Abdías 1
1
Edomita nunakunata Teyta Dios castigananpaq ninqan
1Këchömi qellqarëkan Edom nación nunakunapaq profëta Abdíasta Teyta Dios revelashqan.
Teyta Diosmi nacionkunaman juk willakuqta kachashqa.
Tsë willakuqmi nikan:
<<¡Aku ëwashun edomita nunakunata atacanantsikpaq!>>#Isa. 34.5-17; 63.1-6; Jer. 49.7-22; Eze. 25.12-14; 35.1-15; Amós 1.11-12; Mal. 1.2-5.
2Edomita nunakunatam Teyta Dios nin:
<<Wakin nacionkunapitapis mas takshallan marka kayänëkipaqmi castigayashqëki.
Tsënöpam pasëpa penqakïman churayashqëki.
3Qamkunaqa qaqakunata uchkïkur wayikikuna rurashqa karmi nuna tukïkäyanki.
Altun kaq qaqakunachö tärarmi yarpëkäyanki pipis mana venciyäshunëkipaq kashqanta.
Tsënö nuna tukurmi kikikikuna engañakïkäyanki.
4Pichaknö#1.4a Wakin nunakunaqa äguilanö niyanmi. më altupa päriyaptikipis#1.4b Wakin nunakunaqa bolayaptikipis niyanmi. y qoyllurkuna këkäyashqanchö punuyänëkipaq rurayaptikipis tsëpita jitarayämushqëkim>>.
Teyta Diosmi tsënö nin.
5<<Paqaspa suwakuq yëkuqkunapis ¿manaku puëdiyashqan kaqllata apakuyan?
Üvas pallaqkunapis ¿manaku juk ishkë sarta üvaskunata yuranchö jaqiriyanraq?
Tsënö kaptinpis noqaqa chipyëpam ushakätsiyashqëki.
6Edomita nunakuna, imëkëkikunatapis llapantam qochiyäshunki.
Alli allin kaqkunata pakarëkätsiptikipis ashi ashirkurmi apakuyanqa.
7Llapan yanapayäshuqnikikunapis contrëki tikrarmi engañayäshunki.
Venciriyäshurnikim nacionnikikunapitapis qarquyäshunki.
Yanasëkikunapis contrëkim tikrakuriyanqa.
Mas markäkunqëki yanasëkipis ulipäyäshurnikim desgraciaman jitarkuyäshunki.
Edomita nunakuna, ¡mëtaq yachëyuq kayashqëki!>>
8 Teyta Diosmi edomita nunakunata mastapis kënö nin:
<<Qamkunata castigayänaq junaq llapan musyaq nunakunatam ushakätsishaq.
Täräyashqëki jirkakunachö manam jukllëllapis yachëyuq nunakuna quedayanqatsu.
9Temánchö täraq puëdiq nunakunapis mantsakarmi tsuktsukyäyanqa.
Täräyashqëki kaqchöqa chipyëpam wanutsishqa kayanqa.
Edomita nunakunapa jutsan ima kanqanpis
10<<Qamkunaqa castëki këkaptinmi Israel nunakunata jipatsiyarqunki y wanutsiyarqunki.
Tsënö rurayashqëki rëkurmi kikikikunapis penqakïpaq pasëpa ushakäyanki.#Joel 3.19.
11Karupita shamuq contran soldädukuna imëkatapis markapita apakuyaptin y Jerusalénpa punkunkunata pakir ushakätsiyaptin qamkunaqa tsë soldädukunata yanapayarqëkim.
Qochiyashqankunata rakinakuyänanpaq sortiyayaptin tsë nunakunanömi qamkunapis imëkankunatapis apakuyarqëki.
12¡Imanirtaq asipäyarqëki castëkikunata desgracia pasayaptin!
¡Imanirtaq asipäyarqëki Judá nación raqällana tikrariptin!
¡Imanirtaq asipäyarqëki ankupëpaq këkaqta rikëkarnin!#Sal. 137.7; Lam. 4.21.
13¡Imanirtaq desgracia pasëkaptin akrashqä markaman yëkuyarqëki!
¡Imanirtaq makillankuna choqpashqa waqëkäyaqta rikëkar asipäyarqëki!
¡Imanirtaq contrankuna venciyaptin imantapis apakuyänëkipaq yëkuyarqëki!
14¡Imanirtaq safëkaqkunata wanutsiyänëkipaq tinkuq nänikunachöpis shuyaräyarqëki!
¡Imanirtaq ëqikïkaqkunata tsari tsarïkur qoykuyarqëki contrankunapa makinman!
Teyta Dios juzganan junaq kanqan
15<<Llapan nación nunakunata juzganäpaq kaq junaq ichikllanam pishikan.
Tsë junaqmi nunakunata jipatsiyashqëkinölla qamkunatapis jipatsiyashqëki.
16 Sagrädu jirkächö kuyanqä nunakunata jipatsiyashqëkinömi qamkunata y llapan nación nunakunatapis jipatsiyashqëki.
Castigaptïmi chipyëpa illakäyanqa.
17Kawëkar quedaqkunaqa Sión jirkamanmi ratakuyanqa.
Tsë jirka sagrädu kaptinmi Jacobpita miraq nunakuna salvakurnin herenciankunata ëlluyanqa.
18Tsë witsanmi Jacobpita y Josépita miraq nunakuna ninanö kayanqa.
Esaúpita miraq nunakunanam#1.18 Esaúpita miraq nunakunaqa edomita nunakunam kayan. tsakishqa oqshanö kayanqa.
Edomita nunakunata chipyëpa ushakäratsiyaptinmi jukllëllapis kawëkar quedayanqatsu.
Noqa Teyta Diosmi tsënö nï>>.
Israel nunakunata Teyta Dios yanapananpaq ninqan
19Tsëpitanam Neguevchö täraq Israel nunakuna Edom partita qochiyanqa.
Sefelachö täraq Israel nunakunam filisteo nunakuna täräyashqan partita qochiyanqa.
Wakin Israel nunakunanam Efraín partita y Samaria partita ëlluyanqa.
Benjamín trïbu kaq Israel nunakunanam Galaad partita ëlluyanqa.
20Juk lädu nacionpita atska Israel nunakuna kutimurmi cananeo nunakuna unë täräyashqan partita ëlluyanqa Sarepta markayaq.
Jerusalénpita Sefarad markaman prësu apayashqan nunakunam kutimur Neguevchö këkaq markakunata ëlluyanqa.
21Llapanta vencirirnam Sión jirkaman witsäyanqa Esaúpita miraq nunakunata juzgayänanpaq.
Teyta Diospa makinchömi llapanpis kanqa.
Currently Selected:
Abdías 1: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
