1 TIMOTEO 1
1
1Pablo laca na'. Sca ñati̱ nu ndya'a̱ nchcui' cha' ji'i̱ Jesucristo nde xa' quichi̱ laca na', cha' ycui' Ndyosi nu ndu'ni lyaá ji'i̱ ñati̱ ngulo cña jna' cha' cua'ni na' cña bi'; ngulo Jesucristo cña jna', la cui' nu Cristo nu ndu̱ ti' na ji'i̱ cha' tya̱a̱ Ni chaca quiya'. 2Nscua na' quityi re cha' ca̱a̱ slo nu'u̱, Timoteo, cha' ñi'ya̱ si laca nu'u̱ sñi' na', jua'a̱ nti' na' ña'a̱ na' jinu'u̱, cha' ngusñi nu'u̱ cha' ji'i̱ Jesucristo tya lo'o ngulu'u na' cha' bi' jinu'u̱. Ndi'ya̱ nti' na', cha' ña'a̱ ti cua'ni ycui' Ndyosi Sti na cha' tso'o lo'o nu'u̱, cha' cua'ni tya'na ti' Ni jinu'u̱, cha' jua'a̱ cua'ni Ni cha' ti̱ ti tyi'i̱ cresiya jinu'u̱ xqui'ya Jesucristo nu Xu'na na.
Ná tso'o cha' jlya ti' ngu' cuentyu ti
3Lo'o cua tsa'a ti na' ca Macedonia, li' cua nchcui' na' lo'o nu'u̱ cha' tyanu nu'u̱ nde quichi̱ Efeso; chaca quiya' chcui' na' lo'o nu'u̱ juani, cha' tyanu nu'u̱ ca quichi̱ bi'. Ntsu'u ngu' quichi̱ Efeso nu nclu'u xa' lo cha' ji'i̱ ngu' tya'a na; nga'a̱ cha' culo nu'u̱ cña ji'i̱ ngu' bi', cha' nga'aa culu'u tsa ngu' xa' la cha' ji'i̱ tya'a ngu'. 4Lo'o jua'a̱ culo nu'u̱ cña cha' nga'aa ca tsa'a̱ ngu' cuentyu cusu', nga'aa cua'a̱ jyaca̱ ngu' ji'i̱ cña cua̱ nu ndyanu ji'i̱ jyo'o cusu' ji'i̱ ngu' sa'ni. Nguichi̱ tsa cha' bi', lo'o jua'a̱ ná tye chca cha' bi' tsiya' ti. Ná xtyucua cha' bi' ji'na cha' cua'ni na cña ji'i̱ ycui' Ndyosi; sca ti si xñi na cha' ji'i̱ ycui' Jesús, li' caca cua'ni na cña ji'i̱ Ni.
5Culo nu'u̱ cña ji'i̱ ngu' cha' tso'o tsa tyu'u tyiquee ngu' ña'a̱ ngu' ji'i̱ tya'a ngu', cha' bi' laca cña nu ndu'ni ñati̱ nu ngua lubii cresiya ji'i̱ cuentya ji'i̱ ycui' Ndyosi; jlo ti' ñati̱ bi' ñi'ya̱ laca cña tso'o, lo'o jua'a̱ ndyu'ni ngu' bi' cña tso'o bi' li'. Chañi cha' ngusñi ngu' bi' cha' ji'i̱ ycui' Ndyosi si ntsu'u tyiquee ngu' ña'a̱ ngu' ji'i̱ tya'a ngu'. 6Pana ntsu'u xi xa' la ñati̱ nu ná ntaja'a̱ ngu' cuna ngu' cha' bi'; xa' tyucui̱i̱ ngusñi ngu' bi', cha' nchcui' tsa ngu' cuentyu. 7Mstru caca ngu' bi', nti' ngu', ngu' nu nclu'u ñi'ya̱ cña nu ngulo ycui' Ndyosi ji'i̱ ñati̱, nu nguscua jyo'o Moisés; pana ná nda ngu' bi' cuentya ñi'ya̱ ndyu'u cha' nu nchcui' ycui' ca ngu', ñi'ya̱ ndyu'u cha' nu nda cha' cusu' bi', masi lye tsa nclu'u ngu' cha' bi' ji'i̱ tya'a ñati̱ ngu'.
8Jlo ti' na cha' tso'o tsa cha' cusu' nu nguscua jyo'o Moisés bi', si taquiya' na ji'i̱. 9Pana si'i xqui'ya ñati̱ nu tso'o tyiquee nda ycui' Ndyosi cha' cusu' bi'; na cua nda Ni cha' bi' xqui'ya ñati̱ nu ná nti' cua'ni cha' tso'o, xqui'ya ñati̱ nu ná ntaja'a̱ taquiya' ji'i̱ cha' bi', xqui'ya ñati̱ nu ná ntsu'u cha' ji'i̱ lo'o ycui' Ndyosi, xqui'ya ñati̱ nu ntsu'u qui'ya ji'i̱, xqui'ya ñati̱ nu cuxi tyiquee, xqui'ya ñati̱ nu nchcui' suba' ji'i̱ ycui' Ndyosi, xqui'ya ñati̱ nu ndujuii ji'i̱ sti ngu', ji'i̱ xtya'a̱ ngu', xqui'ya ñati̱ nu ndujuii ji'i̱ tya'a ñati̱, 10xqui'ya ñati̱ nu ndu'ni suba' lo'o nu cuna'a̱, xqui'ya nu cuna'a̱ nu ndu'ni suba' lo'o nu qui'yu, xqui'ya nu qui'yu nu ndu'ni suba' lo'o tya'a qui'yu ti, xqui'ya ñati̱ nu ntucuaana ji'i̱ tya'a ñati̱ cha' tsalo'o ji'i̱ ngu' jua'a̱ ti, xqui'ya nu cuiñi, xqui'ya ñati̱ nu nchcui' cha' cuiñi slo ngu' tisiya. Nda ycui' Ndyosi cha' cusu' bi', cha' jua'a̱ ca cuayá' ti' lcaa ñati̱ nu ná nti' taquiya' ji'i̱ cua ña'a̱ ca cha' nu liñi ca nu nclu'u na cuentya ji'i̱ ycui' Ndyosi. 11La cui' cha' tso'o bi' nclu'u na' chacuayá' ji'i̱ ycui' Ndyosi juani, lo'o nclu'u na' cha' tlyu tsa laca ycui' Ndyosi, cha' tso'o tsa ntsu'u tyiquee Ni ña'a̱ Ni ji'na.
Tso'o tsa ndu'ni ycui' Ndyosi lo'o na
12Ndya tsa na' xlya'be ji'i̱ Jesucristo nu Xu'na na cha' ngua'ni Ni cha' caca cua'ni na' cña ji'i̱ Ni; ndya na' xlya'be ji'i̱ Ni cha' ngusubi Ni jna' cha' cua'ni na' cña ji'i̱ Ni, cha' jlo ti' Ni cha' ndaquiya' na' ji'i̱ Ni. 13Ngusubi Ni jna', masi suba' tsa nchcui' na' ji'i̱ Ni cua sa'ni la, tyempo lo'o nguxcube' na' ji'i̱ ñati̱ ji'i̱ Jesucristo; tyaala tsa na' nu ngua li'. Pana ná jlo ti' na' tyempo bi', cha' bilya xñi na' cha' tso'o ji'i̱ ycui' Ndyosi, bi' cha' ngua tya'na tsa ti' Ni jna'. 14Ntsu'u tsa tyiquee nu Xu'na na ña'a̱ Ni 'na, bi' cha' ngusñi na' cha' ji'i̱ ycui' Jesucristo li'; lo'o nu juani ntsu'u tyiquee na' ña'a̱ na' ji'i̱ Jesús, lo'o jua'a̱ ntsu'u tyiquee na' ña'a̱ na' ji'i̱ tya'a ñati̱ na'.
15Taca xñi tso'o ngu' cha' nu nchcui' ndi'ya̱: Cua ya̱a̱ Jesucristo nde chalyuu cha' cua'ni lyaá Ni ji'i̱ ñati̱ chalyuu nu ntsu'u qui'ya ji'i̱. Lo'o na', tlyu la xqui'ya na' que xa' la ñati̱, cha' cuxi tsa cña nu ngua'ni na' lo'o ñati̱ ji'i̱ Jesucristo nu ngua sa'ni la. 16Ngüi'ya tsa Jesucristo cha' clyu ti' 'na lo'o ngüityi̱ Ni qui'ya nu ntsu'u 'na, cha' culu'u ycui' Ndyosi ji'i̱ xa' la ñati̱ ñi'ya̱ caca xñi ngu' cha' ji'i̱ Ni. Ñi'ya̱ lo'o tya'na ti' Jesús jna' tya clyo, jua'a̱ ca tya'na ti' Ni ji'i̱ lcaa ñati̱ nu xñi cha' ji'i̱ Jesús ca nde loo la, cha' si jlya ti' ngu' ji'i̱ Ni, ná nga'a̱ cha' tye chalyuu ji'i̱ ngu' li'. 17Bi' cha' cua'ni tlyu na ji'i̱ ycui' Ndyosi juani, cua'ni chi̱ na loo Ni, cha' ná tye tsa̱ nu laca Ni loo tyucui ña'a̱ chalyuu; ná tye cha' ji'i̱ ycui' Ndyosi, cha' ná ntsu'u cha' cajaa Ni. Ná nchca ji'na ña'a̱ na ji'i̱ Ni cha' laca na ñati̱ chalyuu ti, pana sca ti ycui' Ni laca ycui' Ndyosi. Jua'a̱ laca cha' ji'i̱ Ni tu'ni.
18Culo na' cña jinu'u̱ juani, Timoteo, cha' ñi'ya̱ nti' na' ña'a̱ na' ji'i̱ sca sñi' na', jua'a̱ nti' na' ña'a̱ na' jinu'u̱: Tya cua'ni la nu'u̱ cña ji'i̱ ycui' Ndyosi ñi'ya̱ nu cua nacui̱ ngu' nu laca tu'ba ji'i̱ ycui' Ni cha' cua'ni nu'u̱; tyi'u ti' nu'u̱ cha' nu cua nchcui' ngu' bi' jinu'u̱ tya tsubi' la, cha' caca nguula la ti' tyiquee nu'u̱. Li' ñi'ya̱ caca ji'i̱ sca sendaru tso'o, jua'a̱ taca jinu'u̱ xu̱u̱ tya'a lo'o nu cuxi nu ntsu'u chalyuu; 19taca xu̱u̱ tya'a nu'u̱ lo'o nu cuxi bi' si xñi tso'o nu'u̱ cha' ji'i̱ Jesucristo, si xcui' cha' tso'o cua'ni nu'u̱ lo'o ñati̱. Ntsu'u ngu' nu ngua jlo ti' ñi'ya̱ laca sca cha' liñi, pana nga'aa ndyu'ni ngu' cha' liñi bi' juani; cua ndya'a̱chu̱' ngu' bi' ji'i̱ ycui' Ndyosi, cha' nguxtyanu ngu' cha' tso'o bi'. 20Ñi'ya̱ nti' yu Himeneo lo'o yu Alejandro ni, nga'aa ndaquiya' ngu' ji'i̱ cha' liñi, bi' cha' cua nguxtyanu na' ji'i̱ ngu' bi' ya' nu xña'a̱, cha' ca cuayá' ti' ngu' cha' tlyu tsa cha' cuxi laca lo'o nchcui' ngu' cha' suba' ji'i̱ ycui' Ndyosi.
Currently Selected:
1 TIMOTEO 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.