SAN JUAN 17
17
Nchcui' Jesús lo'o ycui' Ndyosi Sti yu cuentya ji'i̱ ñati̱ ji'i̱
1Lo'o ndye nchcui' Jesús cha' bi', li' nguxña'a̱ yu nde cua̱, lo'o jua'a̱ cui̱i̱ tsa nchcui' yu lo'o ycui' Ndyosi Sti yu:
―Chcui' na' lo'o nu'u̱, cha' nu'u̱ laca Sti na' ―nacui̱―. Cua ndyalaa hora 'na cha' caja̱a̱. Lo'o juani cua'ni nu'u̱ cha' caca tlyu la na', cha' laca na' Sñi' nu'u̱, cha' li' taca cua'ni na' cha' caca tlyu la ycui' nu'u̱. 2Na cua nda nu'u̱ chacuayá' jna' cha' caca na' loo ji'i̱ lcaa ñati̱, cha' ta na' chaca chalyuu ji'i̱ ñati̱ nu nda nu'u̱ 'na, chalyuu nu ná nga'a̱ cha' tye ―nacui̱ Jesús ji'i̱ ycui' Ndyosi Sti yu―. 3Chalyuu nu ta na' ji'i̱ ngu' laca cha' tyuloo ngu' jinu'u̱, nu'u̱ nu laca sca ti ycui' Ndyosi nu ntucua nde cua̱; lo'o jua'a̱ tyuloo ngu' jna', cha' laca na' Jesucristo nu nda nu'u̱ lijya̱a̱.
4’Nde lo yuu re su nguti'i̱ na' cua ngua'ni na' cha' tlyu tsa laca nu'u̱ ―nacui̱ Jesús―, jua'a̱ cua ndye ngua'ni na' lcaa cña nu nda nu'u̱ 'na cha' cua'ni na' ca nde. 5Sti na' laca nu'u̱, bi' cha' cua'ni nu'u̱ cha' caca tlyu la na', ñi'ya̱ ngua nu lo'o nguti'i̱ na' lo'o nu'u̱ tya clyo lo'o tya lyiji xana chalyuu. Cua'ni nu'u̱ cha' caca tlyu na', la cui' ñi'ya̱ laca tlyu nu'u̱ ca su ntucua nu'u̱.
6’Lcaa ca cha' ñi'ya̱ laca ycui' nu'u̱ ni, cua ndye nchcui' na' cha' bi' lo'o ñati̱ chalyuu nu cua ngusubi nu'u̱ ji'i̱ cha' caca ñati̱ jna', ña'a̱ cuayá' nu ndyuloo tso'o ngu' jinu'u̱ ―nacui̱―. Ñati̱ jinu'u̱ laca ngu' bi', pana cua nda nu'u̱ ngu' bi' jna'. Cua ndaquiya' ngu' lcaa cha' nu nda nu'u̱ lo'o ngu'. 7Lo'o jua'a̱ ngua cuayá' ti' ngu' juani cha' nu'u̱ laca nu nda lcaa cña nu ngua'ni na', cha' lcaa ca cha' nu ntsu'u jna', na cua nda nu'u̱ jna'. 8Lo'o jua'a̱ cua ngulu'u na' ji'i̱ ngu' lcaa cha' nu ngulu'u nu'u̱ 'na ―nacui̱ Jesús―, ndaquiya' tsa ngu' cha' bi' juani. Jlo tsa ti' ngu' cha' ca slo nu'u̱ ngutu'u na' lijya̱a̱, jlya ti' ngu' cha' nu'u̱ laca nu cua nda jna' lijya̱a̱.
9’Sti na', chcui' na' lo'o nu'u̱ juani ―nacui̱ Jesús―, cha' xtyucua nu'u̱ ji'i̱ ngu' bi'. Ná chcui' na' ji'i̱ cua ña'a̱ ca ñati̱ chalyuu, sca ti ji'i̱ ñati̱ nu nda nu'u̱ jna' chcui' na' cha' lo'o nu'u̱, cha' laca ngu' bi' ñati̱ jinu'u̱. 10Lcaa ngu' nu ngusñi cha' 'na, laca ngu' bi' ñati̱ jinu'u̱ ―nacui̱―. La cui' ti cha', ñati̱ jna' laca ngu', xqui'ya cha' laca ngu' ñati̱ ji'i̱ ycui' nu'u̱. Lo'o ña'a̱ xa' ñati̱ chalyuu ji'i̱ ngu' bi', hora ti caca cuayá' ti' ngu' cha' tlyu tsa cha' tso'o ntsu'u jna'.
11’Nga'aa tyi'i̱ na' lo yuu chalyuu ―nacui̱ Jesús―, cha' cua tya̱a̱ ti na' nde su ntucua nu'u̱; pana ngu' bi', tya tyi'i̱ la ngu' nde chalyuu. Lubii tsa laca nu'u̱, Sti na', bi' cha' ndijña na' cha' clyu ti' jinu'u̱ cuentya ji'i̱ ngu' nu cua nda nu'u̱ 'na. Cua nti' na' cha' cua'a nu'u̱ ji'i̱ ngu' bi' lo'o juersa ji'i̱ ycui' nu'u̱, cha' ná quiñu'u̱ tyiquee ngu'. Ñi'ya̱ nu stu'ba cha' jinu'u̱ lo'o na' ―nacui̱―, jua'a̱ cua'ni nu'u̱ lo'o ngu' bi', cha' caca stu'ba cresiya ji'i̱ ngu' bi' lo'o tya'a ngu' nu ngusñi cha' jinu'u̱. 12Lo'o tya ndi'i̱ na' lo'o ñati̱ nu nda nu'u̱ 'na ―nacui̱ Jesús―, li' ndaca'a na' ji'i̱ ngu' bi' lo'o juersa ji'i̱ ycui' nu'u̱. Ná nda na' chacuayá' tyacua cha' cuxi ji'i̱ ngu'; ni tsaca ngu' bi', ná nguna' chalyuu ji'i̱ ngu'. Sca ti nu ñati̱ nu nguscua tya sa'ni la cha' chcuna' cha' ji'i̱, bi' laca nu ndye cha' ji'i̱ tsiya' ti, cha' nga'a̱ cha' caca lcaa cha' nu nguscua ngu' lo quityi cusu' cuentya jinu'u̱.
13’Bi' cha' juani tya̱a̱ na' su ntucua nu'u̱, Sti na' ―nacui̱ Jesús ji'i̱ ycui' Ndyosi Sti yu―. Lo'o tya ndi'i̱ na' nde chalyuu, li' nda na' cha' bi' lo'o ngu', cha' ñi'ya̱ lo'o chaa ti' ycui' na' re, jua'a̱ caca chaa ti' ngu' bi' tyucui tyiquee ngu'. 14Lcaa cha' nu cua nchcui' nu'u̱ lo'o na', cua nda na' cha' bi' lo'o ngu' bi' ―nacui̱―. Lo'o juani, ñi'ya̱ lo'o liye' ti' ñati̱ chalyuu 'na, jua'a̱ ca liye' ti' ñati̱ ña'a̱ ji'i̱ ngu' bi', xqui'ya cha' ná ntsu'u cha' ji'i̱ ya lo'o nu cuxi nu ntsu'u nde chalyuu. 15Bi' cha' chcui' na' lo'o nu'u̱ juani, Sti na' ―nacui̱ Jesús―, cha' nti' na' cha' ña'a̱si̱i̱ nu'u̱ ji'i̱ ngu' bi', cha' ná cua'ni lya' ti' nu xña'a̱ ji'i̱ ngu', masi si'i cha' ca̱a̱ ca̱qui'ya nu'u̱ ji'i̱ ngu' bi' chcui' na' lo'o nu'u̱. 16Jua'a̱ na' lo'o ngu' bi', ná ntsu'u cha' ji'i̱ ya lo'o nu cuxi nu ntsu'u nde chalyuu ―nacui̱―. 17Liñi tsa cha' nu nda nu'u̱, lo'o jua'a̱ tya ta la nu'u̱ cha' liñi bi' lo'o ngu' bi', cha' cha'a̱ cresiya ji'i̱ ngu'; nga'aa si'i cha' cuxi tyu'u tyiquee ngu' bi', ñi'ya̱ lo'o ntsu'u tyiquee ngu' tya sa'ni la. 18Ñi'ya̱ nda nu'u̱ 'na cha' lijya̱a̱ nde chalyuu ―nacui̱ Jesús ji'i̱ ycui' Ndyosi Sti yu―, jua'a̱ cua nda na' ji'i̱ ngu' bi', cha' tsaa ngu' culu'u ngu' cha' jinu'u̱ nde lo tyucui ña'a̱ chalyuu. 19Lo'o juani ta na' tyucui ña'a̱ ycui' ca na' cuentya ji'i̱ ñati̱ bi', cha' cua'ni na' lcaa cña nu nti' nu'u̱ cha' cua'ni na' ―nacui̱―. Lo'o jua'a̱ lcaa ñati̱ nu ngusñi cha' jinu'u̱ ni, nti' na' cha' cha'a̱ cresiya ji'i̱ ngu', cha' ta nu'u̱ cha' liñi nu tyanu ne' cresiya ji'i̱ ngu' cuentya jinu'u̱.
20’Si'i sca ti ji'i̱ ngu' nu cua ngusñi cha' 'na chcui' na' lo'o nu'u̱ ―nacui̱ Jesús ji'i̱ ycui' Ndyosi Sti yu―, lo'o chcui' na' cha' ji'i̱ lcaa ñati̱ nu xñi cha' jna' ca tiya' la, nu lo'o chcui' ngu' lo'o ñati̱ bi'; lo'o cha' ji'i̱ ñati̱ bi' chcui' na' lo'o nu'u̱ juani ―nacui̱―. 21Ndijña na' jinu'u̱ cha' caca stu'ba cresiya ji'i̱ ngu' bi' lo'o tya'a ngu'. Sti na', ñi'ya̱ stu'ba ntsu'u cha' jinu'u̱ lo'o na', ñi'ya̱ stu'ba nchca tyiquee na' lo'o nu'u̱, jua'a̱ cua'ni nu'u̱ cha' caca stu'ba tyiquee ngu' bi' lo'o na; li' taca jlya ti' xa' ñati̱ cha' nu'u̱ nda 'na lijya̱a̱ ―nacui̱ Jesús―. 22Cua ngua'ni nu'u̱ cha' caca tlyu na' nde chalyuu, lo'o jua'a̱ cua ngua'ni na' cha' caca ñati̱ bi' ñi'ya̱ laca ycui' na'. Ñi'ya̱ lo'o stu'ba tsa nchca tyiquee nu'u̱ lo'o na', jua'a̱ nti' na' cha' caca stu'ba tyiquee ngu' bi' lo'o tya'a ngu'. 23Nu lo'o stu'ba ti ntsu'u tyiquee na' lo'o ngu' bi', lo'o jua'a̱ stu'ba ntsu'u tyiquee nu'u̱ lo'o na' ―nacui̱―, li' chañi cha' caca stu'ba cresiya ji'i̱ ngu' lo'o tya'a ngu'. Lo'o li' caca cuayá' ti' xa' ñati̱ chalyuu cha' cua nda nu'u̱ 'na lijya̱a̱ lo yuu, cha' ñi'ya̱ lo'o tyaca'a na' jinu'u̱, jua'a̱ cua'ni tyaca'a nu'u̱ ji'i̱ ngu' nu ngusñi cha' 'na.
24’Sti na' ―nacui̱ Jesús ji'i̱ ycui' Ndyosi Sti yu―, cua nti' na' cha' tyi'i̱ ñati̱ nu nda nu'u̱ 'na ca su tyucua na'. Li' ña'a̱ ngu' bi' 'na nde su tlyu la su nda nu'u̱ 'na, cha' tyaca'a tsa na' jinu'u̱ tya lo'o tya lyiji xana chalyuu. 25Sti na' ―nacui̱ Jesús―, xcui' cha' liñi ndu'ni nu'u̱. Nslo na' jinu'u̱, masi ná nslo ñati̱ chalyuu jinu'u̱. Pana jlo ti' ñati̱ nu ngusñi cha' jna' cha' nu'u̱ laca nu nda 'na lijya̱a̱ nde chalyuu. 26Cua ngulu'u na' ji'i̱ ngu' bi' lcaa cha' nu nda nu'u̱ jna', lo'o jua'a̱ tya cua'ni la na' cha' ca cuayá' tso'o ti' ngu' bi' tilaca laca nu'u̱. Bi' cha' taca caca tso'o tyiquee ngu' ña'a̱ ngu' ji'i̱ tya'a ñati̱ ngu', ñi'ya̱ ntsu'u tsa tyiquee nu'u̱ ña'a̱ nu'u̱ 'na, lo'o li' tyanu Xtyi'i ycui' na' ne' cresiya ji'i̱ ngu'.
Currently Selected:
SAN JUAN 17: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.