ROMANOS 1
1
Pablo chjé joajna chojni ngain Roma
1Janha Pablo, ná ninchehe ẍé Jesucristo. Dios nichjahna janha co joantsjenda na para rrihi ná representanté jehe, para rrindattjan icha chojni joajné jehe que danjo iná vida naroaxin.
2Desde anto osé Dios ndac̈ho joajna jihi ngain cain profeté, co jehe profeta cjin joajna jihi ngain tti libro que jitaxin Palabré Dios. 3Jehe joajna jihi tti jinichja de ixin Jesucristo, Xenhe Dios. Co para nttihi ngataha nontte, Jesucristo mero razé rey David. 4Pero para ixin ngajni, Espíritu Santo ndac̈ho que Jesucristo Xenhe Dios, tti chonda cain joachaxin, ixin jehe xechon de tti ndavenhe. 5De ixin Jesucristo, Dios chjana na joachaxin para que te na representanté jehe para que ngain cainxin nación, sintte chojni que sitticaon Dios co sinchehe na inchin jehe rinao. 6Ngayé cain chojni jihi, te ra jaha ra cai, ẍo nichjaha ra Dios para goan ra chojní Jesucristo.
7Mexinxin janha rricjinha ra jaha ra, ẍo te ra ngain ciudad de Roma, jaha ra ẍo Dios anto rinao ra, co nichjaha ra para sintte ra ngain ná vida jian para ixin Dios. Jehe Dios Ndodá na, conixin Jesucristo, tti chonda cain joachaxin para ixin ján na, cayoi nimé ni sinttanchaon ra co sanjo nganji ra tti c̈hjoin que tsonohe ansean ra.
Pablo rinao sitsjehe chojni ngain Roma
8Saho, de ixin Jesucristo, janha chjaha gracias ngain Dios para ixin cainxin jaha ra ixin cainxin parte de ngoixin mundo tenichja chojni de ixin tti jaha ra ditticaon ra ngain Jesucristo. 9Co Dios, tti ẍé rrinttaha janha conixin ansenna ixin rrindattjan chojni tti jian joajné Xenhe Dios, jehe Dios nohe jian queẍén janha ẍaxanho jaha ra cainxin nttiha que janha rrinttacoanxian Dios. 10Janha cain tiempo rrinttatsán ñao Dios para que jehe rrochjana joachaxin para que jai janha nchao saso sasotsjaha ra. 11Ixin janha rinaho sicon ra co tsjenguijna ra de ngain tti ditticaon ra de ixin Jesucristo para que sitticaon ra icha jian; 12rroc̈ho para que sonttoanimá chó na conixin jehe tti dotticaon na jihi de jaha ra conixin janha.
13Hermanos, janha rinaho que jaha ra tsonoha ra que tsje nttiha janha joinaho rrogaso para rrogasotsjaha ra, pero hasta jai ẍa c̈hoha. Janha rinaho saso nttiha Roma para sinttaguitticaon chojni nttiha de ixin Jesucristo inchin jointtaha ngain icanxin parte de ngoixin mundo. 14Ixin Dios coetonna janha ixin chonda que sinttanoa cainxin chojni, sea griego o jeha griego; o chojni que chonxin jian, o chojni que ẍonhi chonxin. 15Mexinxin jañá janha anto rinaho rrondattjo ra cai tti joajna que danjo iná vida naroaxin, jaha ra ẍo te ra ngain ciudad de Roma.
Joachaxin que chonda tti joajna jian
16Janha tsosoanaha de rrondattjan chojni tti jian joajné Jesucristo ixin mé joachaxín Dios para sanjo iná vida naroaxin ngain cain tti chojni que ditticaon joajna mé. Icha saho chojni nichja joajna jihi jeho ngain chojni judío, pero jai, cai nichja na ngain chojni que jeha judío. 17Ixin joajna jihi tjagoa na queẍén Dios nttaroa na ngattoxon con jehe. Co jehe nttajian na de ixin tti confianza que ján na chonda na ngain Jesucristo, co jeho ixin chonda na confianza mé. Jamé ndac̈ho ngain tti jitaxin Palabré Dios cai: “Tti chojni que dehe jian para ngain Dios conixin confianza que chonda ngain jehe, chojni mé rrochonda iná vida naroaxin.”
Tti teca chojni ngain Dios
18Ján na docon na ixin tti anto soji castigoe Dios ttixin de ngajni para ngain chojni que jeha jian co nchehe na inchin jiquininxinha. Ixin tti jianha que chojni mé nchehe tanc̈hjandaha que rrochonxin na tti ján ndoa. 19Cain chojni mé nohe na jian queẍén rrochonxin ni de ixin Dios, ixin jehe Dios mismo cjoagoe na. 20Ixin desde que Dios joinchechjian mundo, cain chojni nchao chonxin na cosa de Dios que c̈hoha dicon ni, ixin nchao chonxin ni ixin tti joachaxin que jehe chonda ẍonhi tiempo tsjexin, co ni jehe Dios ẍonhi tiempo tsjexin. Co jihi jehe ni nchao satsoan ni de ixin ngain cain tti dinchechjian Dios; mexinxin cain tti chojni que ditticaonha ngain Dios, jehe sinchetjañeha cain chojni mé, ixin ¿quedonda ditticaonha na? 21Co cain chojni mé masqui chonxin na jihi de ixin Dios, nchesayeha na inchin jiquininxin jehe, ni danjoha na gracias ngain jehe. En lugar de sinchehe na mé, jehe na joxon ẍaxaon na cosa que ẍonhi ẍé, co jamé naxin xehe para joarrixaoen na. 22Masqui ndac̈ho na que jehe na anto nohe na, pero jeha ndoa, ixin jehe na ẍonhi chonxin na. 23Ixin en lugar de rrojinchesayehe na Dios, tti ndoa jian, co tti ẍonhi tiempo ndasenhe, jehe na nchesayehe na retratoe chojni que ndadenhe, co hasta retratoe conttoa, conché co icha coxigo nchesayehe na.
24Mexinxin Dios ndacointtohe na para nchehe na cosa jianha inchin jehe na rinao na, co jamé jehe na nchehe na cosa de joasoaxin de ná na co iná na. 25Jehe na vitticaonha na tti ndoa de ixin Dios, sino que jehe na vitticaon na ngain cosa ndoaha, co jehe na nchesayehe na co nchecoanxinhi na tsje cosa que Dios joinchechjian, co nahi Dios mismo tti jiquininxin tsocoanxinhi para cainxin tiempo. Amén.
26Mexinxin Dios ndacointtohe cain chojni mé para nchehe na cosa de joasoaxin inchin rinao cuerpoe na, ixin hasta nc̈hí nchehe nc̈ha ngain iná nc̈hí tti jiquininxinha sinchehe nc̈ha, mé jiquininxin nchehe nc̈ha jeho ngain xixihi nc̈ha. 27Co ẍajeho jamé nchehe xí cai, nchehe xa ngain iná xí cosa de joasoaxin que jiquininxinha; jeho jiquininxin sinchehe xa ngain c̈hihi xa. Co hasta anto rinao cuerpoe xa sinchehe xa jamé. Xí mé nchehe xa cosa de joasoaxin ngain iná xí, co mexinxin Dios nchecastigá xa ngain cuerpoe xa de ixin tti jianha que jehe xa nchehe xa.
28Co ixin chojni mé irinaoha na datsoan na de ixin Dios, mexinxin jehe cointtohe na para ẍaxaon na cosa jianha, co para que sinchehe na sigue de sinchehe na tti tequininxinha na sinchehe na. 29Jehe na anto nchehe na cosa que jiquininxinha; ncheyehe na nc̈hí co xí, nchehe na tti jianha, anto rinao na cosa de ngataha nontte, co jianha na. Co jehe na anto chjoehe na, dantsjehe na vidé icha chojni, ttjé na chijni, ncheyehe na icha chojni, ẍaxaon na cosa jianha, co ncheẍoxinhi na ttequin na cuentoe icha chojni que jiquininxinha tsequin na. 30Jehe na nichja na jianha de ixin icha chojni, ningaconhe na Dios, chondaha na respeto ngain icha chojni, co nichja na jian de ixin jeho na mismo, co orgulloso na. Co jehe na ẍaxaon na queẍén nchehe na icha cosa jianha, co ditticaonha na ndodé na ni janné na. 31Jehe na rinaoha na ttinxin na, co ncheyaxon na c̈honja tti ndac̈ho na, rinaoha na icha chojni, noeha na nchetjañehe na na, co ttiaconoeha na ni ná chojni. 32Cain chojni mé nohe na jian quehe coetonha Dios, co nohe na que cain chojni que nchehe cosa jihi, Dios ndac̈ho que chojni mé tequininxin tsji ngain infierno; pero masqui jamé, jehe na nchehe na sigue de nchehe na cosa jianha co hasta ché na are dicon na iná chojni que jinchehe jamé cai.
Currently Selected:
ROMANOS 1: plsNT
Highlight
Share
Copy
Want to have your highlights saved across all your devices? Sign up or sign in
© 1982, Wycliffe Bible Translators, Inc.