San Juan 18
18
Hacutjin camá xi cachjahá rë Jesucristu
1Hya xi camá ne, xi cavatju cachja Jesús cjua vëhë ne, sehe cavetju me quiji me cojo xuta ladu rë me ngunda vëhë tsëhë caniña Cedrón. Hane ngajan cavisehen Jesús cojo xuta ladu rë me ngu ngajñi yatjë xi tjin jan. 2Quihndë ne, cha Judas, cha xi sahmi rë entregadu Jesús ne, hacuaha vëë cha cahndë́ vëhë ta, jemu quiji Jesús cahndë́ vëhë camatangun me cojo xuta ladu rë me. 3Ngajan xi cha Judas ne, quijicojo cha ngujo sindadu cojo cha mayu cojo cha nisë rë cha, cha xi catsingatju nahmi xi matitjun cojo cha fariseo. Quiji cha xi cuacun jan ngajan cojo ndihi cojo quicha. 4Hane Jesús ne, tsëhë xi ha vëë me yëjë xcusun xi cuatju me cuma ne, quijivaha me xcun cha xi cuacun jan, sehe cavinenguise me cha cuitjin:
―¿Yo xi meje nuju? ―Cuatjin cavinenguise me.
5Ngajan xi cha xi cuacun jan ne, cuitjin cafayangui cha:
―Xuta Nasaret xi hmí rë Jesús. ―Cuatjin cafayangui cha.
Hane Jesús ne, cuitjin cachja me:
―Ngahan xi nújun vë. ―Cuatjin cachja me.
Quihndë ne, Judas, cha xi sahmi rë me entregadu ne, cojo cha secun cha cojo cha xi cuacun vë. 6Hane hya xi cachja Jesús xi: “Ngahan xi nújun vë” ne, quijingaxtun yëjë cha xi cuacun jan, hane caticja cha. 7Ngajan xi Jesús ne, cavinenguise nga me cha cuitjin:
―¿Yo xi meje nuju? ―Cuatjin cavinenguise me.
Hane cha xi cuacun jan ne, cuitjin cachja nga cha:
―Xuta Nasaret xi hmí rë Jesús. ―Cuatjin cachja cha.
8Hane Jesús ne, cuitjin cafayangui me:
―Ha cachjá cojo nuju ta ngahan xi nújun vë. Sa xi ngahan meje nuju ngahan ne, tuhun cahndë́ catje me xi cuicun vi. ―Cuatjin cafayangui me.
9Cuatjin cachja Jesús cjua vëhë cojo sa xi cuetjucaa cjua xi ha cachja me cuitjin: “Xuta xi catuhun ná me ne, hisca ngu me catsichajan me.” 10Ngajan xi Simón Pedru ne, cavaxë me quichandujú xi yaha me, hane cavatësun me tyjavañuju quixi mosu hndixahan rë nahmi xi matitjun jan, cha xi hmí rë Malco. 11Ngajan xi Jesús ne, cuitjin cachja me cojo Pedru:
―Teyunndujun quicha nuju vë. Hatuxa tsingatehen xi cuátju cjuañihi sacuatjin xi meje rë Nina Nahmi naja. ―Cuatjin cachja Jesús.
Nahmi xi matitjun ne, sahmi cuenda me jyë́ rë Jesús
12Hya xi camá ne, cha sindadu cojo capitán rë cha, cojo mayu cojo cha nisë rë cha, cha xi catsingatju xutaxa rë yungun jan ne, cafaha cha Jesús, catsihñu cha me, 13sehe quiji cani cha me titjun xcun Anás. Anás vë ne, nahmichahya rë Caifás má me. Hane nu vëhë ne, nahmi xi matitjun tsëhë yëjë ni nahmi má Caifás. 14Quihndë ne, Caifás vë ne, me vëhë xi cavinchangui me xutaxa rë xi ndaja tsëhë xutaxa rë xi ngu xihin ni cueya ngatsë rë yëjë ni xuta.
Chja Pedru xi hacuiin ladu rë Jesucristu má me
15Quihndë ne, Simón Pedru cojo ngu sa cha ladu rë Jesús jan ne, tjengui me quiji me cojo Jesús. Hane cha ladu rë Jesús xingu jan ne, tsëhë xi vëë nahmi xi matitjun jan cha ne, cojo cha cavisehen cha cojo Jesús cahntsua hnchua ndatsen ndava nahmi xi matitjun jan. 16Peru Pedru ne, casecun ni me ngajan candatsen tingotjo hnchua jan. Ngajan xi cha ladu rë Jesús xi vëë nahmi jan ne, cavetju nga cha quiji cachja cha cojo na xi quitahá cuidadu rë tingotjo hnchua jan. Hane sehe catsinguisehen cha Pedru cahntsua hnchua. 17Hane na xi sahmi cuidadu tingotjo hnchua jan ne, cuitjin cavinenguise rë na Pedru:
―¿Hacuiin cojo ngayun má ngayun ladu rë me xi cuajyihi vë? ―Cuatjin cavinenguise na.
Hane Pedru ne, cuitjin cafayangui me:
―Jéya, hacuiin. ―Cuatjin cafayangui me.
18Hane mosu rë nahmi jan cojo cha sindadu jan ne, cavejña cha ngu ndava ndihi, tsëhë xi jemu hnchan. Sehe hinchacun cha tijima hasu rë cha jan. Hacuaha cojo Pedru secun me jan, jima hasu rë me.
Fahatáha nahmi xi matitjun jan Jesucristu
19Hane xi cafehe cha xi cuacun jan cojo Jesús jan ne, sehe cavetsihin cafahatáha nahmi xi matitjun jan me tsëhë xuta ladu rë me cojo tsëhë cjuachacun rë me. 20Hane Jesús ne, cuitjin cafayangui me:
―Ngahan ne, xcun cojo xcun cachjá cojo yëjë ni xuta, hacuaha cavicuyá rë me ngajan yungun langa o sa xi ngajan yungun xi matitjun, hiscan xi matangun ngayejen ni xuta tjë rë Israel. Tsajin mé xi cachjá xi táhahma. 21Hane ¿mé má ngahan chjuhuntuhun ná ni? Chjuhuntuhun rë me xi cahndë cjua naha. Chjinengunsun rë me mé xi cachjá cojo rë me. Me xi cuacun vë ne, vëë me cjua xi cachjá. ―Cuatjin cafayangui Jesús.
22Hane xi cuatjin cachja Jesús cjua vëhë ne, ngu cha mayu xi secun tiña jan ne, cavajaya cha ngu xcun Jesús, sehe cachja cha cuitjin cojo rë me:
―¿Há cuatjin chjayengui tsëhë nahmi xi matitjun? ―Cuatjin cachja cha.
23Ngajan xi Jesús ne, cuitjin cafayangui me tsëhë cha:
―Sa xi choho cachjá ne, tinújun cojo yëjë xuta mé xi choho cachjá. Peru sa xi ndaja cachjá ne, ¿mé má cuatjin vujun ná ni? ―Cuatjin cafayangui me.
24Ngajan xi Anás ne, hacuanitjin ni tjihñu cuaha Jesús ne, catsingatju me Jesús xcun nahmi xi matitjun tsëhë yëjë ni nahmi.
Chja nga Pedru xi hacuiin ladu rë Jesucristu má me
25Jinguyëjë rë xi tichjahátáha rë Jesús jan ne, Pedru ne, secun me xcun ndihi tijima hasu rë me. Hane cachjahátáha rë me cuitjin:
―¿Hacuiin cojo ngayun má ngayun ladu rë me vëhë? ―Cuatjin cachjahátáha rë me.
Hane Pedru ne, cavetsangui me, cuitjin cachja me:
―Jéya, hacuiin. ―Cuatjin cachja me.
26Ngajan xi ngu mosu rë nahmi xi matitjun jan, cha xi xicjin rë cha xi cavatësun Pedru tyjavañuju jan ne, cuitjin cachja cha cojo Pedru:
―¿Há cahveen nuju cojo rë me ngajñi yatjë jan ni? ―Cuatjin cachja cha.
27Cavetsangui nga Pedru ngu ndiya. Hane ha hora vëhë ni ne, cajihnda xahnda.
Fahatáha Pilatu Jesucristu
28Ngajan xi xuta matitjun tsëhë xuta tjë rë Israel jan ne, cavaxë me Jesús tsëhë ndava Caifás, hane quijicojo me ndihya jyë hiscan tacun Pilatu, xutaxa rë xi matitjun. Nguitajñu xati hora vëhë. Hane xuta xi quijicojo rë Jesús jan ne, cavisiin me cahntsua ndihya jyë jan, ngatsë rë xcusun rë me xi ma chocun yojo rë me xcun Nina hya xi visehen me ndava xutaxín. Hane sa xi cuatjin cuma chocun yojo rë me ne, cumaji sinë nguixun me comida suhi tsëhë Pascua. 29Vëhë xi cavetju Pilatu quijitjengui rë me candatsen. Hane cuitjin cavinenguise me:
―¿Mé jyë́ vinchun tsëhë cha xi cuijyihi vi? ―Cuatjin cavinenguise Pilatu.
30Hane xuta xi cuacun jan ne, cuitjin cafayangui me:
―Sa xi hacuiin choho tisahmi cha ne, canduvinchanii nuju cha. ―Cuatjin cafayangui me.
31Hane Pilatu ne, cuitjin cachja me:
―Chjuhun cha ne, chjuhunchuvun suvun cha cojo jyë́ rë cha sacuatjin chja ley nuju. ―Cuatjin cachja Pilatu.
Ngajan xi xutaxa rë yungun xi cuacun jan ne, cuitjin cachja me:
―Ley nuju ngayun ne, chja ta ngayin ne, cumaji niquihin xuta. ―Cuatjin cachja xuta xi cuacun jan.
32Cuatjin camá cojo sa xi cuetjucaa cjua xi cachja Jesús hya xi cachja me mé chuva rë cueya me.
33Ngajan xi Pilatu ne, cavuya cavisehen nga me ndihya. Hane cajindaya me Jesús, sehe cavinenguise me cuitjin:
―¿Há ngaye xu matitjun ngaye tsëhë xuta tjë rë Israel? ―Cuatjin cavinenguise me.
34Hane Jesús ne, cuitjin cafayangui me:
―¿Há cojo cjuatacun nuju suvun chjinengunsun ná cjua vëhë?, o há tsajin ne, ¿há tjin yo cachja cojo nuju tsahan? ―Cuatjin cafayangui me.
35Ngajan xi Pilatu ne, cuitjin cafayangui me:
―¡Peru ngahan ne, hacuiin xuta Israel ngahan! Suvá xuta nangui riji cojo nahmi xi matitjun casahmi ri me entregadu cojo ná. ¿Mé canihñi? ―Cuatjin cafayangui Pilatu.
36Ngajan xi Jesús ne, cuitjin cafayangui me:
―Xa naha xi sahme gubiernu ne, hacuiin ngasunhndë vihi cafahántsa. Sa xi ngasunhndë vihi cafahántsa xa xi sahme gubiernu ne, xuta ladu naha ne, scaan me cojo sa xi cumaji cuma ngahan entregadu tsja xutaxa rë yungun. Peru xa naha xi sahme gubiernu ne, hacuiin nguehe cafahántsa. ―Cuatjin cafayangui Jesús.
37Hane Pilatu ne, cuitjin cachja me cojo Jesús:
―¿Ngajan xi ngaye xi matitjun ngaye ni? ―Cuatjin cachja me.
Hane Jesús ne, cuitjin cafayangui me:
―Cuatjin sacuatjin nújun vë. Ngahan ne, canduvá nguehe ngasunhndë hacuaha catsin ngahan cojo sa xi cuichjá cojo xuta cjua xi cjuaquixi. Yëjë xuta xi marcun rë me tsëhë cjuaquixi ne, hatuxa vetaharcu me cjua naha. ―Cuatjin cafayangui Jesús.
38Hane Pilatu ne, cuitjin cachja me:
―¿Mé xi hmí rë cjuaquixi ni? ―Cuatjin cachja Pilatu.
Chja xutaxa rë yungun xi meje rë xi cueya Jesucristu.
Hane xi cafë cachja Pilatu cjua vëhë ne, sehe cavetju nga me quiji cachja me cojo xutaxa rë yungun, cuitjin cachja me:
―Sacuiin ná hisca ngu jyë́ rë cha xi cuajyihi vë. 39Peru ngayun ne, tjin nuju ngu xcusun xi tsisme ngu presu nixtin rë suhi rë Pascua. ¿Há meje nuju xi tsisme me xi matitjun tsujun? ―Cuatjin cachja me.
40Hane xuta xi cuacun jan ne, cajindaya me cachja me cuitjin:
―¡Hacuiin cha vëhë ta Barrabás nismu cha! ―Cuatjin cajindaya me cachja me.
Quihndë ne, Barrabás jan ne, ngu cha fahataha cjuachan cha.
Currently Selected:
San Juan 18: maq
Highlight
Share
Copy
Want to have your highlights saved across all your devices? Sign up or sign in
© 1991, Wycliffe Bible Translators, Inc. All rights reserved.