caja xi cacu scaa ngu' ―nacui̱.
8Pana ndu̱ sca yu nu ndyaca tsa'a̱ ji'i̱ Jesús, nu naa Andrés, tya'a ngula Simón Pedro laca bi'. Nchcui' Andrés lo'o Jesús li':
9―Ndu̱ sca nu piti qui'yu re ―nacui̱ Andrés―, lo'o xi ca'yu tya'a xlyá teje' ji'i̱, lo'o tucua tya'a cualya sube ji'i̱ ―nacui̱―. Pana ná tyu'u scua cha' bi' cha' cacu ñati̱ quiña'a̱ re ―nacui̱ Andrés ji'i̱ Jesús.
10―Chcui' ma̱ xi lo'o ñati̱ quiña'a̱ cua cha' tyaca'a̱ ngu' xi lo yuu ―nacui̱ Jesús li'.
Si̱i̱ xi loyuu su tso'o bi' lo'o quiña'a̱ tsa quii sube ndi'i̱ ca bi'. Ca'yu mil tya'a ngu' qui'yu ti nguti'i̱ tsa̱ bi', nu nguti'i̱ lo quii bi'. 11Lo'o li' ndaya' Jesús ji'i̱ xlyá bi', ndya yu xlya'be ji'i̱ ycui' Ndyosi cha' cua nda Ni na cacu ngu'. Li' ngusa'be Jesús xlyá bi', nda yu ji'i̱ ngu' nu ndyaca tsa'a̱ ji'i̱, lo'o ngu' bi' laca nu ndacha xlyá ji'i̱ ngu' quiña'a̱ bi' ca su ndi'i̱ ngu'. Lo'o cualya bi' nda Jesús cacu ngu'. Li' ndyacu ngu' ña'a̱ cuayá' nu nguaala' ti' lcaa ngu'. 12Lo'o cua ndye ndyacu ngu', li' nchcui' Jesús lo'o nu ngu' nu ndyaca tsa'a̱ ji'i̱ chaca quiya':
―Xuti'i̱ ma̱ lcaa yu'be nu ndyanu su ndyacu ngu' jua cha' ná chcuna' bi' ―nacui̱ yu.
13Jua'a̱ ngua'ni ngu' li', lo'o ndyanu tii tyucuaa tya'a chcubi ngutsa'á̱ ntsu'u xlyá yu'be bi', yu'be nu ndyanu su ndyacu ngu'. 14Lo'o cua na'a̱ ngu' cña tonu nu ngua'ni ca Jesús, li' nacui̱ ngu':
―Chañi cha' yu jua laca nu cusu' nu chcui' cha' ji'i̱ ycui' Ndyosi lo'o na, nu cua tyu'u tucua ti nde chalyuu.
15Hora ti ngua tii Jesús cha' ngua ti' ngu' taya' ngu' ji'i̱, cha' tsaa lo'o ngu' ji'i̱ cha' caca yu rey nu caca loo ji'i̱ ngu'. Bi' cha' ndu'utsu' Jesús ndyaa cuaana ti nde ca'ya, ndyaa yu sca ti yu.
Ndya'a̱ Jesús lo hitya tayu'
16Cua ndyaa cuichaa li', lo'o nu ngu' nu ndyaca tsa'a̱ ji'i̱ ni, cua ndyaa ngu' nde to' tayu' chaca quiya'. 17Ndyatí̱ ngu' ne' yaca ni'i̱ cha' xa' xtyu̱u̱ ngu', cha' tyu'u ngu' nde chaca tsu' tayu', cha' tyalaa ngu' ca quichi̱ Capernaum chaca quiya', ngua ti' ngu'. Cua ngua talya li', pana bilya tyalaa Jesús su ndi'i̱ ngu'. 18Lye tsa nchca cui'i̱ lo hitya tayu' bi', hasta ndyatu̱ clyoo'. 19Cua ndyaa lo'o ngu' nu ndyaca tsa'a̱ ji'i̱ yaca ni'i̱ ji'i̱ ngu' xi ca'yu scuá kilómetro cuayá' tyijyu', li' na'a̱ ngu' cha' lijya̱ Jesús su ndi'i̱ ngu'; cuayá' lo ti hitya ndya'a̱ yu lijya̱ yu lo hitya. Ndyutsi̱i̱ tsa ngu' lo'o na'a̱ ngu' ji'i̱ yu. 20Bi' cha' hora ti nchcui' Jesús lo'o ngu':
―Ná cutsi̱i̱ ma̱, na' laca̱ re ―nacui̱.
21Tso'o tsa ngua ti' ngu' cha' ndyatí̱ Jesús ne' yaca ni'i̱ bi'. Lo'o li' yala ti ngutu'u yaca ni'i̱ chaca tsu' tayu' bi'.
Lijya̱ lca'a̱ ngu' ji'i̱ Jesús
22Ca chaca tsa̱ li', tya ndi'i̱ ñati̱ tsa tlyu ti la cui' ca to' tayu' bi'. Sca ti yaca ni'i̱ bi' na'a̱ ngu' ngutacui to' hitya ngusi̱i̱ la caa, pana jlo ti' ngu' cha' ná ndyaa Jesús ne' yaca ni'i̱ bi' lo'o ngu' nu ndyaca tsa'a̱ ji'i̱; ycui' ti ngu' ndyaa ngu'. 23Lo'o li' ngulaa xi xa' la yaca ni'i̱ nu ngutu'u nde quichi̱ Tiberias, ndyacui to' hitya cacua ti su ndyacu ngu' xlyá nu cua nda ycui' nu Xu'na na xlya'be ji'i̱ ycui' Ndyosi cuentya ji'i̱. 24Lo'o cua ngua cuayá' ti' ngu' cha' nga'aa ndi'i̱ Jesús to' tayu' bi', lo'o jua'a̱ nga'aa ndi'i̱ nu ngu' nu ndyaca tsa'a̱ ji'i̱ ca bi', li' ndyatí̱ ngu' ne' yaca ni'i̱ nu ndyalaa bi', ndyaa ngu' ca quichi̱ Capernaum ndyaana ngu' ji'i̱ Jesús.
Sca lo tyaja nu chañi cua'ni cha' tyaala' ti' na
25Ca chaca tsu' bi' njyacua ngu' ji'i̱ Jesús. Lo'o ti nchcuane ngu' ji'i̱ yu li':
―Mstru ―nacui̱ ngu'―, ¿ni hora ngutu'u nu'u̱ lijya̱ ti nde?
26Li' nda Jesús sca cha' lo'o ngu':
―Ndube tsa ti na' cha' cua lijya̱ ma̱ yaana ma̱ jna' xqui'ya cha' nda na' xlyá nu ndyacu ma̱ tsubi' ti ―nacui̱―. Nguaala' ti' ma̱ lo'o ndyacu ma̱ li'. Chañi cha' xqui'ya cha' bi' lijya̱ ma̱ yaana ma̱ jna', si'i xqui'ya cña tonu nu ngua'ni na' cuentya ji'i̱ ycui' Ndyosi. 27Tso'o la ―nacui̱ Jesús li'―, si cua'ni cña ti' ma̱ cha' caja sca cha' nu talo ji'i̱ ma̱; chañi cha' tyaala' ti' ma̱ li', si caja chalyuu nu ná nga'a̱ cha' tye ji'i̱ ma̱. Nu na cacu na ni, xtyi'i ti talo na bi', yala ti quiñu'u̱ na bi'. Pana na' nu lijya̱a̱ cha' caca na' ñati̱, ta na' sca cha' tso'o ji'i̱ ma̱ nu cua'ni cha' tyaala' ti' ma̱, lo'o ná tye tsiya' ti cha' bi' ji'i̱ ma̱ ―nacui̱―. Na cua nda ycui' Ndyosi Sti na' chacuayá' jna' cha' ta na' cha' tso'o bi' ji'i̱ ma̱.
28Li' nchcuane ngu' ji'i̱ Jesús:
―¿Ni'ya̱ cua'ni ya lacua, cha' caca cua'ni ya cña nu nti' ycui' Ndyosi cha' cua'ni ya?
29―Ndi'ya̱ laca cña nu nti' ycui' Ndyosi cha' cua'ni ma̱ ―nacui̱ Jesús―. Xñi ma̱ cha' jna', cha' na' laca̱ Sñi' ycui' Ndyosi, cha' cua nda Ni 'na lijya̱a̱ chalyuu.
30Li' tya nchcuane la ngu' ji'i̱ Jesús:
―¿Ñi'ya̱ ña'a̱ cña nu cua'ni nu'u̱ lacua? ¿Ñi'ya̱ ña'a̱ cña tonu nu cua'ni nu'u̱ cha' ña'a̱ cui'ya ya xi ji'i̱, cha' xñi ya cha' jinu'u̱ li'? ―nacui̱ ngu' ji'i̱ Jesús―. 31Cua nda ycui' Ndyosi na ndyacu jyo'o cusu' ji'na lo'o nguta'a̱ yu'u ngu' lo nati̱' btyi nu ngua sa'ni li'. Ndi'ya̱ nscua lo quityi cusu' ji'i̱ cha' bi': “Cua nda Ni na ndyacu ngu', na nu ngutu'u ca su ntucua ycui' Ndyosi ngua'ya nde lo yuu”.
32Li' nchcui' Jesús lo'o ngu' chaca quiya':
―Liñi tsa cha' nu nchcui' na' lo'o ma̱ juani: Ycui' Ndyosi Sti na' laca nu ta cha' tso'o nu cacu ma̱, la cui' cha' bi' laca nu ndyu'u nde su ndi'i̱ ycui' Ni; si'i la cui' cha' ñi'ya̱ nu nda jyo'o Moisés ndyacu ngu' cua sa'ni ―nacui̱―. 33Juani ta Sti na' sca lo cha' tso'o nu cacu ma̱ nu chañi cha' cua'ni cha' tyaala' ti' ma̱ lo'o caja cha' bi' ji'i̱ ma̱, ñi'ya̱ laca lo'o ndyacu ma̱ tyaja. Ndu'u cha' tso'o bi' ca su ndi'i̱ ycui' Ndyosi, lijya̱ bi' nde lo yuu, nda bi' chalyuu nu ná nga'a̱ cha' tye ji'i̱ ma̱.
34―Cusu' ―nacui̱ ngu' ji'i̱ Jesús―, ta clya nu'u̱ cha' tso'o bi' cacu ya, lo'o li' cacu ya ji'i̱ lcaa tsa̱.
35―Ñi'ya̱ ndu'ni tyaja lo'o ndye ndyacu na ji'i̱, jua'a̱ cua'ni na' lo'o ñati̱, si xñi ngu' cha' jna' ―nacui̱ Jesús li'―. Ta na' sca chalyuu ji'i̱ ngu' su xcui' ndyaala' ti' ngu' ―nacui̱ Jesús ji'i̱ ngu' bi'―. Lo'o lcaa ñati̱ nu tyu'u cha' ji'i̱ ngu' lo'o na', nga'aa jña la ngu' xa' lo na cacu ngu'; lo'o xñi ngu' cha' jna', nga'aa tyucua nguityi ngu' li' ―nacui̱―. 36Pana nu cu'ma̱ ni, ñi'ya̱ nu ni na' ji'i̱ ma̱ tsubi' cha' ná jlya ti' ma̱ jna', masi cua na'a̱ ma̱ jna' ―nacui̱ Jesús―. 37Lcaa ñati̱ nu cua nda Sti na' jna', ngu' nu ngusñi cha' jna' ni, caca ngu' bi' ñati̱ 'na li'. Tucuá na' cha' ji'i̱ ngu' bi', ná culo'o na' ji'i̱ ngu' cha' tyaa ngu' chaca se'i̱. 38Cua ngutu'u na' nde slo ycui' Ndyosi Sti na', lijya̱ na' nde lo yuu cha' cua'ni na' cña nu ngulo Sti na' 'na; si'i cha' cua'ni na' ñi'ya̱ nu nta̱' cua'ni ta̱ ―nacui̱ Jesús―. 39Na cua nti' Sti na' cha' ná chcuna' ni sca ñati̱ nu cua ngusñi cha' 'na. Lo'o li' cua'ni na' cha' tyu'ú ngu' chaca quiya' lo'o cua tye ti chalyuu ―nacui̱―. 40Nde laca cña nu nti' Sti na' nu cua nda jna' lijya̱a̱ cha' caca: cua nti' Ni cha' ná tye chalyuu su tyi'i̱ ngu' lo'o Ni, lcaa ñati̱ nu ndyuloo jna' cha' laca̱ Sñi' Ni, lcaa ñati̱ nu xñi cha' jna'. Lo'o li' chañi cha' cua'ni na' cha' tyu'ú ngu' chaca quiya' lo'o cua tye ti chalyuu.
41Lo'o li' ná ndiya ti' ngu' judío cha' nchcui' Jesús lo'o ngu' ndi'ya̱: “Ñi'ya̱ nu ndu'ni tyaja, jua'a̱ cua'ni na' si xñi sca ñati̱ cha' jna'. Sca ti na' nu ngutu'u̱ ca su ntucua ycui' Ndyosi, sca ti na' taca cua'ni na' cha' tyaala' ti' ñati̱”, nacui̱ Jesús. Nda tsa ngu' cha' lo'o tya'a ngu' cha' ná tso'o cha' bi'. 42Li' nacui̱ ngu':
―¿Ha si'i Jesús sñi' José laca nu jua? ―nacui̱ ngu'―. Cua nslo na ji'i̱ sti yu lo'o xtya'a̱ yu. ¿Ñi'ya̱ ndyu'u cha' nu nchcui' yu jua cha' cua ngutu'u yu ca su ntucua ycui' Ndyosi?
43Li' nguxtyacui Jesús cha' lo'o ngu':
―Nga'aa chcui' tsa ma̱ lo'o tya'a ma̱ ji'i̱ cha' nu nda na' lo'o ma̱ tsa̱ ―nacui̱―. 44Ná tucui caca ñati̱ jna' si ná lo'o ycui' Ndyosi Sti na' ngua'ni cha' caca ngu' jua'a̱. Lo'o li' na' laca̱ nu cua'ni cha' tyu'ú ngu' bi' chaca quiya' lo'o cua tye ti chalyuu ―nacui̱ Jesús―. 45Ndi'ya̱ nchcui' sca cha' nu nguscua sca jyo'o cusu' lo quityi nu ngua sa'ni: “Ycui' Ndyosi laca nu culu'u cha' ji'i̱ ycui' Ni ji'i̱ ñati̱”, nacui̱ quityi bi'. Bi' cha' ñati̱ 'na caca lcaa ñati̱ nu taquiya' cha' ji'i̱ ycui' Ndyosi Sti na', lcaa ñati̱ nu caca tsa'a̱ cha' nu culu'u Ni ji'i̱ ngu'.
46’Ná nacui̱ na' cha' cua na'a̱ ñati̱ chalyuu ji'i̱ Sti na' ―nacui̱ Jesús―. Bilya. Sca ti na' cua na'a̱ na' ji'i̱ ycui' Ni, cha' cua ngutu'u na' ca slo Ni. 47Liñi tsa cha' nu nda na' lo'o ma̱ juani, cha' ñati̱ nu ngusñi cha' ji'i̱ ycui' Ndyosi ni, cua laca ngujui chalyuu nu ná nga'a̱ cha' tye ji'i̱ ngu' ―nacui̱―. 48Ta na' sca chalyuu ji'i̱ ngu' su xcui' ndyaala' tso'o ti' ngu'. 49Cua ndyacu jyo'o cusu' ji'i̱ ma̱ na nu nda ycui' Ndyosi ji'i̱ ngu', ngua'ya bi' lo yuu lo nati̱' btyi ca su nguti'i̱ ngu'; pana nga'aa lu'ú ngu' bi' juani, masi ndyacu ngu' na bi' sa'ni la. 50Ndi'ya̱ nchcui' na' lo'o ma̱ juani ―nacui̱ Jesús―, cuentya ji'i̱ la cui' cha' tso'o nu ta Ni ji'i̱ ñati̱, nu chañi cua'ni cha' tyaala' ti' ngu': slo ycui' Ndyosi ngutu'u cha' tso'o bi', lijya̱ bi' chalyuu; chañi cha' lo'o cacu sca ñati̱ ji'i̱ na bi', ná nga'a̱ cha' tye chalyuu ji'i̱ ngu' li'. 51Na' laca̱ nu cha' tso'o nu caja ji'i̱ ñati̱ ―nacui̱ Jesús―. Ngutu'u na' nde slo ycui' Ndyosi lijya̱ na' chalyuu cha' caca na' ñati̱, cha' caja ñi'ya̱ nu tyaala' ti' ngu'. Nu lo'o xñi ñati̱ cha' jna', ná nga'a̱ cha' tye chalyuu ji'i̱ ngu' bi' li'; ta na' tyucui ña'a̱ na' ji'i̱ ngu', cha' jua'a̱ caja chalyuu cucui ji'i̱ ngu'.
52Li' nguxana ngu' judío bi', lye tsa nxlyú ngu' cha' hichu̱' tya'a ngu'.
―¿Ñi'ya̱ cua'ni nu jua si ta yu cuaña' ycui' ca yu cha' cacu na?― nacui̱ ngu' ji'i̱ tya'a ngu'.
53Li' nguxacui̱ Jesús cha' ji'i̱ ngu':
―Liñi tsa cha' nu nda na' lo'o ma̱ juani ―nacui̱―, ná taca ca tso'o cresiya ji'i̱ ma̱ si ná caja lcaa cha' nu ji'i̱ ycui' na' ji'i̱ ma̱, na' nu cua lijya̱a̱ chalyuu cha' caca na' ñati̱. Nga'a̱ cha' tyatí̱ cha' bi' ne' cresiya ji'i̱ ma̱, ñi'ya̱ si cacu ma̱, si co'o ma̱ sca na ―nacui̱ Jesús―. 54Cua ña'a̱ ca ñati̱ nu jua'a̱ ti caja tyucui ña'a̱ ycui' na' ji'i̱ ngu', ná nga'a̱ cha' tye chalyuu ji'i̱ ngu' bi'. Cua'ni na' cha' tyu'ú ngu' bi' chaca quiya' lo'o cua tye ti chalyuu ―nacui̱ Jesús―. 55Chañi cha' taca caja tyucui ña'a̱ ycui' na' ji'i̱ ma̱, ñi'ya̱ laca si caja cuaña' na' cha' cacu ma̱, ñi'ya̱ laca si caja tañi na' cha' co'o ma̱. 56Lo'o cua ña'a̱ ca ñati̱ nu jua'a̱ cacu ngu', nu jua'a̱ co'o ngu' cha' nu ta na' ji'i̱ ngu' ―nacui̱―, lcaa tsa̱ tyi'i̱ ngu' bi' lo'o na', tyi'i̱ na' lo'o ngu' bi' li'. 57Lcaa tyempo lu'ú Sti na' nu nda 'na lijya̱a̱ ca nde, lo'o jua'a̱ chacuayá' ji'i̱ ycui' Ni lu'ú na'; chacuayá' 'na tyu'ú ñati̱ nu xñi cha' 'na, ñati̱ nu caja tyucui ña'a̱ na' ji'i̱. 58Na' laca̱ nu cha' tso'o nu cacu ngu' bi' ―nacui̱ Jesús ji'i̱ ngu'―, cha' ngutu'u na' nde slo ycui' Ndyosi lijya̱ na' lo yuu; si'i la cui' tya'a na nu ndyacu jyo'o cusu' ji'na lo nati̱' btyi cua sa'ni ―nacui̱―. Nga'aa lu'ú ngu' bi' juani, masi cua ndyacu ngu' cha' bi' nu ngua sa'ni li'; pana lo'o caja cha' tso'o bi' ji'i̱ ma̱ cha' cacu ma̱ ―nacui̱―, ná nga'a̱ cha' tye chalyuu ji'i̱ ma̱ li'.
59Jua'a̱ cha' ngulu'u Jesús ji'i̱ ngu' Capernaum nde ni'i̱ su ndyu'u ti'i̱ ngu' cha' cuna ngu' cha' ji'i̱ ycui' Ndyosi.
Taca caca cucui cresiya ji'na si taquiya' na cha' nu nda Jesús
60Lo'o ndyuna tyu̱u̱ tya'a ñati̱ nu ndyaca tsa'a̱ ji'i̱ Jesús cha' nu nchcui' yu, li' nacui̱ ngu' bi':
―Tlyu tsa cha' nchcui' nu cusu' re lo'o na. Tso'o la si nga'aa cuna na cha' bi' tsiya' ti.
61Jlo ti' Jesús cha' nchcui' tsa nu ngu' nu ndyaca tsa'a̱ bi' lo'o tya'a ngu' cuentya ji'i̱ cha' nu cua nda ca ti yu lo'o ngu', bi' cha' nchcui' yu lo'o ngu' chaca quiya':
―¿Ha ngua tyuju'u ti' ma̱ 'na xqui'ya cha' nu nchcui' na' lo'o ma̱? ―nacui̱ yu―. 62¿Ñi'ya̱ ta culacua ti' ma̱ lo'o ña'a̱ ma̱ jna' cha' tya'a na' ca su ngutu'u na' clyo, na' nu lijya̱a̱ chalyuu cha' caca na' ñati̱? ―nacui̱ Jesús ji'i̱ ngu' bi'―. 63Nu xtyi'i nu ta Ni cha' tyanu ne' cresiya ji'na, bi' laca nu nda chalyuu tso'o ji'na; si'i xqui'ya juersa nu ntsu'u ji'i̱ cuaña' ti na lu'ú na ―nacui̱ Jesús―. Lo'o jua'a̱ lcaa cha' nu nda na' lo'o ma̱ juani, cuentya ji'i̱ sca na nu ta ycui' Ndyosi ji'i̱ ñati̱ laca cha' bi', sca cha' nu tyu'ú ne' cresiya ji'i̱ ñati̱ laca bi'; caja chalyuu ji'i̱ ngu' si taquiya' ngu' ji'i̱ cha' bi'. 64Pana tya ntsu'u xi ngu' tya'a ndya'a̱ ma̱ nu ná jlya ti' jna' ―nacui̱ Jesús li'.
Tya lo'o nguxana ti cha', tya li' ngua tii Jesús tilaca laca nu ná jlya ti' ji'i̱ yu, tilaca laca nu cujui' cresiya ji'i̱ yu ca tiya' la. 65Li' nacui̱ Jesús:
―Bi' cha' nacui̱ na' ji'i̱ ma̱ tsa̱ cha' ná tucui caca ñati̱ jna' si ná cua'ni Sti na' cha' ñati̱ 'na caca ngu' bi'.
66Lo'o jua'a̱ ngua li', ngua tyuju'u ti' tyu̱u̱ tya'a ngu' nu ndyaca tsa'a̱ ji'i̱ Jesús; nga'aa ntaja'a̱ ngu' bi' tya'a̱ lo'o yu. 67Li' nchcuane Jesús ji'i̱ nu tii tyucuaa tya'a ñati̱ bi':
―¿Ha lo'o cu'ma̱ nti' ma̱ xtyanu ma̱ 'na?
68Li' nguxacui̱ Simón Pedro cha' ji'i̱ Jesús:
―Cusu' ―nacui̱―, ¿ma nde ntsu'u chaca se'i̱ su tsaa ya cha' cuna ya lcaa ña'a̱ cha' liñi nu nchcui' nu'u̱? Ná nga'a̱ cha' tye chalyuu ji'i̱ ya si cua'a̱ jyaca̱ ya ji'i̱ cha' nu nchcui' nu'u̱ ―nacui̱―. 69Jlya ti' ya jinu'u̱. Cua jlo ti' ya cha' ycui' Ndyosi laca nu cua ngusubi jinu'u̱, cha' sca ti nu'u̱ nu chañi cha' laca nu'u̱ Sñi' ycui' Ndyosi nu lijya̱ chalyuu.
70Li' nacui̱ Jesús:
―Jua'a̱ na', cua ngusubi na' ji'i̱ ca ta'a tii tyucuaa tya'a ma̱, masi cuiñaja caca tsaca ma̱.
71Nu nti' Jesús ñacui̱ cha' Judas sñi' Simón Iscariote, bi' laca nu ta ji'i̱ Jesús ji'i̱ ngu' xña'a̱ ca tiya' la. Lo'o nu Judas bi' ni, lo'o bi' nga'a̱ laja nu tii tyucuaa tya'a ngu' nu ndyaca tsa'a̱ ji'i̱ Jesús.
Currently Selected:
SAN JUAN 6: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.