SAN LUCAS 24
24
Ndyu'ú Jesús chaca quiya'
1Nu lo'o cua quixee ti tsa̱ clyo ji'i̱ semana bi', tlya tsa ndyaa nu ngu' cuna'a̱ bi' to' cuaá su nguatsi' jyo'o Jesús. Ndyi'ya ngu' hitya tyixi xtyi'i nu cua ngua'ni cho'o ngu'. Lo'o xa' nu cuna'a̱ ndyaa ngu' lo'o. 2Ngulaa ngu' to' cuaá, li' na'a̱ ngu' quee nu ndyacu̱' to' cuaá bi', cha' nga'aa ntsiya quee bi' to' cuaá; ntucua yaala ti cuaá bi'. 3Li' ndyatí̱ ngu' ne' cuaá cha' ña'a̱ ngu', pana nga'aa ntsiya jyo'o Jesús. 4Ndyutsi̱i̱ tsa ngu' li', nga'aa jlo ti' ngu' ñi'ya̱ nu cua'ni ngu'. Li' na'a̱ ngu' cha' ndu̱ tucua tya'a nu qui'yu slo ngu'; ndubi tsa ña'a̱ late' lacu' nu ngu' qui'yu bi'. 5Ntyucua tii ti'i̱ ngu' li', ndyaca'a̱ ngu' lyuu cha' ndyutsi̱i̱ tsa ngu' ji'i̱ nu ngu' qui'yu bi'. Lo'o li' nchcui' ngu' qui'yu bi' lo'o ngu':
―¿Ni cha' laca nclyana ma̱ ji'i̱ sca nu lu'ú laja ngu' jyo'o re? ―nacui̱ ngu'―. 6Nga'aa ntsiya yu bi' ca nde, cha' cua ndyu'ú yu chaca quiya'. Tyi'u ti' ma̱ ñi'ya̱ nu nacui̱ yu ji'i̱ ma̱ lo'o tya ndi'i̱ ma̱ ca Galilea. 7Cua nacui̱ yu cha' ycui' nu lijya̱ cha' caca yu ñati̱ ni, nga'a̱ cha' ta ngu' ji'i̱ yu ya' ngu' xña'a̱, cha' cujui'i̱ ca'a̱ ngu' ji'i̱ yu lo crusi. Lo'o chu̱' sna tsa̱, li' tyu'ú yu chaca quiya' nacui̱ yu.
8Li' ndyi'u ti' ngu' cuna'a̱ bi' lcaa cha' nu nda Jesús lo'o ngu' tya tsubi' la cuentya ji'i̱ ycui' yu. 9Nguxtyu̱u̱ ngu' ñaa ngu' nde quichi̱, ndyalaa ngu' slo nu tii chaca tya'a ngu' nu ngua tsa'a̱ ji'i̱ Jesús. Li' ndacha' ngu' cuna'a̱ bi' lcaa cha' bi' ji'i̱ ngu', lo'o jua'a̱ lcaa ngu' nu nguta'a̱ lo'o Jesús ndyuna ngu' cha' bi' li'. 10Ndi'ya̱ naa ngu' cuna'a̱ nu ndyaa to' cuaá bi': ndyaa María Magdalena, cuati Juana, lo'o María xtya'a̱ Jacobo, lo'o xi xa' la ngu' cuna'a̱. 11Pana si'i jua'a̱ ngua, ngua ti' ngu' nu ngua tsa'a̱ bi'; na nguichi̱ tsa cha' hique ngu' cuna'a̱ bi', ngua ti' ngu'. Ná jlya ti' ngu' cha' nu nda ngu' cuna'a̱ bi' lo'o ngu' tsiya' ti.
12Sca ti Pedro, hora ti ngusna ndyaa to' cuaá bi'. Chacua' na'a̱ Pedro ne' cuaá bi', cha' ntsiya ti tasá nu ngüixi̱i̱ hichu̱' jyo'o Jesús nquicha', na'a̱ cha' chaca se'i̱ nde la'a ti ntsiya late' bi'; lo'o li' ngutu'u Pedro ñaa nde toni'i̱, ngulacua tsa ti' na laca ngua cha' ndyaa jyo'o bi'.
Su ndyaa ngu' tyucui̱i̱ nde Emaús
13La cui' tsa̱ bi' ndu'u ndyaa tucua tya'a ngu' nde quichi̱ Emaús. Quichi̱ bi' ntsu'u tii chaca kilómetro cuayá' tyijyu' ji'i̱ Jerusalén. 14Ndya'a̱ ti ngu' tyucui̱i̱, nchcui' tsa ngu' lo'o tya'a ngu' ji'i̱ lcaa cha' nu ngua bi'. 15Tya nchcui' tube ngu' ji'i̱ cha' bi', lo'o li' ndyalaa ycui' Jesús slo ngu', stu'ba ti ndya'a̱ yu lo'o ngu'. 16Masi na'a̱ ngu' xi ji'i̱ Jesús, pana ná ngua tyuloo tso'o ngu' ji'i̱ yu, cha' ntsu'u sca cha' nu ngua'a ji'i̱ ngu'. 17Li' nchcuane Jesús ji'i̱ ngu':
―¿Ni cha' nchcui' tube cu'ma̱ lo'o lijya̱ ma̱ tyucui̱i̱ re? ¿Ni cha' laca xñi'i̱ ti' ma̱? ―nacui̱ Jesús ji'i̱ ngu'.
Se'i̱ ti ndyatu̱ ngu', 18lo'o li' nguxacui̱ tsaca nu naa Cleofas cha' ji'i̱ Jesús:
―Tyucui ña'a̱ chalyuu cua jlo ti' ngu' na laca nu ngua nde Jerusalén tsa̱ nu nteje tacui ca ti. ¿Ha sca ti nu'u̱ nu ná jlo ti' na laca nu ngua nde Jerusalén bi'? Jlo ti' lcaa ngu' xa' quichi̱ nu ñaa ta'a.
19―¿Na laca ngua? ―nacui̱ Jesús ji'i̱ ngu'.
Li' nguxacui̱ ngu' cha' ji'i̱ yu:
―Cha' ji'i̱ Jesús Nazaret ―nacui̱ ngu'―, tu'ba ji'i̱ ycui' Ndyosi ngua yu bi' nchcui' Ni lo'o ñati̱. Ngua tsa ji'i̱ cha' tu'ba, lo'o jua'a̱ ngua tsa ji'i̱ ngua'ni quiña'a̱ tsa cha' tlyu cuentya ji'i̱ ycui' Ndyosi; jua'a̱ quiña'a̱ tsa ñati̱ na'a̱ ji'i̱ cha' tlyu bi'. 20Li' nu ngu' sti jo'ó nu laca loo lo'o ngu' nu laca cña, nda ngu' ji'i̱ yu ndyaa cha' cujuii ngu' ji'i̱ yu lo crusi. 21Cua sna tsa̱ nteje tacui nu ngua cha' bi'. Lo'o cuare ni, jlya tsa ti' ya ji'i̱ yu nquicha', cha' bi' laca nu cua'ni lyaá ji'i̱ ngu' Israel tya'a na, cha' nga'aa caca loo ngu' xa' tsu' ji'na, cha' tyi'i̱ tso'o ti na loyuu quichi̱ tyi na, ngua ti' ya. 22Pana juani nchcutsi̱i̱ xi ngu' cuna'a̱ tya'a ndya'a̱ ya ji'i̱ ya, cha' tlya tsa juani ndyaa ngu' cuna'a̱ bi' to' cuaá, 23lo'o nga'aa nquije jyo'o Jesús bi' ji'i̱ ngu'. Ñaa ngu' li', nda ngu' cha' lo'o ya cha' cua na'a̱ ngu' sca cha' tlyu. Na ngulu'uloo ti tucua tya'a xca̱ ji'i̱ ycui' Ndyosi ji'i̱ ngu' ngua ti' nu ngu' cuna'a̱ bi'; nacui̱ xca̱ bi' ji'i̱ ngu' cha' lu'ú Jesús juani. 24Lo'o ti ndyaa xi ngu' tya'a ngua tsa'a̱ cua to' cuaá li'. Lo'o li' na'a̱ ngu' ji'i̱ xca̱ bi' ñi'ya̱ nu nacui̱ ngu' cuna'a̱ bi' ji'i̱ ya, pana ná na'a̱ ngu' ji'i̱ ycui' Jesús.
25Li' nchcui' Jesús lo'o nu ngu' nu tya'a ndyaa yu tyucui̱i̱:
―Lyiji tsa cha' ji'i̱ cu'ma̱ cha' ca cuayá' ti' ma̱ scaa cha'; tiya' tsa nxñi ma̱ lcaa cha' nu nda ngu' jyo'o nu ngua tu'ba ji'i̱ ycui' Ndyosi sa'ni la. 26¿Ha si'i na cua ntsu'u cha' chcube' nu laca Cristo bi' ñi'ya̱ nu ngua juani? Tiya' la li' tyalaa Cristo su tso'o tsa ña'a̱ su tyucua ycui' li'.
27Li' nguxana Jesús ngulu'u yu cha' ji'i̱ ngu', ña'a̱ cha' nu cua nscua lo quityi cusu' cha' ji'i̱ ycui' yu. Nguxana ngu' lo'o quityi nu nguscua jyo'o Moisés, lo'o li' nchcui' ngu' lo lcaa quityi nu nguscua ngu' nu ngua tu'ba ji'i̱ ycui' Ndyosi nu ngua sa'ni.
28Cua tyalaa ti ngu' ca quichi̱ su tsaa ngu', li' ngua'ni Jesús ñi'ya̱ si na tya tsaa la yu tyucui̱i̱ tyijyu' la. 29Pana ndatsaa tsa ngu' ji'i̱ yu cha' tyanu yu slo ngu'. Nacui̱ ngu' ji'i̱ yu:
―Tyanu nu'u̱ lo'o cua cha' cua ngusi̱i̱ tsa juani, cua ca talya ti.
Li' ndyatí̱ Jesús ndyaa ni'i̱ cha' tyanu yu lo'o ngu'. 30Pana nu lo'o cua nga'a̱ yu lo'o ngu' to' mesa, li' ngusñi yu sca xlyá, ndya yu xlya'be ji'i̱ ycui' Ndyosi; lo'o li' ngusa'be yu xlyá bi', cha' ta yu ji'i̱ ngu'. 31Bi' hora laca nu ndyaala cloo ngu', cha' ndyuloo tso'o ngu' ji'i̱ yu. Li' nguliji yu'u yu slo ngu', nga'aa na'a̱ ngu' ji'i̱ yu li'. 32Hora ti nacui̱ tsaca ji'i̱ tya'a:
―¿Ha ná chañi cha' tso'o tsa ngua ti' na? ―nacui̱―. Ti̱ ti nguti'i̱ cresiya ji'na lo'o lijya̱ ycui' nchcui' lo'o na tyucui̱i̱, nu lo'o nda yu cha' lo'o na, ñi'ya̱ nu nchcui' quityi cusu' ―nacui̱ ji'i̱ tya'a.
33Li' xtyi'i ti ndyanu ngu', hora ti ngusñi ngu' tyucui̱i̱ nguxtyu̱u̱ ngu' ñaa ngu' nde Jerusalén chaca quiya'. Ca bi' ndyalaa ngu' ca su ndyu'u ti'i̱ nu tii chaca tya'a ngu' nu ngua tsa'a̱ ji'i̱ Jesús bi', lo'o xi xa' la tya'a ndya'a̱ ngu' ndi'i̱ ngu' bi'. 34Hora ti nchcui' ngu' nu nga'a̱ ni'i̱ bi' lo'o ngu' nu ndyalaa ca ti li':
―Chañi cha' cua ndyu'ú Jesús chaca quiya' ―nacui̱ ngu'―. Cua na'a̱ Simón ji'i̱ yu.
35Lo'o nu ngu' nu ndyaa nde Emaús ni, nda ngu' cha' lo'o tya'a ngu' ñi'ya̱ nu ngua ji'i̱ ngu' tyucui̱i̱; nacui̱ ngu' ñi'ya̱ ngua cha' ndyuloo ngu' ji'i̱ ycui' Jesús nu lo'o ngulacua̱ yu ji'i̱ xlyá bi'.
Ngulu'uloo Jesús ji'i̱ ngu' nu ndyaca tsa'a̱ ji'i̱ yu
36Tya nchcui' ti ngu' ji'i̱ cha' bi' lo'o tya'a ngu', lo'o li' ñaa ycui' Jesús. Ndatu̱ yu cla'be laja ngu' cha' chcui' yu lo'o ngu':
―Ti̱ ti tyi'i̱ tyiquee ma̱ ―nacui̱ yu ji'i̱ ngu' bi' li'.
37Ntsi̱i̱ tya ngu' ndi'i̱ ngu' li', nclyacua tsa ti' ngu', cha' sca cui'i̱ ti na'a̱ ngu', nti' ngu'. 38Li' nchcui' Jesús lo'o ngu' bi':
―¿Ni cha' laca ntsi̱i̱ ma̱ ndi'i̱ ma̱? ―nacui̱―. ¿Ni cha' laca nclyacua tsa ti' ma̱? ―nacui̱ yu ji'i̱ ngu'―. 39Ña'a̱ ma̱ ya' na', ña'a̱ ma̱ quiya' na'; la cui' ti na' laca̱. Cala' ma̱ 'na, cha' taca jlya ti' ma̱ cha' na' laca̱. Sca cui'i̱ ti ni, ná ntsu'u cuaña' ji'i̱, lo'o jua'a̱ tyijya̱ ná ntsu'u ji'i̱; pana cua na'a̱ ma̱ cha' ntsu'u cuaña' 'na ―nacui̱ Jesús ji'i̱ ngu'.
40Li' ngulu'u ya' ycui' yu, ngulu'u quiya' yu ji'i̱ ngu'. 41Ná ngua tyuloo tso'o ngu' ji'i̱ yu xqui'ya cha' chaa tsa ti' ngu' ngua, cha' ndube tsa ti' ngu' ña'a̱ ngu' ji'i̱ yu. Bi' cha' nacui̱ Jesús ji'i̱ ngu':
―¿Ha ntsu'u na cacu na' ji'i̱ ma̱?
42Li' nda ngu' sa yu'be cualya ngüi'i ji'i̱ yu, lo'o sa yu'be jble' cuiñaa' cuityu̱.
43―Tso'o ―nacui̱ Jesús li'.
Ngusñi yu ji'i̱ na bi', ndyacu yu ji'i̱ nde slo ngu' li'. 44Lo'o ti nchcui' yu lo'o ngu' li':
―Cha' nu ngua ca ti 'na, bi' laca cha' nu cua ndacha' na' ji'i̱ ma̱ lo'o tya ndi'i̱ na' lo'o cu'ma̱ tya tsubi' la ―nacui̱ yu―. Cua nacui̱ na' ji'i̱ ma̱ cha' nga'a̱ cha' caca 'na lcaa cha' nu cua nscua cuentya 'na lo quityi nu nguscua jyo'o Moisés, lo'o jua'a̱ lo quityi nu nguscua jyo'o ngu' nu ngua tu'ba ji'i̱ ycui' Ndyosi nu ngua sa'ni, lo'o jua'a̱ lo quityi Salmos nscua cha' bi'.
45Li' ngulu'u Jesús ji'i̱ ngu' ña'a̱ cha' nu nchcui' quityi cusu' bi'. 46Nacui̱ yu ji'i̱ ngu':
―Cua sa'ni nscua cha' cajaa ycui' na' nu laca na' nu Cristo bi', lo'o tsa̱ nchca tyuna lo'o cua ngujuii na', li' nscua cha' tyu'ú na' chaca quiya'. 47Li' ntsu'u cha' ta ngu' cha' ji'i̱ ycui' na' lo'o ñati̱ tyucui ña'a̱ chalyuu. Nde Jerusalén xana ma̱ cacha' ma̱ cha' bi' ji'i̱ ngu' clyo. Nga'a̱ cha' chcui' ma̱ lo'o ñati̱ cha' ca tyuju'u ti' ngu' ji'i̱ cha' cuxi nu ntsu'u tyiquee ngu', cha' xtyanu ngu' ji'i̱ cha' cuxi nu ndu'ni ngu'; li' cua'ni clyu ti' ycui' Ndyosi ji'i̱ lcaa qui'ya nu ntsu'u ji'i̱ ngu'. 48Lo'o cu'ma̱ ni, taca chcui' ma̱ cuentya jna', cha' jlo ti' ma̱ lcaa ña'a̱ nu cua ngua 'na. 49Lo'o jua'a̱ ta na' Xtyi'i ycui' na' ji'i̱ ma̱, cha' cua nchcui' Sti na' cha' ta Ni Xtyi'i ycui' Ni ji'i̱ ma̱; bi' cha' tyanu ma̱ nde Jerusalén re, ña'a̱ cuayá' nu caja juersa ji'i̱ Xtyi'i ycui' Ndyosi ji'i̱ ma̱. Tyu'u bi' nde cua̱ cha' ca̱a̱ tyanu ne' cresiya ji'i̱ ma̱.
Ndyacuí̱ Jesús ndyaa yu nde cua̱
50Li' ndu'u Jesús quichi̱ Jerusalén bi', ndyaa lo'o yu ji'i̱ ngu' ca to' quichi̱ Betania bi'. Nde bi' ngusicua̱ ya' Jesús cha' culacua̱ yu ji'i̱ ngu'. 51Laja lo'o nclyacua̱ yu ji'i̱ ngu', hora ti ndu'u yu ndyaa yu nde cua̱ li'. 52Ngua'ni tlyu ngu' bi' ji'i̱ yu, li' xa' nguxtyu̱u̱ ngu' ñaa ngu' nde Jerusalén. Tso'o tsa ngua tyiquee ngu' li', 53lu'ba tsa ndya'a̱ ngu' ne' laa cha' ndyu'ni tlyu ngu' ji'i̱ ycui' Ndyosi. Tsa lo cua ti cha'.
Currently Selected:
SAN LUCAS 24: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.