Filipenses 1
1
Apóstol Pablo napakunqan
1Filipos#Hech. 16.12. markachö këkaq anciänukuna, diäcunukuna y wakin markäkuqkuna:
Noqa Pablum, Jesucristupa sirwiqnin kar kë cartata Timoteuwan cartakayämü. 2Yayantsik Teyta Dios y Señor Jesucristo ankupäyäshurniki alli kawayänëkipaq yanapëkulläyäshï.
Teyta Diosta Pablo mañakunqan
3Qamkunapaq yarpararmi imëpis Teyta Diosta <<payllä>> nï. 4Tsënöllam Teyta Diosta cada mañakur imëpis qamkunapaq kushishqa mañakü. 5Jesucristupa alli willakïninta chaskikuyashqëkipita patsa yanapayämashqëkita manam qonqätsu. 6Noqa allim musyä qamkunachö Teyta Dios alli rurëta qallëkushqanta y Jesucristo kutimunqanyaq alli patsakashqana kayänëkipaq kashqanta.#Sal. 138.8.
7Qamkunapaq yarpararmi tsënö niyaq. Qamkunaqa Jesucristupa willakïninta willakur puriptïpis o prësu këkaptïpis llapëkim yanapayämarqunki. 8Teyta Diosmi musyan qamkunapaq imëpis yarparëkashqäta. Jesucristo kuyamashqantsiknöllam noqapis llapan shonqüwan kuyayaq.
9Tsëmi Teyta Diosta mañakïkä shumaq käyikïnikikunawan pëta kuyarnin jukniki juknikipis kuyanakuyänëkipaq. 10Tsënö kuyanakurmi alli kaqkunata rurayänëkipaq käyikuyanki y Jesucristo kutimunanta shuyäkurmi pë munashqannö jutsannaqlla kawayanki. 11Jesucristo yanapëkulläyäshï imëpis allillata rurayänëkipaq. Llapanpis këkutsun Teyta Dios alabashqa kananpaq.
Jesucristupa alli willakïninta willakuyaptin Pablo kushikunqan
12Wawqikuna y panikuna, prësu llawirätsiyämaptinpis Jesucristupa alli willakïninta jinantinchö chaskikäyashqanta musyayänëkitam munä. 13Tsëmi këchö llapan wardiakunawan wakin nunakunapis musyëkäyan Jesucristupa willakïninta willakushqäpita prësu këkashqäta.#Hech. 28.30. 14Tsëta musyëkurmi wakin wawqikuna y panikunapis Jesucristuman markäkur mana mantsakushpana alli willakïta willakïkäyan.
15Wakinqa noqapita mas reqishqa këta munarllam chikimar willakïkäyan. Wakinqa nunakuna salvakuyänanpaqmi willakïkäyan. 16Pëkunaqa musyayanmi Jesucristupa alli willakïninta willakushqäpita llawirëkashqäta. Llawiraptïpis Jesucristuta kuyarmi willakïkäyan. 17Reqishqa këta munaqkunaqa manam Diosta sirwita munartsu willakïkäyan, sinöqa piñatsimëta munarllam. 18Tsënö kayaptinpis manam llakikütsu. Piñatsiyämänan rëkur willakurpis o alli shonqunkunawan willakurpis Jesucristupa alli willakïninta willakuyaptinqa kushikümi.
Kawëpis wanïpis Pablupaq alli kanqan
Tsënöllam kushikü 19Teyta Diosta noqapaq mañakuyaptiki y Jesucristupa Espïritun yanapamaptin prësu këkashqäpita yarqamunäpaq kashqanta musyar. 20Mana mantsakushpa parlanäpaq imëpis yanapamashqannömi autoridäkunapa nöpanchöpis yanapamanqa. Tsëmi Jesucristo yanapamashqan musyakanqa kawëkaqta jaqiyämaptinpis o wanuratsiyämaptinpis.
21Kawarpis Jesucristullapaqmi kawashaq. Wanukuptïpis noqapaqqa mas allim kanqa.#Gál. 2.20. 22Imanö kaptinpis mana wanutsiyämaptinqa Jesucristupa willakïnintam imëpis willakïkäshaq. Tsëmi wanïpis kawëpis noqapaqqa iwallla këkan.
23Tsënö kaptinmi mëqanta akrëtapis puëdïtsu. Noqapaqqa mas allim kanman kë patsata jaqirir Jesucristupa nöpanmanna ewkuptï. 24Tsënö kaptinpis qamkunata yanapayänaq rëkur maslla kawaptïpis allim kanman. 25Tsëmi qamkuna rëkur Teyta Dios tsapämaptin autoridäkuna wanutsiyämanqatsu. Tsënöpam yanapayashqëki Teyta Diosman markäkur kushishqa kawayänëkipaq. 26Carcelpita yarqur chämuptïmi alläpa kushikur Jesucristuta alabashun.
Chikiyaptinpis mana mantsakuyänanpaq ninqan
27Jesucristupa alli willakïnin nishqannölla imëpis kawakuyë. Tsënöpam shamurpis o mana shamurpis musyashaq jiparpis llakirpis Jesucristo munashqannö kawëkäyashqëkita y imëpis kuyanakïkäyashqëkita. Tsënöllam musyashaq nunakuna chikiyäshuptikipis Jesucristupa alli willakïninta willakïkäyashqëkita.
28Jesucristuman markäkuyashqëkipita nunakuna chikiyäshuptikipis ama mantsakuyëtsu. Tsënöpam käyikuyanqa kikinkuna ushakäyänanpaq këkäyashqanta y qamkunatana Teyta Dios salvayäshushqëkita. Tsëtaqa Teyta Diosmi ruranqa.
29Manam Jesucristuman markäkunantsikllapaqtsu Teyta Dios akramarquntsik, sinöqa pë rëkur jipanantsikpaqwanmi. 30Nöpata imanö nakashqätapis y kanan imanö jipëkashqätapis musyëkäyankim.#Hech. 16.19-40. Noqapis y qamkunapis Jesucristupa willakïninta willakushqantsikpitam jipashun.
Currently Selected:
Filipenses 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.