Judas 1
1
Judas napakunqan
1Markäkuq mayikuna:
Noqa Judas,#Mat. 13.55; Mar. 6.3. Jesucristupa sirwiqnin y Santiagupa wawqin karmi, qamkunaman kë cartata cartakamü. Teyta Diosmi kuyayäshurniki salvayäshunëkipaq qayayäshushqanki. Tsëmi ima mana allikunapitapis Jesucristo tsapäyäshunki. 2Teyta Dios ankupäyäshurniki imëpis yanapëkulläyäshï kuyanakur alli kawakuyänëkipaq.
Llutan yachatsikuqkunata mana chaskiyänanpaq käyitsinqan
2 Pedro 2.1-17
3Kuyë wawqikuna y panikuna, noqa yarparqä Jesucristo salvamashqantsikta kë cartachö qellqamïtam. Tsënö yarparpis kanan qellqamü llutan yachatsikuqkunata pärapuyänëkipaqmi. Teyta Diospa willakïninqa manam imëpis trocakantsu ni yapakantsu. Tsë willakïnintam Teyta Dios unëna käyitsimarquntsik.
4Tsë llutan yachatsikuqkunaqa Diospa willakuqnin tukurmi qamkunaman shayämushqa. Pëkunaqa Teyta Diosta mana mantsakurmi nunakunata creyitsir kënö niyan: <<Jutsa rurëta mana jaqishqapis Teyta Diosqa perdonakunmi>>.
Tsënö nirqa puëdiq Teyta Diosnintsiktam y Señornintsik Jesucristutam neguëkäyan. Tsënö nunakunaqa infiernuman jitëkushqa kayänanpaqmi destinashqa këkäyan.
5Musyayashqëkinöpis Egiptupita Israel nunakunata Señornintsik jorqaramurpis#Éxo. 12.51. mana cäsukuqkunataqa ushakätsirqanmi.#Núm. 14.29-30. 6Tsënöllam Teyta Diosta mana cäsuyashqanpita juiciu junaq chämushqanyaq wakin angelkunatapis tutapëman llawïkurqan. 7Tsënöllam Sodomachö, Gomorrachö y nöpan markakunachö täraq nunakunapis alläpa penqakïpaq jutsata rurayarqan. Tsëmi nunakuna käyikuyänanpaq tsë markakunata Teyta Dios ninawan ushakätsirqan.#Gén. 19.1-24.
8Tsë markakunachö täraq nunakunanöllam tsë llutan yachatsikuqkuna mana penqakushpa warmin warmin purikuyan. Y <<kikïmi mandakuq këkä>> nishpam pitapis cäsuyantsu. Jina niyanmi tsënö kawayänanpaq suëñïninchö Teyta Dios revelashqanta.
Pëkunaqa angelkunapaq y supëkunapaqpis shimin chashqantam imatapis parlayan. 9Tsënö niyaptinpis angelkunapa mandakuqnin Miguelqa#Dan. 10.13, 21; 12.1; Apoc. 12.7. manam tsënötsu diabluta qayaparqan. Tsëpa rantinqa Moiséspa ayanta#Deut. 34.6. diablu apakïta munaptinpis <<¡Teyta Diosmi upälläkunëkipaq nikäshunki!>> nirqanllam.#Zac. 3.2. 10Tsë llutan yachatsikuqkunaqa mana käyishpam llutankunata parlayan. Pëkunaqa wätakunanö mana käyikuq karmi imatapis llutanta rurayan. Tsënö kayashqanpitam ushakäyanqa.
11¡Allaw, imanöraq jipalläyanqa! Pëkunaqa wawqinta Caín#Gén. 4.3-9; Heb. 11.4; 1Juan 3.12. chikir wanutsishqannömi y Balaam#Núm. 22.1-35; Apoc. 2.14. qellëpaq ërayashqa kashqannömi këkäyan. Moiséspa contran parlashqanpita Coré#Núm. 16.1-35. ushakashqannömi tsë llutan yachatsikuqkunapis ushakäyanqa.
12Kuyanakur juntu mikuyanqëkichöpis mana penqakushpam llutallana mikuyan. Kikinkunallapaqmi imatapis ashiyan. Usya witsan tsaki pukutë wakpa këpa ëwaqnöllam këkäyan. Wayünanpaq tiempunchöna këkarpis wayïninnaq tullun tsakishqa montinöllam këkäyan. Y llupiriyaptin tsakirishqa montinöllam këkäyan. 13Kuchuman tukïläya rakchata lamar jitamushqannömi pëkunapis mana penqakushpa llutankunata rurëkäyan. Qoyllur jeqaqnömi tutapëman jitëkushqa kayanqa.
14Adánpa willkanpa willkanpa willkanmi karqan Enoc.#Gén. 5.18, 21-24. Pëmi profëta kar tsë llutan yachatsikuqkunata Teyta Dios juzgananpaq kashqanta kënö nirqan: <<Teyta Diostam rikarqü waranqapayan santu angelninkunawan shamïkaqta. 15Pëmi llapan nunakunata juzganqa mana mantsakushpa jutsata rurayashqanpita y pëpa contran parlayashqanpita>>.
16Tsë llutan yachatsikuqkunaqa imallapitapis penqapäkuyanmi. Pëkunapaqqa manam imapis allitsu. Yarpäyashqantam imatapis ruratsiyan. Nuna tukurmi shimin chashqanta imatapis parlayan. Munashqankunata ruratsiyänan rëkurllam shumaq shiminllapa parlapäyan.
Jesúsman markäkuqkunata kallpatsanqan
17Kuyë wawqikuna y panikuna, yarpäyë Señornintsik Jesucristupa apostolninkuna 18kënö niyashqanta: <<Ushanan junaqkunachömi Jesucristupa willakïninta manakaqpaq churaq nunakuna yuriyämunqa. Pëkunaqa Diosta cäsukuyänanpa rantinmi kikinkuna munayashqannö jutsata rurar kawayanqa>>.#2Tim. 3.1-5; 2Ped. 3.3.
19Tsë nishqannöllam llutan yachatsikuqkuna kanan yuriyämushqa. Tsë nunakunam jutsayuq këkäyan wawqikuna y panikuna chikinakur iglesiapita qarqunakuyänanpaqpis. Espíritu Santuta mana chaskikushqa karmi munayashqannö jutsata rurar kawëkäyan.
20Kuyë wawqikuna y panikuna, Jesucristupa willakïninta yachakushqa këkarqa pëman markäkur imëpis kawayë. Y Espíritu Santu käyitsiyäshushqëkinölla Teyta Diosta mañakuyë. 21Teyta Dios ankupëkäyäshuptikiqa imëpis pëta cäsukuyë. Señor Jesucristo kutimunanpaq kashqanta musyëkarqa alistakushqalla shuyarëkäyë. Pë kutimurmi ankupäyäshurniki pushakuyäshunki wiñëpa wiñënin nöpanchö kushishqa kawakuyänëkipaq.
22Tsënö këkaptinqa manaraq alli markäkuq wawqikunata y panikunata Jesucristuman alli markäkuyänanpaq shumaq käyitsiyë. 23Wakinta wayi kayakaqpita salvëkuqnö ras käyitsiyë. Wakintana ankupar shumaq shimikikunallapa parlapäyë. Pëkunawan ëllukarpis paqtam mana alli rurëninkunata yachakuyankiman.
Teyta Diosta alabanqan
24Teyta Dios alabashqa këkullätsun. Pëmi jutsa rurëman mana ishkiyänëkipaq poderninwan imëpis yanapëkäyäshunki. Y wiñëpa wiñënin kushishqa kawakuyänëkipaqmi nöpanman jutsannaqtana pushakuyäshunki. 25Pëqa japallanmi [yachëyuq] Teyta Dios. Señornintsik Jesucristo noqantsik rëkur wanuptinmi salvamashqantsik. Pëqa alläpa puëdiqmi y wiñëpa wiñënin reymi. Tsënö kashqanpita kananpis, warëpis y imëyaqpis alabashqa këkullätsun. Tsënö katsun.
Currently Selected:
Judas 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.