YouVersion Logo
Search Icon

JUAN 18

18
Ku ja Jesús ojts yikmach
1Xjats ku ja nwɨndsønꞌa̱jtɨm Jesús jadeꞌen wyɨnaty tø wya̱ꞌa̱ñ, wɨnets ja tmøøtsøøꞌñ ja pyabøjkpɨtøjk, jøts ja ñøjkxwa̱ꞌa̱ndɨ jam jaduktama̱jñ ku ja ttana̱xtɨt ja nøø midi yiktejp Cedrón. Jam tuꞌuk ja ka̱m ma̱ yꞌity øy ti tsa̱ꞌa̱m, jamts ja nwɨndsønꞌa̱jtɨm Jesús tmøøtkuyøꞌøyɨyɨɨꞌñ ja pyabøjkpɨtøjk. 2Jøts ja Judas, pøn ja wyɨnaty ɨxam kaꞌødyunwa̱jnɨp, wa̱ꞌa̱ts ja tꞌijxyꞌaty jaꞌabɨ et, pø jamxɨ ja nwɨndsønꞌa̱jtɨm Jesús wyɨnaty kawɨna̱a̱k ojk tø ñamyukyɨdɨ møøt ja pyabøjkpɨtøjk. 3Jadeꞌenꞌampyts ja Judas jam ojts tmøøtja̱ꞌa̱ty tukpiky ja solda̱dɨtøjk møøt ja ja̱a̱ꞌdyɨ midi tꞌejxꞌejttɨp ja tsa̱ptøjk, ja teetywɨndsøndøjk ja fariseotøjk ja kajxɨdɨp, tumdaꞌoꞌjk møøt ja jam yja̱ꞌttøø kunøꞌøky. 4Ñɨja̱ꞌwɨñɨp ja nwɨndsønꞌa̱jtɨm Jesús ja wyɨnaty sa̱ jaty ja yja̱twa̱ꞌa̱ñ kyubatwa̱ꞌa̱ñ, wɨnets ja twɨnguwa̱ꞌjkɨyɨɨꞌñ, jøts ja tyiktɨɨy:
―¿Pøn døꞌøn mꞌɨxaadyɨp?
5Jøts ja ojts yɨdeꞌen yꞌadsowdɨ:
―Ja Jesús øø nꞌɨxaapy, ja Nazaretɨt ja̱a̱ꞌy.
Jøts ja nwɨndsønꞌa̱jtɨm Jesús ja tꞌadsøøy:
―Øtsɨmts jaꞌ.
Jøts ja Judas midi kaꞌøyꞌadøtsp, ɨxam ja tmøødɨ ja mayja̱a̱ꞌy. 6Jøts ku ja nwɨndsønꞌa̱jtɨm Jesús wya̱a̱ñ: “Øtsɨmts jaꞌ”, wɨnets ja jadiꞌiñɨ yꞌɨxnøjkxtøø jøts ja kya̱ꞌtsjɨmbejttøø. 7Wɨnets ja nwɨndsønꞌa̱jtɨm Jesús ja jadɨgojk tyɨɨbyøjkɨdøø, jøts ja ñɨma̱a̱jyɨdøø:
―¿Pøn døꞌøn mꞌɨxaadyɨp?
Jøts ja wya̱ndøø:
―Ja Jesús, ja Nazaretɨt ja̱a̱ꞌy.
8Jøts ja nwɨndsønꞌa̱jtɨm Jesús ja tnɨma̱a̱y:
―Tøxɨ nnɨgajpxy jøts ku ja yꞌøtsɨ. Pønɨ øts tam xꞌɨxaadyɨp, majtstuꞌuttɨts øts yø nbabøjkpɨtøjk.
9Jadeꞌenꞌampy ja jadeꞌen yjaty, jøts ja jadeꞌen kaꞌpxy tyimyjaty ku ja nwɨndsønꞌa̱jtɨm Jesús wyɨnaty yɨdeꞌen køꞌøm tø wya̱ꞌa̱ñ: “Pøn jaty øts ja Dios Teety tø xagødøkɨ, nɨ tuꞌugɨn ja tø kyawɨndɨgøydɨ.” 10Jøts ja Simón Pedro jam wyɨnaty tø tnɨxa̱jɨ tuꞌuk ja tsujx, jaꞌats ja ojts tjuuty, jøts ja ttaxɨkpoꞌotuujty ja ja̱a̱ꞌy midi txøøwꞌa̱jtp Malco, ojts yꞌaga̱ꞌndya̱tsk ja tyimgyajtspoꞌjtɨyɨ, ja teetywɨndsøndøjk ɨdøꞌøn ja tyumbɨ jadeꞌen ja̱jtp. 11Yɨdeꞌen ja nwɨndsønꞌa̱jtɨm Jesús tnɨma̱a̱y ja Pedro:
―Pɨkta̱ꞌa̱k yø mdsujx nay jap ma̱ tø xjuuty. ¿Sa̱ me mwɨnmay, uk ja øts ɨdøꞌøn xijy ngagupøkt ja ayoꞌon midi øts ja Dios Teety tø xanɨbɨkta̱a̱gɨ?
Ku Jesús yiknajtswa̱a̱ꞌwɨyɨɨꞌñ jam ma̱ teetywɨndsøn
12Xjats ja solda̱dɨtøjk, møøt jaꞌ pøn tnɨguba̱jkꞌa̱jtp jøts møøt ja tsa̱pta̱jk, ojts tma̱tstɨ ja nwɨndsønꞌa̱jtɨm Jesús, jøts ja ojts tkøwøøndɨ tkøxojtstɨ. 13Jøts ja tyiknøjkxtøø ma̱ ja Anás jam tyøjk midi ja Caifás tyeety myøꞌjtɨp, midi jam wyɨnaty jaꞌabɨ jumøjt teetywɨndsønꞌa̱jtp. 14Nayɨ Caifás ɨdøꞌøn wyɨnaty yɨdeꞌen tø tnøjmɨ ja israelɨt ja̱a̱ꞌy, jøts ku neꞌegɨ jadeꞌen tyimyꞌøyꞌa̱tt jøts tuꞌugyɨ ja ja̱a̱ꞌy tkuꞌoogɨt ja ka̱jp.
Ku ja Pedro tkuꞌɨɨñ jøts ku ja kaꞌ tꞌijxyꞌaty ja Jesús
15Jøts ja Simón Pedro møøt jaduꞌuk ja myɨbabøjkpɨ tpanøjkxtɨ ja nwɨndsønꞌa̱jtɨm Jesús. Jøts yikꞌijxyꞌa̱jtp jaꞌ ja yjaduꞌukpɨ, ijxyꞌa̱jtɨp ja teetywɨndsøn jaꞌ, jaꞌats jap tyimyøøtøjkɨmya̱a̱ ja nwɨndsønꞌa̱jtɨm Jesús jap wɨndsøn tyøjkꞌaguiꞌpy; 16jøts ja Pedro jap tya̱a̱ñ ma̱ yiknɨdøkɨ ja tøjk. Jaꞌats ja yjaduꞌukpɨ jap ñɨbɨdsøøm midi ijxyꞌa̱jtp ja teetywɨndsøn, jøts ja ojts tmɨnagyajpxyɨ ja tøꞌøxyøjk midi jap tøjkꞌadɨnaapy, jøts ja tyiktøjkɨyɨɨꞌñ ja Pedro. 17Wɨnets ja tøꞌøxyøjk midi tøjkꞌadɨnaapy, yꞌamɨdoojøø ja Pedro:
―¿Kidi metsɨp yø ja̱a̱ꞌy mbabøjkpɨꞌajtpy?
Jøts ja Pedro tꞌadsøøy yɨdeꞌen:
―Kaꞌ, kaꞌaxɨ ja yꞌøtsɨ.
18Jøts kumɨ xujxpts wyɨnaty, jøts ja tumbɨtøjk jøts ja tsa̱ptøjkta̱jk jap ja wyɨnaty tø tyikmøjɨdɨ ja jøøn, jaꞌats ja jap wyɨndanaadyɨp jøts ja jap xya̱mdɨ. Jøts ja Pedro ɨxam ɨdøꞌøn ja tmøøtxa̱mɨ.
Ku ja teetywɨndsøn tyiktøøbɨna̱xwa̱ꞌa̱ky ja Jesús
19Xjats ja teetywɨndsøn tyiktøøbɨna̱xwa̱a̱jky ja nwɨndsønꞌa̱jtɨm Jesús pøn jaty ɨdøꞌøn pyabøjkpɨtøjkꞌajtpy, jøts ti døꞌøn ja ña̱nkyꞌɨxpøjkɨp. 20Jøts ja nwɨndsønꞌa̱jtɨm Jesús ja tꞌadsøøy:
―Tø ø ngajpxy mayja̱a̱ꞌyꞌagujky øy ma̱dsoo; ejtp ø nyikꞌɨxpiky ma̱ jaty tsa̱ptøjk, jøts nayɨdeꞌen ma̱ ja møj tsa̱ptøjkmɨ ma̱ israelɨt ja̱a̱ꞌy ñamyukyɨdɨ, jøts kaꞌap øts øy ti nꞌamaaꞌtskꞌaty ku ø ti nnɨgajpxy. 21¿Tigøjxp ku øts ja xyiktɨy? Jaꞌ mets ja myiktøꞌøp pøn jaty ø tø xmadoojɨ, jøts wan ja tnɨga̱jpxtɨ pønɨ sa̱ jaty øts ɨdøꞌøn ja tø nnøjmɨdɨ. Jaꞌ ja tnɨja̱ꞌwɨdɨp pønɨ sa̱ jaty øts ja tø nnøjmɨdɨ.
22Xjats ku ja nwɨndsønꞌa̱jtɨm Jesús jadeꞌen wya̱a̱ñ, jøts nɨduꞌugɨn ja tsa̱pta̱jk ja ojts wyɨngugoxɨyɨ, jøts ja ñɨɨꞌmxyɨyɨ:
―¿Jadeꞌen yø mꞌa̱a̱w xaꞌadsøy jøts jadeꞌen xnøjmɨt yø teetywɨndsøn?
23Jøts ja nwɨndsønꞌa̱jtɨm Jesús ja yɨdeꞌen tꞌadsøøy:
―Pønɨ tødam ø nga̱jpxɨgøy, nɨga̱jpxts midiꞌibɨ døꞌøn mgaꞌømyadøøpy; jøts pønɨ øydam jadeꞌen sa̱ ø tø nwa̱ꞌa̱ñ, ¿tits ku øts xkøxy?
24Wɨnets ja Anás ja ojts kyexyɨ wɨɨñ keꞌkxy, jøts ja jam ñøjkxt ma̱ ja Caifás, midi teetywɨndsønꞌa̱jtp.
Ku Pedro jadɨgojk wya̱ꞌa̱ñ ku ja kaꞌap tꞌejxɨ ja Jesús
25Ɨxajp ɨdøꞌøn ja Pedro tyanɨ, yjooꞌkxpiky jap jønꞌajpy, ku ja yiknɨma̱a̱y:
―¿Kidi metsɨp yø ja̱a̱ꞌy mbabøjkpɨꞌajtpy?
Jøts ja Pedro ja kaꞌ tkupiky, yɨdeꞌen ja wya̱ngojmɨ:
―Kaꞌ, kaꞌaxɨ ja yꞌøtsɨ.
26Wɨnets ja yiktøøjɨ tuꞌuk ja teetywɨndsøn tyumbɨ midi ja ja̱a̱ꞌy myɨguꞌukꞌajtpy, midi ja Pedro wyɨnaty tø txɨktsajtstuꞌuty jøts ja tya̱tsk tyimyikwɨna̱jkɨyøø, jaꞌats wa̱a̱n:
―¿Kidi metsɨp jap tø nꞌixy jøts ku mets ja jap yꞌity xmøødɨ jap tsa̱ꞌa̱mga̱mjøtpy?
27Jøts ja Pedro ja jadɨgojk kaꞌ tkupøjkojmɨ, wɨnets nay jatyɨ yꞌaya̱a̱jxy tuꞌuk tsa̱pnɨꞌa̱a̱w.
Ku Jesús twɨnguwa̱ꞌjkɨyɨɨꞌñ ja Pilato
28Jøts ja nwɨndsønꞌa̱jtɨm Jesús ojts yikwa̱a̱dsøøñ jam Caifás tyøjkjotp, jøts ja yikwa̱a̱nijkxy ma̱ ja møj wɨndsøn kyutujkta̱a̱jk jam. Xɨɨjñɨwya̱nɨp, jøts ja israelɨt ja̱a̱ꞌy nɨkaꞌap tyøjkɨdøø jap kutujkta̱a̱jkjøtpy, jøts ja kaꞌap tyiktɨgøøwya̱ꞌa̱ndɨ ja kyostumbrɨ, pøky ɨdøꞌøn jaꞌ ku ja jadeꞌen yꞌadøꞌøtstɨt, kaꞌap ja tꞌukaañɨdɨt ja pa̱skɨ xøgaaky ja pa̱skɨ xøꞌuuky ku ja aꞌux ja tyikna̱xtɨt. 29Jaꞌagøjxp ja møj wɨndsøn Pilato jam ojts pyɨdsimy jøts ja myɨga̱jpxwa̱ꞌa̱ñɨdɨ, yɨdeꞌen ja ojts ñɨɨꞌmxyɨdɨ:
―¿Ti yø ja̱a̱ꞌy mdanɨꞌøøꞌnɨdɨp?
30Jøts ja yꞌadsoodøø:
―Ku yø jeexyɨp kyapøkyja̱a̱ꞌyɨ kaꞌ mets yø jeexyɨp ya̱ tø myiktagødøkɨ.
31Wɨnets ja Pilato ja ñɨma̱a̱jyɨdøø:
―Møødɨdɨ, jøts xɨɨdyuꞌundɨt jadeꞌen pønɨ sa̱ ja mgutujk wya̱ꞌa̱ndɨ.
Jøts ja israelɨt ja̱a̱ꞌy yꞌadsoodøø:
―Øøts, kaꞌap øøts xpa̱a̱tꞌaty jøts øøts øy pøn nyikꞌookt.
32Jadeꞌen ja ojts kaꞌpxy yjaty sa̱ ja nwɨndsønꞌa̱jtɨm Jesús ja wyɨnaty tø tnɨgajpxy jøts ku ja jadeꞌen yꞌookt. 33Xjats ja Pilato jap jadɨgojk tyøjkɨyɨɨꞌñ jap kyutujkta̱a̱jkjøtpy, jøts ja ojts tya̱jxɨ ja nwɨndsønꞌa̱jtɨm Jesús, jøts ja tꞌamɨdøøy:
―¿Mets ɨdøꞌøn israelɨt ja̱a̱ꞌy mjanchwɨndsønꞌa̱jtɨp?
34Jøts nwɨndsønꞌa̱jtɨm Jesús ja tnɨma̱a̱y:
―¿Køꞌøm mets jadeꞌen mwɨnmay jøts mets jadeꞌen xyiktɨy, uk pøn jadeꞌen tø mdamɨmadya̱ꞌa̱gyɨ jøts ku ø njaꞌajɨ?
35Jøts ja Pilato ja yꞌadsoojøø:
―¿Ti israelɨt ja̱a̱ꞌyɨmts øts? Køꞌømxɨ yø mmɨguga̱jp jøts yø teetywɨndsøndøjk ya̱ myikmiñɨyɨ jøts mets ya̱ nyiktagødøkɨ. ¿Ti døꞌøn tø xuñ?
36Jøts nwɨndsønꞌa̱jtɨm Jesús ja yɨdeꞌen tꞌadsøøy:
―Wɨndsønꞌa̱jtp øts, kaꞌ øts njaꞌ yjadeꞌenɨ sa̱m pøn yjaꞌ ya̱ na̱xwiiñ. Ku jeexyɨp jadeꞌen, tø øts nbabøjkpɨtøjk jeexyɨp xnɨtseptunɨdɨ, jøts øts jeexyɨp ngayiktagødøkɨ ja israelɨt ja̱a̱ꞌy. Kaya̱a̱ꞌɨp øts ngutujk.
37Wɨnets ja Pilato ja ojts ñɨɨꞌmxyɨyɨ:
―¿Jøts mjanchwɨndsøn mets ɨdøꞌøn?
Jøts nwɨndsønꞌa̱jtɨm Jesús ja tꞌadsøøy:
―Jaꞌ øts sa̱ ɨxa mwa̱ꞌa̱ñ, wɨndsøn øts. Tø ø ngaxɨꞌɨky ku øts ya̱ na̱xwiiñ tø nmiñ jøts ø nnɨga̱jpxt ti tɨyꞌa̱jtɨnꞌa̱jtp, ti janchꞌa̱jtɨnꞌa̱jtp. Pøn jaty ja xmɨmadoodɨp, xmadojɨdɨpts øts njaꞌ jaꞌ sa̱ jaty ø nwa̱ꞌa̱ñ.
38Jøts ja Pilato ja ojts ñɨɨꞌmxyɨ:
―¿Jøts ti døꞌøn tɨyꞌa̱jtɨnꞌa̱jtp janchꞌa̱jtɨnꞌa̱jtp?
Ku Jesús ñɨdujkɨyɨɨꞌñ jøts ja yꞌookt
Jøts ku ja Pilato jadeꞌen tꞌukyiktɨɨy, jøts ja ojts pyɨdsimy jøts ja tmɨnagya̱jpxwa̱ꞌa̱ñɨ ja israelɨt ja̱a̱ꞌdyɨ, jøts ja tnɨma̱a̱y:
―Kaꞌ øts yø ja̱a̱ꞌy nbøkyꞌixy. 39Jadeꞌents mee xkostumbrɨꞌaty jøts øts nɨduꞌugɨn nyikꞌawa̱ꞌa̱tspɨdsøꞌømt ja pøkyja̱a̱ꞌy, ku meets ja xꞌamɨdøy ku pa̱skɨ xøøw: ¿jøts mdsojktɨp jøts wan øts yø mwɨndsøn tnajtsma̱tsɨ jadiꞌiñɨ?
40Wɨnets ja nɨdukɨꞌɨyɨ møk wya̱ndøø:
―¡Kaꞌ yøꞌ xyikꞌawa̱ꞌa̱tspɨdsøꞌømt! ¡Yø Barrabás myikꞌawa̱ꞌa̱tspɨdsøꞌømp!
Jøts møj maaꞌtspɨ døꞌøn ja Barrabás.

Currently Selected:

JUAN 18: mxp

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy