HEBREOS 1
1
Dios Uꞌnk køjxp adøm ja Dios Teety xmɨgajpxyɨm
1Janch tɨgach ɨdøꞌøn ja Dios Teety yꞌijty ña̱nkyꞌijxyɨyɨ, ku døꞌøn ja kyugajpxy ttuknɨja̱wɨwya̱ꞌa̱ñ pønɨ ti jaty ɨdøꞌøn ja tyukmadowampy ja møja̱a̱ꞌdyøjktɨ. 2Ɨxya̱mnɨm ɨdøꞌøn ja kyøꞌøm Uꞌnk kugajpxy tø tkexy. YꞌUꞌnk køjxp ɨdøꞌøn ja Dios Teety ojts tukɨꞌɨyɨ tyikꞌøyɨ ja na̱a̱jx jøts ja tsa̱jp, jøts nay ja yꞌUꞌnk tø ttagɨdøjkɨguixy køx kɨda̱ꞌa̱k midi ja wyɨnaty tø tyikꞌøyɨ. 3Ja Dios Uꞌnk ɨdøꞌøn tna̱nkyꞌejxɨp ja Dios Teety ja myøjꞌa̱jtɨn, jøts nayɨ jaꞌ ja tna̱nkyꞌejxɨp sa̱ døꞌøn ja Dios Teety tꞌixy; nay jaꞌats ja myøkwɨnma̱a̱ꞌñ ja myøkꞌayuujk tpatanaagyøjxp tuktsa̱jpꞌagɨda̱ꞌa̱ky ja pɨkta̱ꞌa̱ky midi ja Dios Teety tø tyikøjy. Ja Dios Teety ja møøt yikutuky yꞌaga̱ꞌngyøjøꞌøm jam tsa̱jpjotp, ku adøm ja ya̱ jawyeen tø xꞌukyikpojkpɨwa̱a̱jchɨm.
Jawaanɨ møj ja Dios Uꞌnk, kaꞌap ja a̱nkɨlɨs jadeꞌendɨ
4Tø ja Dios Uꞌnk jawaanɨ møj wyɨmbɨdsimy jøts ja Dios Teety yꞌa̱nkɨlɨs neꞌegɨ kaꞌ, jaꞌagøjxp ku ja Dios Uꞌnk tø tmɨdañ jawaanɨ møj ja kutujk. 5Jabɨ nɨjuunɨxɨ ja Dios Teety tkanɨma̱a̱y tuꞌuk ja yꞌa̱nkɨlɨs yɨdeꞌen:
Mets ɨdøꞌøn nꞌUꞌnkꞌajtpy;
øts mets ja jujkyꞌa̱jtɨn tɨ nmøꞌøy,
nɨ ja Dios Teety tkanɨmaamyɨ tuꞌuk ja yꞌa̱nkɨlɨs:
Øts me nꞌuꞌnkꞌa̱tp,
jøts øts me xeetyꞌa̱tp.
6Yɨdeꞌents tø wya̱mɨ ku ja myøjtuꞌumts Uꞌnk tø xanɨguejxyɨm ya̱ na̱xwiiñ:
Wan nɨdukɨꞌɨyɨ øts ja nꞌa̱nkɨlɨs mwɨndsøꞌøgɨyɨ.
7Ku ja yꞌa̱nkɨlɨs tnɨmadya̱jkmɨ, yɨdeꞌen ja Dios Teety wya̱ꞌa̱ñ:
Øy øts ja nꞌa̱nkɨlɨs o sa̱ nna̱nkyꞌejxɨyɨt,
nayɨdeꞌen sa̱m ja pojɨn, uk sa̱m ja jøøn yowɨn.
8Kuts ja yꞌUꞌnk tnɨmadya̱ꞌa̱ky yɨdeꞌents ja tnɨmaamyɨ:
Xemɨkøjxp me Dios Uꞌnk mgutujk yꞌity;
tɨy mets mgutujk ja mdɨɨdyuꞌunɨn yꞌity.
9Mdsøkyꞌajtpy mets ja tyɨɨbyɨ jøts kaꞌ xꞌejxwa̱ꞌa̱ñ ja kaꞌøybɨ;
paty ja mDios Teety jawaanɨ øy ja jotkujkꞌa̱jtɨn tø mmøꞌøyɨ,
jøts nɨ kaꞌap jadeꞌen o pøn tø yiktuñ.
10jøts nayɨdeꞌen wya̱mɨ:
Mets Dios Uꞌnk, tø xanɨbɨkta̱a̱jkɨguixy tukɨꞌɨyɨ ku yø na̱xwiiꞌñɨt tø xyikøjy,
jøts mgøꞌjotp ja tsa̱jp tø pyɨdsimy.
11Køxtɨp na̱xtɨp yøꞌ, jøts mets xemɨkøjxp me mdañ.
Nayɨdeꞌen yø yja̱ttɨt sa̱m wet pyachɨ;
12jøts mets ja xpøkjøꞌøkt aneꞌeky adeꞌkxy, jøts jadɨgojk xyikjemyɨt xyikꞌøyɨt.
Mets ɨdøꞌøn xemɨkøjxp jadeꞌeñɨm mꞌejtp, nɨjuunɨ xøøw mets mdsɨna̱a̱ꞌyɨn kyakixy.
13Jøts nɨjuunɨ ja Dios Teety tuꞌuk ja yꞌa̱nkɨlɨs tkanɨma̱a̱y:
Ya̱ yikutuk nꞌaga̱ꞌngyøjɨꞌjy,
kunɨmts mets mmɨdsep nduktekpyaꞌanꞌa̱tt.
14Dios Teety ɨdøꞌøn myɨdundɨp nɨdukɨꞌɨyɨ ja a̱nkɨlɨs, nayɨ Dios Teetyts kajxɨdɨp jøts tpudøkɨdɨt pøn jaty ja nɨtsoꞌokꞌa̱jtɨn tkupøkwa̱ndɨp.
Currently Selected:
HEBREOS 1: mxp
Highlight
Share
Copy
Want to have your highlights saved across all your devices? Sign up or sign in
© 1987, Wycliffe Bible Translators, Inc. All rights reserved.