SAN JUAN 1
CTA

SAN JUAN 1

1
Ngua nu sca ti Sñi' ycui' Ndyosi ñati̱
1Nu ngua tya clyo la ndi'i̱ ycui' Ndyosi, lo'o jua'a̱ ndi'i̱ yu nu laca tyucui cha' ji'i̱ ycui' Ndyosi; nguti'i̱ yu bi' lo'o ycui' Ndyosi. Nu yu nu laca cha' bi', stu'ba ntsu'u cha' ji'i̱ yu lo'o ycui' Ndyosi. 2Stu'ba ti nguti'i̱ yu bi' lo'o ycui' Ndyosi nu ngua tya clyo la. 3Lo'o yu bi' ngüiñá Ni lcaa lo na; ni sca na nu ntsu'u chalyuu, ná ngüiñá Ni ji'i̱ si ná lo'o yu bi'. 4Ca slo ycui' Ndyosi ndu'u yu bi' ya̱a̱ cha' caca tso'o cresiya ji'i̱ ñati̱ chalyuu na. Ngua'ni yu cha' caca cuayá' ti' na lcaa cha' liñi, xqui'ya xee nu ta Ni cha' tyanu ne' cresiya ji'na. 5Ña'a̱ ti tya ntyiji'i̱ xee bi' su talya nu ntsu'u ne' cresiya ji'i̱ ngu' cuxi, cha' ná caca ji'i̱ ngu' cuxi xubi' xee bi'.
6-7Nda ycui' Ni ji'i̱ Juan cha' chcui' lo'o ñati̱ cha' ji'i̱ xee nu cua ta ti Ni cha' tyu'ú ne' cresiya ji'i̱ ñati̱. Cua ya̱a̱ Juan cha' ta cha' bi' lo'o ñati̱, cha' xñi lcaa ñati̱ cha' ji'i̱ ycui' Ndyosi xqui'ya cha' nu nchcui' Juan lo'o ngu'. 8Si'i nu xee nu nda ycui' Ndyosi laca ycui' Juan, na ya̱a̱ ti Juan cha' culu'u cha' bi' ji'i̱ ñati̱. 9Nu laca xee nu chañi ca, cua lijya̱ yu bi' lo yuu cha' ta xee nu caca tyu'ú ne' cresiya ji'i̱ cua ña'a̱ ca ñati̱.
10Ndi'i̱ yu bi' lo yuu, la cui' ti cha' nu cua nda ycui' Ni lo'o ñati̱. Lo'o yu bi' ngüiñá Ni chalyuu, pana ná ndyuloo ñati̱ chalyuu ji'i̱ yu bi' li'. 11Ya̱a̱ yu bi' chalyuu su laca tyi nquicha', lo'o jua'a̱ ñati̱ chalyuu nu ngüiñá yu, ná ndyuloo ngu' ji'i̱ yu. 12Pana ndi'i̱ xi ñati̱ nu cua ngusñi cha' ji'i̱ yu, jlya ti' ngu' bi' ji'i̱ yu li'; ji'i̱ ñati̱ bi' nda Ni chacuayá' cha' caca ngu' bi' sñi' ycui' Ndyosi. 13Lo'o ñati̱ nu laca sñi' ycui' Ndyosi ni, ná nclya ngu' bi' ñi'ya̱ nu nclya scaa sñi' ñati̱; sñi' ycui' Ndyosi laca ngu' bi', si'i sca ñati̱ chalyuu laca nu ndu'ni cucui cresiya ji'i̱ ngu' bi'.
14Ngua yu bi' ñati̱, la cui' yu nu laca cha' ji'i̱ ycui' Ndyosi. Stu'ba ti nguti'i̱ yu lo'o na nde chalyuu. Cua na'a̱ ya ji'i̱ yu cha' tlyu tsa cha' ntsu'u ji'i̱ yu, cha' laca yu nu sca ti Sñi' ycui' Ndyosi. Xcui' tso'o tsa ndu'ni yu lo'o na, xcui' cha' liñi nchcui' yu. 15Nde laca cha' nu nchcui' Juan cha' ji'i̱ nu Jesús bi'. Cui̱i̱ nchcui' Juan li':
―Nu nde laca nu qui'yu nu ni na' ji'i̱ ma̱ cha' tyu'u tucua tiya' la nde chalyuu ―nacui̱ Juan―, masi tlyu la cha' ntsu'u ji'i̱ ycui' yu que na'. Jua'a̱ ni na' ji'i̱ ma̱, cha' nu lo'o bilya cala na' cua lu'ú ycui' yu.
16Lcaa na tsiya' ti ntsu'u ji'i̱ Jesús, lo'o lcaa tsa̱ ndyiji cha' tso'o ji'na xqui'ya Jesús. 17Cua sa'ni nda jyo'o Moisés cha' lo'o ñati̱, lcaa ña'a̱ cña nu ntsu'u cha' cua'ni ñati̱ cuentya ji'i̱ ycui' Ndyosi. Pana nu lo'o ya̱a̱ Jesucristo ni, xa' ña'a̱ ngua'ni Ni; nda tsa Ni cha' xlya'be ji'na, ngulu'u Ni cha' liñi ji'na li'. 18Ni sca ñati̱ ná na'a̱ ngu' ji'i̱ ycui' Ndyosi; sca ti Jesús nu ngulu'u ji'na ñati̱ chalyuu na ñi'ya̱ laca ycui' Ndyosi. Lo'o nu Jesús bi' ni, laca yu nu sca ti Sñi' ycui' Ndyosi, nu tyaca'a tsa ji'i̱ Ni.
Nchcuane ngu' judío ji'i̱ Juan Bautista: “¿Tilaca laca nu'u̱?”
19Nda Juan cha' lo'o tyu̱u̱ tya'a sti jo'ó lo'o ngu' xirta; ngutu'u ngu' nde quichi̱ Jerusalén, ndyalaa ngu' su ndi'i̱ nu Juan bi' li'. Cua ngulo ngu' judío nu ndi'i̱ ca bi' cña ji'i̱ ngu' bi', cha' ca̱a̱ ngu' slo Juan cha' xcuane ngu' ji'i̱ Juan tilaca laca. 20Ná ntyuju'u ti' Juan; liñi nda cha' lo'o ngu' cha' si'i ycui' laca Cristo, nu ñati̱ tlyu nu nda Ni ji'i̱ cha' ca̱a̱ nde chalyuu.
21―¿Tilaca laca nu'u̱ lacua? ―nacui̱ ngu'―. ¿Ha jyo'o Elías laca nu'u̱?
―Si'i bi' laca na' ―nacui̱ Juan.
―Cua tyu'u tucua ti sca nu cusu' nu chcui' cha' ji'i̱ ycui' Ndyosi lo'o ya, nti' ya ―nacui̱ ngu'―. ¿Ha si'i nu bi' laca nu'u̱?
―Si'i na' ―nacui̱ Juan li'.
22―¿Tilaca ta laca nu'u̱? ―nacui̱ ngu'―. Ntsu'u cha' xacui̱ ya cha' ji'i̱ ñati̱ nu ngulo cña ji'i̱ ya cha' ca̱a̱ ya ca nde. ¿Ñi'ya̱ cha' nchcui' ta nu'u̱ cha' ji'i̱ ycui' ca?
23Li' nguxacui̱ Juan cha' ji'i̱ ngu' bi':
―Ndi'ya̱ cha' ndu'ni na' lo'o cui̱i̱ nchcui' na' nda na' cha' lo'o ñati̱ su ndu̱ na' ne' quixi̱': “Xquiñi clya ma̱ tyucui̱i̱ su ca̱a̱ nu Xu'na na”. Bi' laca sca cha' ji'i̱ ycui' Ndyosi nu cua nchcui' jyo'o Isaías lo'o ngu' sa'ni.
24Lo'o xi ngu' fariseo nguti'i̱ laja ngu' nu ya̱a̱ slo Juan. Tacati tsa ndu'ni ngu' bi'. 25Nchcui' ngu' bi' lo'o Juan li':
―¿Ni cha' laca ndu̱ nu'u̱ ntyucuatya nu'u̱ ji'i̱ ngu' si si'i nu ñati̱ tlyu bi' laca nu'u̱, si si'i jyo'o Elías laca nu'u̱, si si'i nu cusu' nu chcui' cha' ji'i̱ ycui' Ndyosi laca nu'u̱?
26―Lo'o hitya ti ntyucuatya na' ji'i̱ ngu' ―nacui̱ Juan―. Pana ndu̱ chaca ñati̱ slo cu'ma̱ juani, masi ná nslo ma̱ ji'i̱ yu bi'. Tiya' la ya̱a̱ nu ndu̱ bi' nde chalyuu, na' ngula̱ yala la; pana tlyu la cha' nu ntsu'u ji'i̱ ycui', sube la cha' jna' ―nacui̱ Juan ji'i̱ ngu'―. 27Tso'o tsa cña ngujui 'na nti' na' ―nacui̱―, masi caña nu ntsu'u quiya' ñati̱ bi' sati̱' na' juata.
28Jua'a̱ ngua nde loyuu su cuentya Betábara, ca su ndu̱ Juan ntyucuatya ji'i̱ ngu'. Nde chaca tsu' sta'a̱ Jordán ntsu'u Betábara bi'.
Nu msta̱ lu'ú cha' cuityi̱ qui'ya nu ntsu'u ji'i̱ ñati̱
29Ca chaca tsa̱ na'a̱ Juan cha' cua lijya̱ ti Jesús slo. Lo'o li' nacui̱ Juan ji'i̱ ñati̱ nu ndu̱ slo:
―Ña'a̱ tso'o ma̱ ji'i̱ nu cusu' cua ―nacui̱―. Cua ngusubi ycui' Ndyosi ji'i̱ nu cua cha' caca yu sca msta̱ lu'ú, cha' cuityi̱ lcaa qui'ya nu ntsu'u ji'i̱ ñati̱ chalyuu ―nacui̱―. 30Cha' ji'i̱ yu bi' nchcui' na', nu lo'o ni na' ji'i̱ ma̱ cha' cua tyu'u tucua ti sca ñati̱ loyuu re. Tlyu la cha' ji'i̱ yu bi' que na', masi tiya' la ndu'u tucua bi'. Jua'a̱ ni na' ji'i̱ ma̱ cha' nu lo'o tya lyiji cala na', cua lu'ú yu bi'. 31Lo'o na' ni, ná ndyuloo na' ji'i̱ ycui' yu bi'; pana cua ya̱a̱ na' ntyucuatya na' ji'i̱ ñati̱ lo'o hitya ti cha' caca tyuloo ngu' Israel ji'i̱ yu bi'.
32Chaca quiya' tso'o tsa nchcui' Juan cha' ji'i̱ Jesús lo'o ngu':
―Cua na'a̱ na' lo'o ngutu'u Xtyi'i ycui' Ndyosi nde cua̱ ya̱a̱ ngua'ya lo Jesús ñi'ya̱ nda'ya sca paloma ―nacui̱―. 33Ná ndyuloo na' ji'i̱ Jesús clyo, pana ycui' Ndyosi laca nu ndacha' cha' bi' 'na, ycui' Ndyosi laca nu ngulo cña jna' cha' tyucuatya̱ ji'i̱ ngu'. Ndi'ya̱ nchcui' Ni lo'o na': “Lo'o ña'a̱ nu'u̱ cha' lijya̱ nda'ya Xtyi'i ycui' Na' lo sca ñati̱”, nacui̱ Ni, “li' caca cuayá' ti' nu'u̱ cha' yu bi' laca nu tyucuatya ji'i̱ ngu' lo'o Xtyi'i ycui' Na', nga'aa si'i lo'o hitya ti”. 34Ycui' ti na' cua na'a̱ na' ji'i̱ cha' bi'. Chañi cha' nu nchcui' na' lo'o cu'ma̱, cha' yu bi' laca nu sca ti Sñi' ycui' Ndyosi; na cua ngusubi Ni ji'i̱ yu bi'.
Ñati̱ nu ndyaca tsa'a̱ ji'i̱ Jesús nu ngua clyo
35Ngua chaca tsa̱, xa' ndu̱ Juan, ndu̱ lo'o tucua tya'a ngu' nu ndyaca tsa'a̱ ji'i̱; ya̱a̱ Jesús li'. 36Na'a̱ Juan ji'i̱ yu, lo'o li' nchcui' Juan cha' ji'i̱ Jesús:
―Nu cua caca msta̱ lu'ú nu cua ngusubi ycui' Ndyosi ji'i̱ cha' cajaa yu xqui'ya na.
37Lo'o ndyuna nu tucua tya'a ngu' bi' cha' nu nacui̱ Juan, li' ndyaa lca'a̱ ngu' bi' ji'i̱ Jesús. 38Nguxtyacui Jesús tyucui̱i̱ su ya̱a̱, na'a̱ yu cha' lca'a̱ ngu' bi' ji'i̱. Li' nchcuane Jesús ji'i̱ ngu':
―¿Na laca tsaana cu'ma̱?
―Mstru ―nacui̱ ngu' ji'i̱ Jesús―, ¿macala ndi'i̱ nu'u̱?
―Ca̱a̱ na'a̱ ma̱ xi 'na ―nacui̱ Jesús li'.
39Bi' cha' ndyaa ngu' ni'i̱ ca su ndyalaa Jesús, ndyaa chcui' ngu' lo'o yu. Ngua hora cua jacua nde ngusi̱i̱ lo'o ndyalaa ngu' ca bi', lo'o li' ndyanu ngu' lo'o yu tyucui nde ngusi̱i̱.
40Ngua tucua tya'a ñati̱ nu ngutu'u lca'a̱ ji'i̱ Jesús li', nu lo'o cua ndyuna ngu' cha' nu nchcui' Juan lo'o ngu'. Tsaca yu bi' nu naa Andrés, tya'a ngula Simón Pedro laca. 41Hora ti ndyaa Andrés ndyaana ji'i̱ tya'a, la cui' nu Simón bi'. Li' nchcui' Andrés lo'o:
―Cua nquijeloo ji'i̱ ya ñi'ya̱ nu laca Cristo, nu ñati̱ tlyu nu nda Ni ji'i̱ lijya̱ nde chalyuu ―nacui̱.
42Lo'o li' ndyaa lo'o ji'i̱ Simón ca slo Jesús. Ña'a̱ tsa Jesús ji'i̱ Simón bi', ndi'ya̱ nacui̱ yu ji'i̱ li':
―Simón naa nu'u̱ ―nacui̱―, sñi' Jonás laca nu'u̱; pana Cefas ca naa nu'u̱ nde loo la ―ñi'ya̱ nti' na chcui' na cha'cña ji'na: sca quee; stu'ba ti ndyu'u cha' bi' lo'o Pedro.
Ngusi'ya Jesús ji'i̱ Felipe lo'o ji'i̱ Natanael
43Ca chaca tsa̱, li' ngua ti' Jesús tyaa yu nde Galilea. Li' ndyacua tya'a yu lo'o sca nu qui'yu nu naa Felipe:
―Ya'a nu'u̱ lo'o na' ―nacui̱ Jesús ji'i̱ Felipe li'.
44La cui' ngu' Galilea laca Felipe bi', jua'a̱ laca Andrés lo'o Pedro; quichi̱ Betsaida laca quichi̱ tyi ngu'.
45Li' ndyaa Felipe cha' chcui' lo'o Natanael tya'a ndya'a̱ nu Felipe bi':
―Cua na'a̱ ya ji'i̱ Cristo, nu ñati̱ tlyu nu cua sa'ni nguscua jyo'o Moisés cha' ji'i̱ lo quityi ji'i̱ ycui' Ndyosi ―nacui̱ Felipe―. La cui' cha' ji'i̱ yu bi' cua nchcui' lcaa jyo'o cusu' nu ngua tu'ba ji'i̱ ycui' Ndyosi sa'ni. Jesús naa yu bi', sñi' sca nu naa José. Nazaret laca quichi̱ tyi yu.
46―¿Ha tso'o quichi̱ bi'? ―nacui̱ Natanael―. ¿Ha ntsu'u ñati̱ tso'o nde quichi̱ Nazaret bi'?
―Yaa na'a̱ nu'u̱ xi ji'i̱ lacua ―nacui̱ Felipe.
47Lo'o na'a̱ Jesús cha' lijya̱ Natanael slo, li' nacui̱:
―Nde cua lijya̱ sca ngu' Israel nu chañi cha' ndyu'ni tlyu ji'i̱ ycui' Ndyosi. Ná ntsu'u cha' cuiñi ji'i̱ yu jua tsiya' ti.
48Nchcuane Natanael ji'i̱ Jesús li':
―¿Ñi'ya̱ ngua jinu'u̱, cusu', cha' ndyuloo nu'u̱ jna'?
Li' nacui̱ Jesús:
―Lo'o tya lyiji chcui' Felipe lo'o nu'u̱, tya li' na'a̱ na' jinu'u̱ ca su ndu̱ ne' yaca quityi ca bi'.
49―Mstru ―nacui̱ Natanael―, chañi cha' nu'u̱ laca nu sca ti Sñi' ycui' Ndyosi, nu'u̱ laca Rey nu laca loo ji'i̱ ngu' Israel.
50Lo'o li' nguxacui̱ Jesús cha' ji'i̱ Natanael:
―¿Ha bi' cha' jlya ti' nu'u̱ jna' ―nacui̱ yu―, xqui'ya cha' cua nchcui' na' lo'o nu'u̱ cha' cua na'a̱ na' jinu'u̱ ca ne' yaca quityi bi'? ―nacui̱―. Cha' xca ti laca bi', tonu la cha' ña'a̱ nu'u̱ nde loo la.
51Lo'o li' nacui̱ Jesús ji'i̱ ngu':
―Ta na' sca cha' liñi lo'o ma̱ juani ―nacui̱ yu―. Nde loo la ña'a̱ ma̱ cha' tyucua yaala ca su ntucua ycui' Ndyosi nde cua̱. Li' caca cuayá' ti' ma̱ cha' cua nda Ni 'na lijya̱a̱ cha' caca na' ñati̱ chalyuu. Lo'o ca su tyu̱ na' bi', ca bi' ña'a̱ ma̱ ji'i̱ ngu' xca̱ nu ndi'i̱ slo ycui' Ndyosi; tya'a̱ ngu' bi', tyacui̱ ngu' bi' nde cua̱, ca'ya ngu' bi' nde su tyu̱ na'.

© 1981, Wycliffe Bible Translators, Inc. All rights reserved.


Learn More About Chatino, Tataltepec

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.