YouVersion Logo
Search Icon

Luke 22

22
Dey Goin Set Jesus Up
(Matthew 26:1-5, 14-16; Mark 14:1-2, 10-11; John 11:45-53)
1 # Outa 12:1-27 Da time come fo da Passova, an da spesho religious kine ceremony dey call Da Bread Dat No Mo Yeast time. 2Da Main Pries guys an da teachas dat teach da Rules From God wen tink plenny how dey can kill Jesus. But dey sked da peopo.
Judas Goin Sell Out Jesus
3Den Satan take ova Judas Iscariot, one a Jesus twelve guys. 4So Judas go talk to da Main Pries guys, an da officers fo da Temple, fo see how he goin set Jesus up. 5Da Main Pries dem wen feel real good inside, an dey tell dey goin give Judas money fo do um. 6Judas, he like da deal. Az why he look fo one chance fo set Jesus up fo dem so nobody know.
Jesus Goin Eat Da Passova Food
(Matthew 26:17-25; Mark 14:12-21; John 13:21-30)
7Da day fo da Bread Dat No Mo Yeast come, wen dey kill da bebe sheep fo da Passova sacrifice. 8Jesus sen Peter an John. He tell, “Go make ready da Passova food fo us eat.”
9Dey tell, “Wea you like us make um ready?”
10Jesus tell, “Wen you guys go inside town, one guy goin come dat carry one watta jug. Go wit him inside one house, 11an tell da guy dat own da house, ‘Da Teacha tell, “Wea da room me an my guys goin eat da Passova food?” ’ 12He goin show you guys one big room upstairs, dat get eryting. Make da food ready dea.”
13Da guys go an dey find eryting jalike Jesus wen tell. An dey make da Passova food.
Da Dinna Wit Da One In Charge
(Matthew 26:26-30; Mark 14:22-26; 1 Corint 11:23-25)
14Wen da time come, Jesus sit down at da table wit da guys he goin sen all ova bumbye. 15He tell um, “I stay tink plenny bout dis. I fo real like eat dis Passova food wit you guys befo I suffa. 16Fo shua, afta dat, I no goin eat um one mo time till God da King come an take ova.”
17Den Jesus take da cup, an tell God “Mahalo” an tell da guys, “Take dis an pass um down to da oddas. 18Fo shua, I no goin drink notting from da grape plant from now till da day God da King come an take ova.”
19Den he take da bread, an tell God “Mahalo,” an broke um up, an give um to dem. He tell, “Dis hea, my body dat I give up fo you guys. From now, tink bout me erytime you eat dis.” 20#Jer 31:31-34Same ting, afta dey pau eat, he pick up da spesho cup an tell, “Dis cup, da New Deal I goin make wit my blood dat I goin bleed out fo you guys wen I mahke. 21#Songs 41:9But you know, da guy dat goin set me up stay hea wit me at da table. 22I da Fo Real Kine Guy, an I goin mahke jalike God tell, but bummahs da guy dat goin set me up!” 23An da guys go aks each odda, “Who da guy goin do dat?”
Da Guys Talk Bout Who Da Main Guy
(Matthew 20:24-28; Mark 10:41-45)
24 # Matt 18:1; Mark 9:34; Luke 9:46 Da guys stay talk wit each odda. Dey tell, “Wat one a us guys you figga goin be da main guy?” 25Jesus tell, “Da kings fo da diffren peopos, dey boss aroun dea peopo. Dey da guys dat run da peopo, an erybody tell da kings dey good guys cuz dey stay help dea peopo. 26#Matt 23:11; Mark 9:35#Matt 20:25-27; Mark 10:42-44But you guys, no be lidat. Wit you guys, da main guy gotta be jalike one small kid, an da one in charge gotta be da one dat work fo all da oddas. 27#John 13:12-15Who you guys figga da main guy? Da guy dat stay sit by da table o da guy dat bring him da food? You figga da guy dat sit by da table? But me, I not lidat. You know, I stay wit you guys, but I work fo you guys.
28“You da guys dat wen stay tight wit me wen I suffa plenny. 29I goin make you guys come kings jalike my Faddah wen make me one king. 30#Matt 19:28You guys goin eat an drink by my table wen I come da King, an you guys goin sit down on top thrones, an come judges fo da twelve Israel ohanas.”
Peter Goin Tell He Donno Jesus
(Matthew 26:31-35; Mark 14:27-31; John 13:36-38; Isaiah 53:12)
31Den Jesus tell Peter, “Eh, Peter, lissen up! Satan wen tell God fo give all you guys one big tes. Jalike one farma guy take da junk outa da wheat, Satan like find out who trus me fo real kine an who not. 32But I wen tell God fo help you, Peter, so you trus God an no give up. Afta you come sorry an come back by me, kokua yoa braddahs.”
33But Peter tell, “Eh, you Da One In Charge, an I stay ready fo go prison an mahke wit you.” 34Jesus tell, “I tell you, Peter, befo da roosta crow early today, three time you goin tell dat you donno who me.”
Da Money Bag, Da Clothes Bag, An Da Sword
35 # Matt 10:9-10; Mark 6:8-9; Luke 9:3; 10:4 Den Jesus tell dem, “Wen I wen sen you guys out befo time, an you no mo money bag, o bag fo yoa clotheses, o slippas, you neva need notting moa, aah?”
Dey tell, “No.”
36Jesus tell, “But now, whoeva get one money bag o one bag fo clotheses, take um. An da guy dat no mo sword, good he sell his coat fo buy one sword. 37#Isa 53:12Cuz I stay tell you, da place inside da Bible dat tell, ‘Dey wen put him wit da crooks,’ dass da way gotta happen to me. Wat da Bible wen tell bout me befo time, eryting stay happen jus lidat.” 38Dey tell, “Eh Boss, get two swords ova hea awready.” He tell um, “Dass enuff.”
Da Olive Ridge
(Matthew 26:36-46; Mark 14:43-50; John 18:3-11)
39Jesus go da Olive Ridge, jalike he erytime go. His guys go too. 40Wen dey come dea, he tell um, “Go aks God fo help you guys fo no do bad kine stuff wen get chance.”
41Den he go litto bit mo down ony him. He go down on his knees, an tell God fo help him 42like dis: “Faddah, if you like, no let me suffa lidis. But gotta be da way you like, not da way I like.” 43[One angel guy from Da One In Charge Up Dea Inside Da Sky show up by Jesus an kokua him.] 44Jesus suffa plenny, an pray mo hard. He sweat jalike blood drip down on top da groun.
45Wen Jesus pau pray, he stan up an go back by his guys, an find dem all sleeping. Dey wore out, cuz dey sad. 46He tell dem, “How come you guys stay sleeping? Get up an tell God fo help you guys no do bad kine stuff wen get chance.”
Da Temple Guards Bus Jesus
(Matthew 26:47-56; Mark 14:43-50; John 18:3-11)
47Wen Jesus still stay talking, plenny peopo come ova dea. Judas, one a Jesus twelve guys, he bring dem. He come by Jesus fo kiss him. 48But Jesus tell him, “Judas, I da Fo Real Kine Guy. Wot! You goin set me up wit one kiss?!”
49Wen Jesus guys figga wat goin happen, dey tell, “Boss, you like us wack dem wit oua swords?” 50Den one a dem go afta one guy dat work fo da Main Pries Guy, an cut his right ear off.
51But Jesus tell, “No do dat no moa!” An he touch da guy ear an make him come good.
52Den Jesus tell da Main Pries guys, da captains fo da Temple guards, an da older leadas dat come ova dea fo take him, “You guys tink I one crook o wat? How come you guys tink you gotta come ova hea wit swords an clubs fo bus me up? 53#Luke 19:47; 21:37Ery day I wen stay inside da open lanai fo da Temple wit you guys, an you guys neva bus me. But dis yoa time. Dis da dark time, wen da Bad Guy Satan get powa fo do his stuff.”
Peter Tell He Donno Jesus
(Matthew 26:57-58, 69-75; Mark 14:53-54, 66-72; John 18:12-18, 25-27)
54Afta dey bus Jesus, dey take him away inside da Main Pries Guy house. Peter go too, but he stay far. 55Dey make one fire inside da open lanai, an sit down by um togedda. Peter sit down wit um. 56One worka girl spock Peter sitting dea by da fire. She look strait at Peter, an tell da odda guys, “Dis guy was wit Jesus!”
57But Peter tell, “No way, girl! I donno da guy!”
58Bumbye one guy spock Peter an he tell, “You one a dem too!”
Peter tell, “No way, brah!”
59Bout one hour layta anodda guy tell, “Fo shua dis guy stay wit Jesus, cuz he come from Galilee.”
60But Peter tell, “Eh, brah, I donno wat you talking bout!” Peter still talking, an da roosta crow. 61Jesus, Da One In Charge, wen turn an look at Peter. Den Peter no foget wat Da One In Charge wen tell him, “Befo da roosta crow tonite, you goin tell three time you donno me.” 62Den Peter go outside an cry real hard.
Dey Make Fun A Jesus An Bus Um Up
(Matthew 26:67-68; Mark 14:65)
63Da guards make fun a Jesus an bus um up. 64Dey cova his eyes wit one rag, an give um plenny false crack, an tell him, “Eh, you one guy dat talk fo God, aah? So, tell us who wen hit you!” 65An dey talk any kine to him.
Jesus In Front Da Main Leada Guys
(Songs 110:1)
66Wen da sun come up, da older leadas fo da peopo, da Main Pries guys, an da teachas dat teach da Rules From God come togedda, an bring Jesus in front dem. 67Dey tell, “If you da Spesho Guy God Wen Sen fo real kine, go tell us.”
Jesus tell dem, “If I go tell you guys, you no goin tink wat I go tell az fo real kine. 68An if I go aks you guys one question, you no goin tell me notting. 69I da Fo Real Kine Guy. Afta dis I goin sit down da importan place by God right side. He da One dat get all da powa.”
70Dey all tell, “So you God Boy, o wat?”
He tell dem, “Dass right, wat you guys tell.”
71Den dey tell, “No need mo guys fo talk bad bout him! We jus wen hear wat he tell!”

Currently Selected:

Luke 22: HPB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy