Juan 14
14
Jesús näni kanqan
1<<Ama llakikuyëtsu. Teyta Diosmanpis y noqamanpis markäkuyë. 2Teytäpa wayinchöqa atskam cuartukuna këkan. Tsënö mana kaptinqa manam: <qamkunapaq alistaqmi ëwashaq> niyaqmantsu karqan. 3Ëwarir alistar usharirnam kutimushaq pushakuyänaqpaq. Noqa kanqächönam qamkunapis kayämunki. 4Musyayankim mëqan nänipa tsëman chäyänëkipaq kashqantapis>>.
5Tsënam Tomás kënö nirqan: <<Teyta, mëman ëwanëkipaq kashqantapis mana musyëkarqa ¿imanöpataq nänitapis reqiyäshaq?>>
6Jesúsnam nirqan: <<Noqam näniqa kä, rasun kaqmi kä y wiñë kawëpis kä. Noqata mana chaskimarqa Teytä kaqman manam pipis chanqatsu.#Mat. 11.27; Juan 1.18; 6.46; Hech. 4.12. 7Noqata reqimarqa Teytätapis reqiyankim. Tsëmi kananpitaqa rikashqana kar reqiyankina>>.
8Felipinam nirqan: <<Teyta, Teyta Diosta reqïkatsillämë. Reqitsimaptikiqa mananam tapushqëkinatsu>>.
9Jesúsnam nirqan: <<Felipe, unëpitana qamkunawan këkaptï ¿manaku reqimankiraq? Noqata reqimaq kaqqa Teytätapis reqinmi. Reqikämarqa ¿imanirtaq: <Teytëkita reqitsimë> nimanki? 10¿Manaku creyinki Teytäwan juknölla këkäyashqäta y Teytäpis noqawan juknölla këkashqanta? Tsëmi niyashqaqkunaqa kikïpitatsu këkan, sinöqa noqachö këkaq Teytäpitam. Pëmi munashqanta noqawan ruran. 11Teytäwan juknölla këkashqäta y pëpis noqawan juknölla këkashqanta nikaptiqqa creyiyämankimanmi. Nishqäkunata mana creyiyämarpis milagru rurashqäkunata rikëkarqa creyiyämë.
12<<Rasunpam rasunpam niyaq: Teytä kaqman ewkuptï noqaman markäkamuqkunaqa noqa rurashqänömi rurayanqa. Alläpa espantëpaqkunatam rurayanqa. 13Noqapa shutïchö imatapis Teytäta mañakuyaptikiqa rurashaqmi. Tsurin karmi tsënö rurashaq Teytä alabashqa kananpaq. 14Shutïchö imatapis mañakuyaptiki rurashaqmi.#Mat. 7.7-11; Luc. 11.9-13; Juan 15.7, 16; 16.23-24; 1Juan 3.21-22; 5.14-15.
Espíritu Santuta kachamunanpaq Jesús ninqan
15<<Noqata kuyamarqa llapan mandamientükunata cäsukuyë.#Deut. 6.4-9; 11.1. 16Teyta Diosta mañakuptïmi juk Yanapakuqta kachamunqa. Pëmi imëyaqpis qamkunawan këkanqa. 17Pëqa rasun kaqta käyitsikuq Espíritu Santum. Teyta Diosta mana cäsuqkunaqa Espíritu Santutapis manam chaskiyanqatsu. Tsënö chaskiyanqatsu pëta mana ashir y pëta mana reqirmi. Tsënö kaptinpis qamkunaqa reqiyankinam. Tsënö reqiyanki qamkunawan kaptin y qamkunachö kananpaq kaptinmi.
18<<Qamkunata manam japallëkikunatatsu jaqiriyashqëki, sinöqa kutimushaqmi. 19Ichikllanam pishin nunakuna mana rikäyämänanpaq. Qamkunaqa rikäyämankim. Noqa kawashqäpitam qamkunapis kawayanki. 20Tsë junaqmi käyiyanki Teytächö noqa këkashqäta, noqachö qamkuna këkäyashqëkita y qamkunachö noqa këkashqäta. 21Mandamientükunata cumpliq kaqqa rasunpam kuyaman. Kuyamaq kaqtaqa Teytäpis kuyanmi. Noqapis kuyarmi pëwan këkäshaq>>.
22Mana Iscariote kaq Judasnam tapurqan: <<Teyta, noqakunawan këkarqa ¿imanirtaq wakin nunakunawanpis kankitsu?>>
23Jesúsnam nirqan: <<Pipis kuyamarqa nishqäkunata cäsukunmi. Kuyamaq kaqtaqa Teytäpis kuyanmi. Tsëmi Teytäwan shamur imëyaqpis pëwan këkäshaq. 24Noqata mana kuyamaq kaqqa nishqäkunata manam cäsukuntsu. Noqa nishqäkunaqa manam kikïpa yarpënïpitatsu, sinöqa kachamaqnï Teytäpitam.
25<<Llapan këkunata niyaq qamkunawan këkashqäyaqmi. 26Ewkuptïnam noqapa rantï Yanapakuq Espíritu Santuta qamkunaman Teytä kachamunqa. Pëmi llapanta yachatsiyäshunki y llapan yachatsiyashqaqta yarpätsiyäshunki.
27<<Alli kawëtam qamkunata jaqipuyaq. Alli kawënïtam qamkunata qoykuyaq. Noqa yanapayashqaqnöqa manam pipis yanapayäshunkitsu. Ama llakikuyëtsu ni mantsakäyëtsu. 28Qamkunata niyarquqnam ewkurpis kutimunäpaq kashqanta. Teytä kaqman ewkuptï ama llakikuyankitsu. Pëqa noqapita mas puëdiqmi këkan. Rasunpa kuyamarqa llakikuyänëkipa rantin kushikuyankimanmi. 29Qamkunata tsënö willayaq manaraq ewkurmi. Ewkuptïnam musyayanki nishqäkuna rasunpa kashqanta.
30<<Kë patsapa mandakuqnin shamïkannam.#14.30 Kë patsapa mandakuqninpaq parlarqa Satanáspaqmi Jesús parlarqan. Tsëmi qamkunawan alläpaqa parlashaqnatsu. Wanutsimänanpaqqa manam pëpa munënin kantsu. 31Tsënö kaptinpis Teytä nimashqanta cumplirmi wanutsimänanpaq jaqirishaq. Tsënöpam nunakuna musyayanqa Teytäta kuyashqäta. ¡Sharkuyë, këpita juklla ewkushun!>>
Currently Selected:
Juan 14: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.