John 21
21
Jesus Talk To His Guys
1An den, afta dat, Jesus let his guys see him one mo time. Dis happen by Lake Tiberias, da Galilee Lake. Dis wat wen happen: 2Some a Jesus guys come togedda. Get Simon Peter, an Thomas da guy dey call Da Twin, Natanael da guy from Cana town Galilee side, an Zebedee two boys, plus two odda guys dat Jesus stay teach. 3#Luke 5:5Simon Peter tell da guys, “Eh, I like go fish!”
An dey tell um, “Yeah! We like go too.”
So da guys go down to da beach, an dey go inside one boat. But dat nite, dey neva catch notting.
4Den wen real early in da morning wen get ony litto bit light, Jesus stay standing dea on top da beach. But his guys, dey neva know was him. 5Jesus tell um, “Eh! Wat you guys catch?”
Dey tell, “Whitewash! No mo notting!”
6 #
Luke 5:6
Den he tell um, “Go lay da net ova da right side! You goin get plenny fish dea!”
Dey lay da net, an catch choke plenny fish, so da guys no can pull up da net.
7Me, I was dea too. I da guy dat Jesus get plenny love an aloha fo. I tell Peter, “Eh! Dass Da One In Charge!” Wen Simon Peter hear dat, he put on his shirt dat he take off befo he go work, an den he jump outa da boat fo swim quick to da beach, 8cuz da boat ony stay bout hundred yard from da beach. So den Jesus odda guys row da boat back to da beach, an drag da net wit all da fish inside on top da beach.
9Wen da guys jump outa da boat, dey spock one charcoal fire on top da beach. Get one fish on top da charcoal an get bread. 10Jesus tell um, “Eh, bring some a da fish you guys wen catch ova hea.”
11So Simon Peter go back inside da boat an help da guys drag da net on top da beach. Had choke plenny big kine fish inside—hundred fifty three! An you know wat? Da net neva even broke, no matta had choke plenny fish inside.
12Jesus tell um, “Come on, you guys! Breakfas stay ready awready!”
His guys, dey know awready was him, Da One In Charge. Dey too sked fo aks him, “Who you?” 13Den Jesus go ova dea, an take da bread an give um to his guys. Same ting wit da fish. 14Az was three time Jesus let da guys see him afta he come back alive from mahke.
Jesus An Peter
15Afta dey pau eat, Jesus go aks Simon Peter, “Eh Simon, John boy. Tell me dis: You get mo plenny love an aloha fo me den dese guys get, o wat?”
Peter tell um, “Eh, fo shua, Boss. You know I yoa fren.”
Jesus tell um, “Kay den. Feed my bebe sheeps.”
16Den Jesus go aks um one mo time, “Eh Simon, John boy. You get love an aloha fo me, o wat?”
Peter tell um, “Eh, fo shua, Boss! You know I yoa fren.”
Jesus tell um, “Kay den. Take kea my sheeps.”
17-18An den one mo time, Jesus go aks um, “Eh Simon, John boy. You my fren, o wat?”
Den Peter come all hurt inside, cuz now three time awready Jesus go aks him. He tell, “You my fren, o wat?” So Peter tell um, “You Da One In Charge! You know eryting! You know I yoa fren.”
Jesus tell um “Dass right! An I tell you dis too: Feed my sheeps. Befo time, wen you was one young guy, you put on yoa clotheses an yoa belt an go wea eva you like. Bumbye, you goin come one ol guy. Den you goin stick out yoa hands an anodda guy goin tie you up an bring you one place you no like go.” 19(Jesus talk lidat fo tell Peter wat goin happen bumbye, how Peter goin mahke fo show how awesome God stay.)
Den Jesus tell um, “Stay tight wit me an be my guy.”
Da Guy Dat Jesus Love Plenny
20 #
John 13:25
Peter turn aroun, an spock me walking behind dem. I one a Jesus guys, da one Jesus get plenny love an aloha fo. I da guy dat wen sit by Jesus da time dey eat da Passova food, an I wen aks Jesus, “Eh Boss, who da guy dat goin set you up fo mahke?” 21Wen Peter spock me, he go aks Jesus, “Eh Boss! Wat bout dis guy? Wat goin happen to him?”
22Jesus tell um, “So, wat if I like him stay alive till I come back? Bodda you? You, stay tight wit me!”
23Cuz a dat, Jesus odda guys stay tell each odda, “Dat guy John, he no goin mahke, eva.” But Jesus neva tell um dat I no goin mahke, eva. He ony tell, “So, wat if I like fo da guy stay alive till I come back? Bodda you?”
One Mo Ting
24An you know who dat guy dat Jesus talk bout, aah? Was me, John! Jesus, he my teacha. I stay tell you guys all dis stuff. I wen see um happen, an I wen write um all down. An we all know da stuff I stay tell you guys, dat stuff stay true.
25An get plenny mo odda kine stuff Jesus do. If somebody wen try write all dat Jesus wen do, from da time he start till pau, I figga da whole world no mo room fo get all da kine books bout um.
Currently Selected:
John 21: HPB
Highlight
Share
Copy
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible