SAN JUAN 15
15
Yaca si'yu lo'o sta̱' yaca si'yu bi'
1’Na' laca̱ ñi'ya̱ laca sca su̱u̱ yaca nu nda si'yu tyixi, jua'a̱ laca na' ―nacui̱ Jesús ji'i̱ ngu'―. Lo'o ycui' Ndyosi Sti na' laca nu ca ji'i̱ yaca bi'. 2Tso'o tsa ña'a̱si̱i̱ Sti na' ji'i̱ lcaa sta̱' yaca bi', lo'o na' laca̱ yaca bi'. Ca quiya' sta̱' yaca nsi'yu Ni ji'i̱, nu lo'o ná nda si'yu lo tsiya' ti. Nsubii Ni xi lo yaca nu nda si'yu tso'o, cha' tya quiña'a̱ la si'yu tyu'u lo bi'; 3lo'o jua'a̱ cu'ma̱ ni ―nacui̱ Jesús―, cua laca ngusubii na' ji'i̱ ma̱ nu lo'o ngusñi ma̱ cha' nu nchcui' na' lo'o ma̱. 4Cua'ni stu'ba tyiquee ma̱ lo'o na', cha' stu'ba ti nchca tyiquee na' lo'o ma̱. Ndi'ya̱ laca ñi'ya̱ si laca na' sca su̱u̱ yaca, lo'o jua'a̱ cu'ma̱ laca ma̱ sta̱' yaca bi' ―nacui̱―. Pana sca sta̱' yaca si'yu ni, nga'aa ta sta̱' bi' si'yu si si'yu ngu' ji'i̱ ca quiya' sta̱' bi'; sca ti si stu'ba ti caluu sta̱' bi' ñi'ya̱ ntucua ti ji'i̱ su̱u̱ yaca, li' ta sta̱' bi' si'yu ―nacui̱―. Jua'a̱ lo'o cu'ma̱, ná taca tyu'u cha' tso'o ne' cresiya ji'i̱ ma̱ cha' xtyucua ma̱ ji'i̱ xa' ñati̱ si ná stu'ba caca tyiquee ma̱ lo'o na'.
5’Ñi'ya̱ laca su̱u̱ yaca nu nda si'yu tyixi ji'i̱, jua'a̱ laca na' cuentya ji'i̱ ma̱, cha' na' laca̱ su̱u̱ cha' tso'o nu ntsu'u ji'i̱ ma̱ ―nacui̱ Jesús ji'i̱ ngu'―. Ñi'ya̱ laca sta̱' yaca bi', jua'a̱ laca cu'ma̱, si ngusñi ma̱ cha' 'na. Stu'ba ti caca tyiquee ma̱ lo'o na', li' caja quiña'a̱ la cha' tso'o nu tyu'u ne' cresiya ji'i̱ ma̱ su ndi'i̱ ma̱ chalyuu, si laca na' su̱u̱ cha' tso'o ji'i̱ ma̱. Ni sca cha' ná caca ji'i̱ ma̱ si ná stu'ba caca tyiquee ma̱ lo'o na' ―nacui̱ Jesús―. 6Culaya' Sti na' ji'i̱ ñati̱ nu ná stu'ba nchca tyiquee ngu' lo'o na', ñi'ya̱ lo'o nchcua̱a̱ ngu' sta̱' yaca nu cua ndyanaa; nxuti'i̱ montón ngu' sta̱' yaca btyi bi', nsta ngu' ji'i̱ lo quii' cha' tye tyaqui̱ bi'.
7’Nu lo'o stu'ba ti ntsu'u tyiquee ma̱ lo'o na' ―nacui̱ Jesús―, nu lo'o tyanu cha' nu nchcui' na' ne' cresiya ji'i̱ ma̱, li' taca jña ma̱ sca cha' ji'i̱ Sti na', lo'o jua'a̱ ta Ni cha' bi' ji'i̱ ma̱. 8Cua'ni tlyu ngu' ji'i̱ ycui' Ndyosi Sti na', si ña'a̱ ngu' cha' tso'o tsa ndu'ni ma̱ lo'o xa' ñati̱. Li' caca cuayá' ti' xa' ñati̱ cha' ñati̱ nu ndyaca tsa'a̱ 'na laca ma̱ ―nacui̱―. 9Ñi'ya̱ nu ntsu'u tyiquee Sti na' ña'a̱ Ni jna', jua'a̱ ntsu'u tsa tyiquee na' ña'a̱ na' ji'i̱ cu'ma̱. 10Lcaa tsa̱ tyi'u ti' ma̱ su ndi'i̱ ma̱ cha' ntsu'u tsa tyiquee na' ña'a̱ na' ji'i̱ ma̱. Jua'a̱ tso'o tsa caca tyiquee na' ña'a̱ na' ji'i̱ ma̱ si taquiya' ma̱ ji'i̱ lcaa cha' nu nda na' lo'o ma̱. Lo'o jua'a̱ na' ―nacui̱ Jesús― cua ngua'ni na' lcaa cña nu ngulo Sti na' 'na. Jlo ti' na' cha' ntsu'u tsa tyiquee Ni ña'a̱ Ni jna' tyucui su ndi'i̱ na'.
11’Nchcui' na' jua'a̱ lo'o cu'ma̱, cha' lo'o ña'a̱ ma̱ cha' chaa ti' na' ndu'ni na' cña ji'i̱ ycui' Ndyosi Sti na', la cui' jua'a̱ cu'ma̱, ná nga'a̱ cha' tye cha' caca chaa ti' ma̱. 12Nde laca cña nu ta na' ji'i̱ ma̱ ―nacui̱ Jesús―, cha' tso'o ti caca tyiquee ma̱ ña'a̱ ma̱ ji'i̱ tya'a ñati̱ ma̱, ñi'ya̱ ntsu'u tyiquee na' ña'a̱a̱ ji'i̱ ma̱. 13Si jua'a̱ ntsu'u tyiquee na ña'a̱ na ji'i̱ tya'a tso'o na, li' cua'ni lyaá na ji'i̱ ngu' bi', masi cajaa ycui' na; nga'aa ntsu'u xa' cña tlyu la nu caca cua'ni na cha' xtyucua na ji'i̱ tya'a tso'o na. 14Tya'a tso'o na' laca cu'ma̱ si taquiya' ma̱ ji'i̱ cha' nu nda na' lo'o ma̱ ―nacui̱ Jesús―, 15nga'aa ñacui̱ na' cha' msu jna' laca ma̱. Sca msu ti ni, ná jlo ti' yu lcaa cña nu ntsu'u ji'i̱ xu'na yu. Ni na' cha' tya'a tso'o na' laca ma̱, cha' cua ngulu'u na' ji'i̱ ma̱ lcaa cha' nu cua ndyuna na' slo Sti na'. 16Si'i cu'ma̱ nu ngusubi ma̱ 'na cha' tya'a̱ ma̱ lo'o na' ―nacui̱ Jesús―, na' laca̱ nu cua nchcui' na' lo'o ma̱ clyo. Tya li' ngulo na' cña ji'i̱ ma̱ cha' xcui' cha' tso'o tyu'u ne' cresiya ji'i̱ ma̱, cha' jua'a̱ talo cña tso'o nu ndu'ni ma̱; li' cua'ni Sti na' lcaa cha' nu jña ma̱ ji'i̱ Ni chacuayá' 'na. 17Bi' cha' juani ndulo tsa cña re ji'i̱ ma̱ cha' cua'ni ma̱: cha' tso'o tsa caca tyiquee ma̱ ña'a̱ ma̱ ji'i̱ tya'a ñati̱ ma̱.
Na lya' ti' ñati̱ chalyuu ji'i̱ Jesús lo'o jua'a̱ ji'i̱ ñati̱ ji'i̱
18Tya nchcui' la Jesús lo'o nu ngu' nu ndyaca tsa'a̱ ji'i̱ li':
―Chañi cha' ntsu'u quiya' liye' ti ti' tya'a ñati̱ ma̱ ji'i̱ ma̱. Ná cube tsa ti' ma̱ li', cua jlo ti' ma̱ cha' tya clyo la jua'a̱ ngua'ni liye' ti' ngu' jna' ―nacui̱ Jesús―. 19Si cua'ni ma̱ ñi'ya̱ nu ndu'ni ñati̱ cuxi nde chalyuu, li' chcui' tso'o ngu' lo'o ma̱, ñi'ya̱ si laca ma̱ tya'a ngu'. Pana juani nga'aa ntsu'u cha' ji'i̱ ma̱ lo'o cha' cuxi nu ntsu'u nde chalyuu, cha' cua ngusubi na' ji'i̱ ma̱ cha' caca ma̱ ñati̱ 'na; bi' cha' liye' tsa ti' ngu' ña'a̱ ngu' ji'i̱ ma̱ ―nacui̱―. 20Tyi'u ti' ma̱ cha' nu nchcui' na' lo'o ma̱ tsubi': “Nu laca loo laca nu nclyo cña, si'i ngu' msu ti”. Ñi'ya̱ ndu'ni lya' ti' ngu' jna', jua'a̱ cua'ni lya' ti' ngu' ji'i̱ ma̱. Ná ndaquiya' ngu' ji'i̱ cha' nu ngulu'u na' ji'i̱ ngu', la cui' jua'a̱ ná taquiya' ngu' ji'i̱ cha' nu chcui' cu'ma̱ lo'o ngu' bi'. 21Jua'a̱ cua'ni ngu' lo'o cu'ma̱ xqui'ya na' ―nacui̱ Jesús―, cha' ná nslo ngu' tilaca laca nu nda 'na lijya̱a̱ nde chalyuu.
22’Ná ntsu'u qui'ya ji'i̱ ngu' bi' lo'o bilya ca̱a̱ na' chcui' na' lo'o ngu'; pana juani ni, nga'aa cua'ni clyu ti' ycui' Ndyosi ji'i̱ ngu' bi' ji'i̱ cha' cuxi nu ndu'ni ngu'. 23Nu lo'o liye' ti' ngu' ña'a̱ ngu' jna', jua'a̱ ji'i̱ ycui' Ndyosi Sti na' liye' ti' ngu' ña'a̱ ngu' ji'i̱ Ni ―nacui̱ Jesús―. 24Ná ntsu'u qui'ya ji'i̱ ngu' bi' clyo, pana juani ni, cua nguti'i̱ na' slo ngu' bi', cua ngua'ni na' cña nu ná caca ji'i̱ xa' ñati̱ cua'ni; cua na'a̱ ngu' lcaa ña'a̱ cña tonu nu ngua'ni na', bi' cha' liye' ti' ngu' ña'a̱ ngu' jna'. Lo'o jua'a̱ ji'i̱ Sti na' liye' ti' ngu' ña'a̱ ngu' ji'i̱ Ni, bi' cha' cua ndyanu yabe' hichu̱' ngu' bi' ―nacui̱ Jesús―. 25Nga'a̱ cha' caca cha' jua'a̱, cha' nu nscua lo quityi cusu' ji'i̱ ngu' bi'; ndi'ya̱ nchcui' cha' bi': “Liye' ti' ngu' ña'a̱ ngu' jna', masi ná ntsu'u su̱u̱ cha' ji'i̱ ngu' cha' cua'ni ngu' jua'a̱”.
26’Cua'ni na' cha' ca̱a̱ nu laca Xtyi'i ycui' Ni lo yuu, Xtyi'i nu ndu'u slo ycui' Ndyosi ―nacui̱ Jesús―. Bi' laca nu culu'u ji'i̱ ma̱ lcaa cha' nu liñi ca, bi' laca nu xtyucua ji'i̱ ma̱ lcaa tyempo chacuayá' 'na. Nu lo'o ca̱a̱ nu bi' lo yuu, li' culu'u Ni lcaa cha' liñi nu ntsu'u 'na ji'i̱ ma̱ ―nacui̱ Jesús―. 27Lo'o cu'ma̱ ni, cua nguti'i̱ ma̱ lo'o na' tya clyo, bi' cha' taca ji'i̱ ma̱ chcui' liñi ma̱ cha' jna' lo'o xa' ñati̱.
Currently Selected:
SAN JUAN 15: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.