Filemón 1
1
Apóstol Pablo napakunqan
1Willapäkuq mayï kuyë Filemón:
Noqa Pablum, Jesucristupa willakïninta willakushqäpita carcelchö këkar Timoteuwan kë cartata cartakayämü. 2Panintsik Apiata, willapäkuq mayintsik Arquiputa#Col. 4.17. y wayikichö ëllukëkur Teyta Diosta alabaq wawqikunata y panikunatapis napëkullë. 3Yayantsik Teyta Dios y Señor Jesucristo ankupäyäshurniki alli kawayänëkipaq yanapëkulläyäshï.
Markäkuq mayinkunawan Filemón alli kawanqan
4Wawqi Filemón, Teyta Diosta imëpis mañakurmi qampaq pëta payllä nï. 5Señornintsik Jesucristuman markäkushqëkitam y markäkuq mayintsikkunawan kuyanakur këkäyashqëkitam willayämashqa. 6Tsëmi mañakïkä Jesucristuman markäkunëkipaq y noqantsik rëkur wanushqanpita alli kaqkunata ruranëkipaq.
7Wawqi Filemón, kuyakuq kar markäkuq mayintsikkunata kallpatsëkashqëkita musyarmi noqapis alläpa kushikü.
Onésimuta Filemón chaskinanpaq Pablo rowanqan
8-10Wawqi Filemón, Jesucristupa willakïninta willakushqäpitam awkin kënïchö llawirëkä. Prësu këkanqäman esclävïki Onésimo#Col. 4.9. chämuptin alli willakïta willapaptïmi Jesucristuta chaskikushqa. Tsëmi kananqa tsurïnöna këkan.
Tsëmi qamta rowaq Onésimuta kachamuptï chaskinëkipaq. Jesucristupa apostolnin karninmi qamta obliguënikita puëdï. Tsënö këkaptinpis manam obliguënikita munätsu, sinöqa kuyakuq kaptikim Onésimuta chaskïkunëkipaq rowakuq.
11Esclävïki karpis nöpataqa manam shumaqtsu yanapashurqëki. Kananqa Jesucristuta chaskikushqana karmi ishkantsikta shumaqna yanapamäshun. 12Tsëmi alläpa llakikarpis Onésimuta yapë kutitsimü. [Pëta kikïtanö chaskïkullë.] 13Alli willakïta willakushqäpita llawirëkaptï rantiki atiendimänanpaq quedatsikuptïpis allim kanman. 14Tsënö kaptinpis esclävïkitaqa manam tsararäkümantsu, sinöqa kikikiran yanapamänanpaq o mana yanapamänanpaqpis ninëki.
15Itsapis Teyta Dios permitishqa Onésimo juk tiempulla qampita yarqamunanpaq. Tsëmi kananqa Jesucristuta chaskikushqana kar imëyaqpis wawqikina kanqa. 16Kananpita mananam esclävïkillanatsu kanqa, sinöqa kanqa kuyë wawqintsiknam. Tsënö këkaptinqa noqa kuyashqänölla makikiman kutimuptin qampis kuyanki. 17Tsëmi markäkuq mayï kaptiki rowaq noqata chaskikamaqnö pëtapis chaskïkunëkipaq.
18Esclävïki Onésimo imëkitapis suwakushqa kaptinqa o jaqëki kaptinqa paganaqpaq willëkamë. 19Paganaqpaq kaqtaqa kikïmi qellqëkämü. Tsënö kaptinpis ama qonqëtsu Jesucristupa alli willakïninta willapashqaqpita qampis jaqä kashqëkita. 20Wawqi Filemón, markäkuq mayï kaptikim rowaq kë nishqäta ruranëkipaq. Rowakushqaqta ruraptikiqa kushikushaqmi.
21Kë cartata cartakayämü imatapis nishqänö ruranëkipaq kashqanta musyarmi. Y nishqäpita mastaraq ruranëkipaq kashqantapis musyämi. 22Teyta Diosta mañakushqëkinö carcelpita yarqamurqa watukaqniki shamushaqmi. Tsëpaq posädallä alistarëkë.
Cartapa ushanan
23Epafrasmi#Col. 1.7; 4.12. napashunki. Pëpis Jesucristupa alli willakïninta willakushqanpitam noqawan llawirëkan. 24Tsënöllam wawqintsik Marcuspis,#Hech. 12.12, 25; 13.13; 15.37-39; Col. 4.10. Aristarcupis,#Hech. 19.29; 27.2; Col. 4.10. Demaspis#Col. 4.14; 2Tim. 4.10. y Lucaspis#Col. 4.14; 2Tim. 4.11. napayäshunki. Pëkunam llapanchöpis yanapëkäyäman.
25Señor Jesucristo ankupäyäshurniki imëpis yanapëkushï. [Tsënö katsun.]
Currently Selected:
Filemón 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.