Apocalípsis 1
1
Librupa qallanan
1Kë libruchömi qellqarëkan Jesucristuta Teyta Dios revelashqan. Jesucristum angelninta kachamur tsë revelacionta sirwiqnin Juanta revelarqan. Tsënö revelarmi sirwiqninkunata imapis pasananpaqna kaqkunata käyitsirqan. 2Juannam tsë revelacionta qellqar Teyta Dios nishqankunata, Jesucristo nishqankunata y llapan rikashqankunata qellqashqa.
3Kushishqam kayanqa kë qellqarëkaqkunata leyiqkuna y leyiyashqanta wiyar cäsukuqkuna. Kë qellqarëkaqkunaqa cumplikänanpaqnam këkan.
Qanchis iglesiakunachö ëllukaq wawqikunata y panikunata napanqan
4Asia provinciachö qanchis iglesiakunachö ëllukaq wawqikuna y panikuna:
Noqa Juanmi qamkunaman qellqëkämü. Unëpita kawaq, kananpis këkaq y shamunanpaq këkaq Teyta Dios y trönunpa nöpanchö këkaq qanchis espïritukunapis#1.4 Manam alliqllaqa musyantsiktsu qanchis espïritukuna ima kayashqantapis. Itsa karqan qanchis angelkuna o Espíritu Santupis. ankupäyäshurniki alli kawayänëkipaq yanapëkulläyäshï.#Apoc. 4.5.
5Jesucristupis alli kawayänëkipaq yanapëkuyäshï. Pëmi Teyta Dios munashqannölla willakïninta willakushqa y wanushqakunapitam puntata kawarimushqa.#Hech. 26.23; Col. 1.18. Kë patsachö llapan reykunapitapis mas puëdiqmi këkan.#Sal. 89.27. Pëmi kuyamarnintsik yawarninta ramar llapan jutsantsikta paqamushqa.
6Mandamaqnintsik rey karmi makinchö kanantsikpaq ëllumarquntsik. Tsënöllam Teytan Diosta sirwiq sacerdötikuna kanantsikpaq churamarquntsik.#Éxo. 19.6; Isa. 61.6; 1Ped. 2.5, 9; Apoc. 5.10; 20.6. ¡Jesucristo imëpis alabashqa këkullätsun! ¡Pë japallan mandamaqnintsik këkullätsun! Tsënö katsun.
7¡Pukutë jananchömi Jesucristo kutimunqa!#Dan. 7.13; Mat. 24.30; Mar. 13.26; Luc. 21.27; 1Tes. 4.17.
Kutimuqtam llapan nunakuna rikäyanqa.
Pëta tuksir wanutsiqkunapis rikäyanqam.#Zac. 12.10; Juan 19.34, 37.
Kutimuqta rikarmi jinantinchö nunakuna waqayanqa.
Tsënömi kanqa. Amén.
8Unëpita kawaq, kananpis këkaq y shamunanpaqna këkaq puëdiq Teyta Diosmi kënö nin: <<Alfa y Omegam noqaqa kä.#1.8 Alfaqa griego alfabëtuchö punta kaq letram. Omeganam ultimu kaq letra. Tsëmi Alfa y Omegam noqaqa kä ninanqa qallanan y ushananmi kä ninan. [Qallanan y ushananmi kä]>>.#Isa. 41.4; 44.6; Apoc. 1.17; 22.13.
Jesucristuta Juan rikanqan
9Noqaqa Jesucristuman markäkuq mayikikuna Juanmi kä. Qamkunanöllam Jesucristupa mandakïninchö këkä. Jipatsiyäshushqëkinöllam noqatapis Jesucristuman markäkushqäpita jipëkätsiyäman. Qamkunanöllam pëpa nöpanman chänäpaq mana ajayashpa shuyakïkä. Teyta Diospa willakïninta willakushqäpitam y Jesucristo salvamaqnintsik kashqanta willakushqäpitam Patmos islachö prësu këkä.
10Tsëchö këkarmi domingu junaq Espíritu Santupa poderninchö këkar wiyarqä cornëta waqamuqnöraq qepächö kënö nimuqta: 11<<[Alfa y Omegam noqa kä. Qallanan y ushananmi kä.] Revelacionchö rikätsishqaqkunata juk rölluman qellqarkur apatsi [Asia provinciapa] qanchis markankunachö këkaq iglesiakunaman. Tsë markakunaqa kayan Éfeso, Esmirna, Pérgamo, Tiatira, Sardis, Filadelfia y Laodiceam>>.
12Qepächö tsënö parlamuqta wiyarnam tumarqä pï kanqanta rikänäpaq. Tsëchömi rikarqä qoripita rurashqa qanchis candelabrukuna rawrëkäyaqta.#Éxo. 27.21; Lev. 24.1-4; Zac. 4.10. 13Tsë candelabrukuna chöpinchömi rikarqä nunapa tsurin rikuq këkaqta.#Dan. 7.13. Pëmi chaki puntanyaq ratashnin yakashqa këkarqan. Pëchunpam qoripita rurashqa anchu cintuwan watararqan.#Dan. 10.5. 14Aqtsanpis yulaq millwanö y rajunö yulaqmi karqan.#Dan. 7.9. Nawinnam ninanöraq tillapyäkurqan. 15Chakinkunapis rawrëkaq broncinömi chipapäkurqan.#Dan. 10.6. Parlashqanpis atska yaku ëwar qapariqnömi karuman wiyakurqan.#Eze. 1.24; 43.2. 16Allawka kaq makinchömi qanchis qoyllurkunata tsararëkarqan. Shiminpitanam ishkan lädunpa afilashqa espäda yarqëkämurqan. Qaqllanpis intinöran chipapäkurqan.
17Pëta rikëkurmi puntanman wanushqanö ishkirirqä. Tsëmi allawka kaq makinwan yatëkamar nimarqan: <<Ama mantsamëtsu. Noqam qallanan y ushanan kä.#Isa. 41.4; 44.6-8; 48.12; Apoc. 1.8; 2.8; 22.13. 18Wiñëpa wiñënin kawaqmi kä. Tsënö kawanäpaqmi wanutsiyämashqanpita kawarimurqü. [Amén.] Noqam tsararëkä wanushqakunapa almankuna këkäyashqan llävita.#1.18 Noqam tsararëkä wanushqakunapa almankuna këkäyashqan llävita nirmi Jesucristo käyitsirqan wanushqakunata kawaritsimunanpaq puëdiq kashqanta. 19Llapan rikashqëkita qellqë. Kanan pasëkashqanta y pasananpaq këkaqkunatapis llapanta qellqë.
20<<Kananmi käyitsishqëki allawka kaq makïchö rikashqëki qanchis qoyllurkuna y qoripita qanchis candelabrukuna ima kashqantapis. Qanchis qoyllurkunaqa kayan tsë qanchis iglesiakunapa angelninkunam. [Rikashqëki] qanchis candelabrukunaqa këkan tsë qanchis markakunachö këkaq iglesiakunam>>.
Currently Selected:
Apocalípsis 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.