2 TIMOTEO 1
1
1Pablo laca na'. Cua nda ycui' Ndyosi cña 'na cha' lijya̱ na' tyijyu' ca nde quichi̱ tyi ma̱, cha' ta na' cha' ji'i̱ Jesucristo lo'o ma̱. Nacui̱ Ni cha' ná nga'a̱ cha' tye chalyuu ji'i̱ ñati̱ nu xñi cha' ji'i̱ Jesucristo. 2Nscua na' quityi re cha' ca̱a̱ slo nu'u̱, Timoteo, cha' sñi' na' laca nu'u̱ nti' na', jua'a̱ ntsu'u tsa tyiquee na' ña'a̱ na' jinu'u̱. Ndi'ya̱ nti' na', cha' ña'a̱ ti cua'ni ycui' Ndyosi cha' tso'o lo'o nu'u̱, cha' cua'ni tya'na ti' Ni jinu'u̱, cha' jua'a̱ cua'ni Ni cha' ti̱ ti tyi'i̱ cresiya jinu'u̱ xqui'ya Jesucristo nu Xu'na na.
Nchcui' Pablo ji'i̱ cha' tlyu nu ndyu'ni ycui' Ndyosi lo'o ñati̱
3Ñi'ya̱ nu tyucui tyiquee jyo'o cusu' ji'na ngua'ni ngu' cña ji'i̱ ycui' Ndyosi nu ngua sa'ni la, jua'a̱ tyucui tyiquee na' ndyu'ni na' cña ji'i̱ ycui' Ndyosi juani. Ndya na' xlya'be ji'i̱ ycui' Ni lo'o nchcui' na' lo'o Ni cuentya jinu'u̱, cha' tsa̱ lo'o talya nchcui' na' lo'o Ni. 4Ntsu'u ti' na' cha' ngusi'ya nu'u̱ lo'o ndu'u na' ndyaa na', bi' cha' nti' tsa na' ña'a̱ na' jinu'u̱ chaca quiya' cha' ca chaa ti' na. 5Ntsu'u ti' na' cha' chañi cha' ngusñi nu'u̱ cha' ji'i̱ Jesús. Xtya'a̱ cusu' nu'u̱, nu ma' Loida ni, bi' laca nu cua ngusñi cha' bi' tya clyo; lo'o li' ma' Eunice xtya'a̱ nu'u̱ cua ngusñi cha' bi'; la cui' jua'a̱ nu'u̱, tso'o tsa ngusñi nu'u̱ cha' ji'i̱ Jesús.
6Ta na' sca cui̱i̱ lo'o nu'u̱ juani: Cua'ni tyaca'a nu'u̱ ji'i̱ cha' tso'o nu cua nda ycui' Ndyosi jinu'u̱ tya lo'o ngusta ya' na' hique nu'u̱, cha' taca cua'ni nu'u̱ cña cuentya ji'i̱ ycui' nu Xu'na na. 7Ná nti' ycui' Ndyosi cha' cutsi̱i̱ na; bi' cha' nda Ni Xtyi'i ycui' Ni cha' tyanu ne' cresiya ji'na, cha' ca tlyu tyiquee na, cha' tso'o ti tyu'u tyiquee na ña'a̱ na ji'i̱ tya'a ñati̱ na, cha' taca cua'ni na ñi'ya̱ nu nti' ycui' Ndyosi cha' cua'ni na lcaa tsa̱. 8Ná ca tyuju'u ti' nu'u̱; ta nu'u̱ cha' lo'o ngu', ñi'ya̱ nu ngusñi nu'u̱ cha' ji'i̱ ycui' nu Xu'na na. La cui' ti ná ca tyuju'u ti' nu'u̱ cha' ntsu'u na' ne' chcua̱. Nchcube' ngu' jna' xqui'ya cha' nchcui' na' cha' ji'i̱ ycui' nu Xu'na na, bi' cha' ná quiña'a̱ tsa culacua ti' nu'u̱ si lo'o jinu'u̱ xcube' ngu' cha' nchcui' nu'u̱ cha' tso'o ji'i̱ Jesucristo lo'o ngu'. Ta ycui' Ndyosi juersa ji'na cha' talo na, 9cha' ycui' Ndyosi laca nu ngua'ni lyaá ji'na; cua ngusubi Ni ji'na cha' cua'ni na cña nu nti' Ni cha' cua'ni na. Ntaja'a̱ Ni cua'ni lyaá Ni ji'na cha' tso'o tyiquee ti Ni, masi si'i xqui'ya cha' tso'o nu ngua'ni ycui' ca na. Ntsu'u tsa tyiquee Ni ña'a̱ Ni ji'na; jua'a̱ laca cha' nu ngulu'u Jesucristo ji'na, cha' ngua ti' ycui' Ndyosi cua'ni Ni cha' tso'o lo'o na nu lo'o tya lyiji cuiñá Ni chalyuu. 10Cua nchca cuayá' ti' na cha' bi' juani, xqui'ya cha' cua ya̱a̱ Jesucristo chalyuu, cha' bi' laca nu ngua'ni lyaá ji'na; ntiji̱loo Jesús tsiya' ti ji'i̱ nu xña'a̱ nu lo'o ndyu'ú yu chaca quiya' lo'o cua ngujuii yu, bi' cha' ná nga'a̱ cha' tye chalyuu ji'i̱ lcaa na nu xñi na cha' ji'i̱ Ni, cha' ngua'ni lyaá Jesús ji'na.
