Gálatas 1
1
Apóstol Pablo napakunqan
1-2Galacia provinciachö këkaq wawqikuna y panikuna:
Noqa Pablum kë cartata qamkunapaq apëkätsimü. Apóstol kanäpaqqa manam nunakunatsu churayämashqa, sinöqa Jesucristum y pëta kawaritsimuq Teyta Diosmi.
Këchö këkaq wawqikuna y panikunam qamkunapaq salüduskunata apatsikayämun. 3Yayantsik Teyta Dios y Señor Jesucristo ankupäyäshurniki alli kawayänëkipaq yanapëkulläyäshï. 4Yayantsik Teyta Dios munashqannömi kë patsachö jutsa rurëpita salvamänantsikpaq Jesucristo wanurqan.#Mat. 20.28; Mar. 10.45; 1Tim. 2.6; Tito 2.14. 5Teyta Dios imëyaqpis alabashqa këkullätsun. Tsënö katsun.
Wawqikuna y panikuna llutan yachatsikïta chaskiyanqan
6Musyayashqëkinöpis Jesucristupa kuyakïninwanmi Teyta Dios qayayäshurqëki. Tsëta musyëkar ¿imanirtan llutan yachatsikïta chaskir Teyta Diospita raslla witikuyashqanki? ¡Tsëtaqa manam imanöpa käyitapis puëdïtsu! 7Jesucristupa willakïninpita mas juk willakïqa manam salvakunantsikpaq kantsu. Tsënö këkaptinpis wakin nunakunam Jesucristupa willakïninman yaparkuryan llutanta yachëkätsiyäshunki.
8Yachatsiyashqaqta manakaqpaq churar llutanta pipis yachatsikuqtaqa infiernuman Teyta Dios jitëkutsun. Noqakunatapis llutanta yachatsiyaptiqqa infiernuman jitëkayämätsun. Ciëlupita ángel kaptinpis llutanta yachatsiqtaqa infiernuman jitëkutsun. 9Yapëpis kënömi nï: Pipis Jesucristupa willakïnin jananman llutan yachatsikïta yapaq kaqtaqa infiernuman jitëkutsun.
10Tsënö nir ¿nunakuna alabayämänantatsuraq ashikä? ¿Nunakunapita alli rikashqa këtatsuraq munëkä? Noqaqa manam nunakuna alabayämänanpaqtsu yachëkätsï, tsëpa rantinqa Teyta Dios: <<Allitam rurarqunki>> nimänanpaqmi.#1Tes. 2.4. Nunakuna alabayämänan rëkurlla yachatsirqa manam Jesucristupa sirwiqnintsu käman.
Apostolnin kananpaq Pabluta Jesucristo churanqan
11Wawqikuna y panikuna, shumaq käyikuyë. Alli willakïta willakushqäqa manam nunakunapa yarpënintsu këkan. 12Tsë willakïtaqa manam nunatsu yachatsimashqa, sinöqa kikin Jesucristum revelacionchö käyitsimashqa.
13Qamkuna musyayankim nöpata Israel nunakunapa costumbrinkunata cumplir imanö kashqätapis. Tsë witsanmi Jesucristuta chaskikuqkunapa contran shärir qatikacharqä. Pëkunatam llapanta ushakätsita munarqä.#Hech. 8.3; 22.4-5; 26.9-11. 14Wakin Israel mayïkunapitapis masmi costumbrïkunata välitsirqä.#Hech. 22.3. Llapan winë mayïkunapitapis masmi Moisés qellqashqankunata cumplirqä.
15Imanö kaptinpis manaraq yurikuptïmi Teyta Dios ankupämar pëta sirwinäpaq akramashqana kanaq.#Isa. 49.1; Jer. 1.5. 16Tsëpitam Jesucristuta chaskikunäpaq shumaq käyiratsimar#Hech. 9.3-6; 22.6-10; 26.13-18. mana Israel nunakunaman willakïninta willakunäpaq kachamashqa.
Tsënö kachamaptinmi willakïninta käyitsimänanpaq pitapis tapukurqänatsu. 17Manam noqapita mas punta kaq apostolkunawan parlanäpaqpis Jerusalénman ëwarqätsu. Tsëpa rantinqa Arabia partipam ewkurqä. Tsëpitanam Damasco markaman yapë kutirqä. 18Tsëpita kima watataran Pedruwan parlaq Jerusalénman ëwarqä.#Hech. 9.26-30. Tsëchömi chunka pitsqa junaq pëwan juntu kayarqä. 19Tsëchömi reqirqä Señor Jesucristupa wawqin Santiaguta. Wakin apostolkunataqa manam tarirqätsu. 20Teyta Diosmi musyan mana ulikïkashqäta.
21Tsëpitanam Siria y Cilicia provinciakunapa ëwarqä.#1.21 Cilicia provinciachömi Pablupa markan Tarso karqan (Hech. 9.30). Siria provinciachönam Antioquía karqan (Hech. 11.25-26). 22Judea provinciachö#1.22 Judea provinciachömi Jerusalén karqan. wawqikuna y panikunaqa manam mëqanpis reqiyämarqanraqtsu. 23Pëkunash kënö niqta wiyayänaq: <<Qatikachämaqnintsik nunam kananqa Jesucristupa willakïninta willakurna purikan>>.
24Tsënö niqta wiyarshi Teyta Diosta alabayänaq.
Currently Selected:
Gálatas 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.