Juan 8
8
Qowanta engañaq warmita Jesús perdonanqan
1Jesúsnam Olivos jirkaman ewkurqan. 2Tsëpita waränin qoya templupa patiunman kutiriptinnam llapan nunakuna pëman ëllukäyarqan. Tsëchö Jesús tëkur yachatsikïkaptinnam 3ley yachatsikuqkunawan fariseukuna juk warmita apayarqan. Tsë warmitam tariyarqan qowanta engañar juk nunawan kakïkaqta. Tsë warmitam nunakunapa nöpanman shëkatsir 4Jesústa tapuyarqan: <<Rabí, kë warmitam tarïkuyarqü qowanta engañar juk nunawan kakïkaqta. 5Moisés qellqashqanchömi nimantsik tsënö warmikunataqa tsampipa wanutsinantsikpaq.#Lev. 20.10; Deut. 22.22-24. Qamqa ¿imataq ninki?>>
6Jesústa tsënö tapuyarqan llutanta parlatsir acusayänanpaqmi.#8.6 Roma autoridäkunaqa manam munayarqantsu Israel nunakuna pitapis wanutsiyänanta. Tsëmi: <<Moisés nishqannö tsampïkushun>> niptinqa Jesústa prësu tsariyanman karqan. <<Ama tsampishuntsu>> niptinnam ley yachatsikuqkunawan fariseukuna: <<¿Imanirtaq Moisés qellqashqanta cäsunkitsu?>> niyanman karqan. Tsëta musyarmi unchïkur dëdunwan allpachö Jesús qellqarqan. 7Kutïkuryan tapuyaptinnam shärirkur Jesús kënö nirqan: <<Mëqëkipis jutsannaq karqa kë warmita tsampir qallëkuyë>>.
8Tsënö nirirmi yapë unchïkur allpachö qellqarqan.
9Tsënö nishqanta wiyëkurnam#8.9 Wakin qepa kaq griego copiakunachömi jutsayuq kayashqanta käyikurnin nir yapayashqa. awkinkunapita qallëkur llapanpis jukllëllapayan ewkuyarqan. Ewkuyaptinnam tsë warmillana Jesúspa nöpanchö quedarirqan. 10Tsënam shärirkur tsë warmita Jesús kënö nirqan: <<¿Mëtaq apayämushuqnikikuna? ¿Manaku ni mëqanpis tsampiyäshurqunki?>>
11Warminam nirqan: <<Tëtë, manam mëqanpis tsampilläyämarquntsu>>.
Jesúsnam nirqan: <<Noqapis manam munätsu tsampishqa kanëkita. Kananqa wayikipana ewkï. Amana jutsata yapë rurankinatsu>>.]
Pïmëpaqpis Jesús aktsi kanqan
12Tsëpitanam nunakunata Jesús kënö nirqan: <<Noqam kë patsachö aktsi kä.#8.12 Aktsi kashqanta nirqa nunakunata salvananpaq kashqanta y Dios munashqannö kawananpaq käyitsiq kashqantam Jesús nirqan.#Sal. 27.1; 119.105; Prov. 6.23; Isa. 49.6; Juan 9.5. Tsëmi nishqäta wiyakuqkunaqa tutapëchönatsu kawayanqa, sinöqa kawatsikuq aktsichönam kawayanqa>>.
13 Fariseukunanam niyarqan: <<Tsënö nirqa kikikipa yarpënikillatam nikanki. Tsëmi creyiyaqtsu>>.#Juan 5.31.
14Jesúsnam nirqan: <<Kikïpa yarpënïllapita niptïpis nishqäkunaqa rasun kaqmi këkan. Noqa musyämi mëpita shamushqäta y mëman ëwanäpaq kashqanta. Qamkunaqa tsëta manam musyayankitsu. 15Qamkunaqa yarpënikikunallapitam juzguëkäyämanki. Noqaqa manam qamkunanötsu pitapis juzgä. 16Kachamaq Teytä noqawan imëpis kaptinmi pitapis juzgarqa rasun kaqllata juzgä. 17Leynikikunachöpis kënömi nikan: <Ishkaq testïgukuna tsëllata niyaptinqa rasun kaqtam musyantsik>.#Deut. 19.15. 18Tsë nishqannöllam kachamaq Teytä juk testïgu y juk kaq testïgunam noqa këkä>>.
19Tsënö niptinnam tapuyarqan: <<¿Mëchötaq tëtëkiqa këkan?>>
Jesúsnam nirqan: <<Qamkuna manam musyayankitsu Teytä pï kashqantapis ni noqa pï kashqätapis. Pï kashqätapis musyarqa Teytä pï kashqantapis musyayankimanmi>>.
20Jesús tsënö nirqan templupa patiunchö ofrendata ëlluyänan kaqchö yachatsikïkarmi. Tsëchö yachatsikuptinpis höran manaraq chaptinmi pipis prësu tsariyarqantsu.
Ciëlupita kanqanta Jesús ninqan
21Tsëpitanam Jesús kënö nirqan: <<Ewkushaqnam. Ashiyämarpis manam tariyämankitsu. Noqa ëwanqä kaqmanqa manam ëwëta puëdiyankitsu. Tsëpa rantinqa jutsëkikunachömi wanuyanki>>.
22Israel nunakunanam niyarqan: <<¿Imanirtaq pë ewkunqanman mana chänantsikpaq nikämantsik? ¿Kikintsuraq wanutsikïta yarpëkan?>>
23Jesúsnam nirqan: <<Qamkunaqa kë patsachö yurikuqllam kayanki. Noqaqa ciëlupitam shamurqü. 24<Noqam Kä>#8.24 Noqam Kä nirqa Jesucristo käyitsirqan kikin Dios kashqantam. Tsëpita masta musyanëkipaq leyinki Éxo. 3.14; Juan 10.30-33. nikaptïpis mana creyimarqa jutsëkikunachömi wanuyanki. Tsëmi niyarquq jutsëkikunallachö wanuyänëkipaq kashqanta>>.
25Tsënö niptinnam tapuyarqan: <<¿Pitaq qam kanki?>>
Jesúsnam nirqan: <<Unëpitanam pï kashqätapis willayarquq. 26Jutsëkikunata shimpiyänaqpaqqa atskaran këkan. Noqaqa kachamaqnï nimashqanllatam willapëkäyaq. Pë nimashqankunaqa llapanpis rasun kaqllam>>.
27Jesús tsënö niptinpis Teyta Diospaq parlëkashqanta manam käyiyarqantsu. 28Tsëmi Jesús nirqan: <<Nunapa Tsurinta sharkaratsirran#8.28 Nunapa Tsurinta sharkatsiyänanpaq nirqa kikinta cruzchö wanutsiyänanpaq kashqantam nirqan. Tsënöllam wanushqanpita kawarimuptin pëta adorayänanpaq kashqanta nirqan. pï kashqätapis käyiyanki. Tsëran käyiyanki kikï munashqällata imatapis mana rurashqäta. Willakurpis Teytä nimashqannöllam willakü. 29Kachamaqnïqa noqawanmi imëpis këkan. Pë munashqanllata imëpis ruraptïmi japallätaqa jaqimantsu>>.
30Jesús tsënö niptinmi pëman atskaq creyiyarqan.
Libri kanantsikpaq Jesús ninqan
31Tsëpitanam pëman creyiq Israel nunakunata Jesús kënö nirqan: <<Yachatsiyashqaqnölla kawarqa rasunpa discïpulükunam kayanki. 32Tsënam rasunpa kaqta käyir librina kayanki>>.
33Tsënö niptinnam niyarqan: <<¿Imanirtaq niyämanki librina kayänäpaq kashqanta? Noqakunaqa Abrahampa mirëninkunam kayä. Manam imëpis jukpa esclävuntsu kayarqü>>.#Mat. 3.9; Luc. 3.8.
34Jesúsnam nirqan: <<Rasunpam rasunpam niyaq: Pipis jutsa rurëllachö kawarqa jutsapa esclävunmi kayan. 35Esclävuqa manam patronpa tsurintsu, sinöqa esclävullam. Patronpa tsurinllam tëtanpa kaqta imatapis rurananpaq puëdiq këkan. 36Tsëmi esclävu kayashqëkipita Teyta Diospa Tsurin jorquyäshuptiki rasunpa librina kayanki.#Gál. 5.1, 13.
37<<Musyämi Abrahampita miraq kayashqëkita. Abrahampita miraq këkarpis niyashqaqkunata mana chaskikurmi wanutsimëta munëkäyanki. 38Noqaqa Teytäpa nöpanchö rikashqäkunatam willayaq. Qamkunapis tëtëkikuna yachatsiyäshunqëkitam rurëkäyanki>>.
Diablupa wamran kayanqan
39Tsënam kënö niyarqan: <<Noqakunapa tëtäkunaqa Abrahamllam>>.
Jesúsnam nirqan: <<Tëtëkikuna Abraham kaptinqa pë kawashqannömi kawayankiman. 40Qamkunaqa Teyta Dios nimashqankunata willayaptiqmi wanutsimëta munëkäyanki. Abrahamqa manam imëpis Teyta Diospa willakuqninta wanutsita yarparqantsu. 41Qamkunaqa tëtëkikuna rurashqantam rurëkäyanki>>.
Tsënam kënö niyarqan: <<Noqakunaqa manam jitapakïtsu kayä. Teyta Diosllam noqakunapa Teytäkunaqa>>.
42Jesúsnam nirqan: <<Teyta Dios rasunpa Teytëkikuna kaptinqa kuyayämankimanmi. Noqaqa Teyta Diospitam kë patsaman shamushqä. Manam kikïpa munënïllapitatsu shamurqü, sinöqa Teytämi kachamashqa. 43¿Imanirtaq niyashqaqkunata käyiyämankitsu? Niyashqaqkunata chaskikïta mana munarmi tsënöqa këkäyanki.
44<<Qamkunapa tëtëkikunaqa diablum. Tsëmi pë munashqanllata imatapis rurëkäyanki. Pëqa unëpita patsa wanutsikuqmi. Y uli karmi imëpis rasun kaqtaqa parlantsu. Tsëmi pipis ulikurqa pënö ulikuq këkan. 45Rasun kaqta parlaptïpis manam creyiyämankitsu.
46<<Mëqëkipis jutsata rurashqa kaptïqa mä shimpiyämë. Rasun kaqta willëkäyaptiqqa ¿imanirtaq creyiyämankitsu? 47Teyta Diospa wamran karqa pë nishqantam cäsukuyankiman. Diospa wamrankuna mana karmi cäsuyankitsu>>.
Abraham manaraq yurikuptinpis Jesús kanqan
48Tsënö niptinmi Israel nunakuna kënö niyarqan: <<¡Qamqa Samaria nunakunanömi llutanta parlëkanki! ¡Qamchöqa supëmi këkan!>>
49Jesúsnam nirqan: <<Noqachöqa manam ima supëpis kantsu. Noqaqa manam Teytäta manakaqpaq churätsu. Qamkunam sï noqata manakaqpaq churëkäyämanki. 50Noqaqa manam alabakütsu, sinöqa llapan nunakunata juzgaq Teyta Diosmi alliman churamanqa. 51Rasunpam niyaq: Nishqäkunata chaskikuqkunaqa manam imëpis wanuyanqatsu>>.
52Israel nunakunanam niyarqan: <<Kananqa rasunpam musyayä qamchö supë këkanqanta. Abrahampis y profëtakunapis llapanmi wanuyarqan. Tsënö këkaptinpis qam nikanki: <Nishqäkunata chaskikuqkunaqa manam imëpis wanuyanqatsu>. 53¿Abrahampita mastsuraq qam kanki? Abrahampis y profëtakunapis wanïkäyaptinqa ¿pï kashqëkitataq qamqa yarpëkanki?>>
54Jesúsnam nirqan: <<Niyanqëkinö alabakuptïqa parlashqäkunapis manakaqllapaqmi kanman. Teytämi noqataqa alliman churamanqa. Pëtam qamkunapis <Diosnïmi> nikäyanki. 55Qamkunaqa manam pëta reqiyankitsu. Tsënö kaptinpis noqaqa reqïmi. <Manam reqïtsu> nirqa qamkunanö ulichi käman. Y nimashqankunataqa llapantam cäsü. 56Unë castëkikuna Abrahammi shamunäpaq kashqanta musyar kushikurqan. Shamuqta rikëkamarnäqa alläpam kushikurqan>>.
57Israel nunakunanam niyarqan: <<Qamqa manaran pitsqa chunka (50) watayuqpis kankiraqtsu. Tsënö këkar ¿imanöpataq Abrahamta reqinkiman karqan?>>
58Jesúsnam nirqan: <<Rasunpam rasunpam niyaq: Abraham manaraq yurikuptin Noqam Kä>>.#8.58 Noqam Kä nirqa Jesucristo käyitsirqan kikin Dios kashqantam. Tsëpita masta musyanëkipaq leyinki Éxo. 3.14; Juan 10.30-33.
59Tsëmi rumita tsarirkur tsampita munayaptin Jesús ratakïkurqan. Tsëpitanam [nunakunapa chöpinpa pasar] templupita ewkurqan.
Currently Selected:
Juan 8: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.