11Cha' ji'i̱ Jesucristo, bi' laca cha' nu nchcui' na' lo'o ñati̱. Cua ngusubi ycui' Ndyosi 'na cha' ndya'a na' nclyu'u na' cha' bi' ji'i̱ ngu' xa' tsu' cuentya ji'i̱ ycui' Ni, 12bi' cha' ndyiji cha' ti'í 'na juani. Pana ná tyuju'u ti' na', cha' cua jlo ti' na' tilaca laca nu ngusñi na' cha' ji'i̱ Ni. Jlo ti' na' cha' nchca ji'i̱ Ni ña'a̱si̱i̱ Ni 'na; nchca ji'i̱ Ni xtyucua Ni 'na lo'o ndyu'ni na' cña nu nda Ni 'na, cha' taca tyu'u tso'o cña 'na tsa̱ bi' lo'o tya̱a̱ Jesús nde chalyuu chaca quiya'.
13Ña'a̱ ti tya tyi'u ti' nu'u̱ lcaa cha' nu cua ngulu'u na' jinu'u̱ lacua. Cha' liñi laca bi', jua'a̱ tso'o tsa si xñi tso'o nu'u̱ cha' bi'. Tso'o ti tyu'u tyiquee nu'u̱ ña'a̱ nu'u̱ ji'i̱ ñati̱, xqui'ya cha' ntsu'u cha' jinu'u̱ lo'o Jesucristo. 14Cua'ni tyaca'a nu'u̱ ji'i̱ cha' tso'o nu nda ycui' Ndyosi lo'o na; xtyucua Xtyi'i ycui' Ni jinu'u̱ cha' cua'ni nu'u̱ cña bi', bi' cha' ndyanu Xtyi'i ycui' Ni ne' cresiya ji'na.
15Jlo ti' nu'u̱ cha' quiña'a̱ ñati̱ ji'i̱ Jesucristo cua nguxtyanu ngu' 'na; masi cua ña'a̱ ca ngu' nde loyuu su cuentya Asia, lo'o yu Figelo, lo'o yu Hermógenes, cua nguxtyanu ngu' bi' 'na. 16Sca ti yu Onesíforo ni, nguxtyucua tsa yu bi' 'na; ná ngua tyuju'u ti' yu cha' ntsu'u na' ne' chcua̱, pana ndyaa yu ndyaa na'a̱ yu 'na ca bi'. Bi' cha' nti' na' cha' cua'ni tya'na ti' ycui' Ndyosi ji'i̱ yu, lo'o jua'a̱ ji'i̱ lcaa ngu' nu ndi'i̱ slo yu bi'. 17Nu lo'o ndyalaa yu nde quichi̱ Roma re, li' ngulana tsa yu 'na cha' ca̱a̱ yu ca slo na'. 18Nti' na' cha' cua'ni tya'na ti' ycui' nu Xu'na na ji'i̱ yu bi', nu lo'o tyalaa tsa̱ nu cua'ni cuayá' Ni ji'i̱ lcaa ñati̱. Lo'o jua'a̱ cua jlo tso'o ti' nu'u̱ lcaa ña'a̱ cña tso'o nu ngua'ni yu lo'o na ca quichi̱ Efeso.
Currently Selected:
2 TIMOTEO 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.