Mateo 1
1
Jesúspa unë castankuna pï kayanqanpis
Lucas 3.23-38
1Abrahampita y rey Davidpita miraq Jesucristupa unë castankuna këkunam kayarqan:
2Abrahampa tsurinmi karqan Isaac.
Isaacpa tsurinnam karqan Jacob.
Jacobpa tsurinnam karqan Judá y wawqinkunapis.
3Judápa tsurinkunanam kayarqan Fareswan Zara.
Pëkunapa mamäninmi karqan Tamar.
Farespa tsurinnam karqan Esrom.
Esrompa tsurinnam karqan Aram.
4Arampa tsurinnam karqan Aminadab.
Aminadabpa tsurinnam karqan Naasón.
Naasónpa tsurinnam karqan Salmón.
5Salmónpa tsurinnam karqan Booz.
Boozpa mamäninmi karqan Rahab.
Boozpa tsurinnam karqan Obed.
Obedpa mamäninmi karqan Rut.
Obedpa tsurinnam karqan Isaí#1.5 Wakin traduccionkunachöqa Jesé niyanmi..
6Isaípa tsurinnam karqan rey David.#1Crón. 2.1-15; Rut 4.18-22.
Rey Davidpa tsurinnam karqan Salomón.
Salomónpa mamäninmi karqan Uríaspa pajun.
7Salomónpa tsurinnam karqan Roboam.
Roboampa tsurinnam karqan Abías.
Abíaspa tsurinnam karqan Asa.
8Asapa tsurinnam karqan Josafat.
Josafatpa tsurinnam karqan Joram.
Jorampa tsurinnam karqan Uzías.
9Uzíaspa tsurinnam karqan Jotam.
Jotampa tsurinnam karqan Acaz.
Acazpa tsurinnam karqan Ezequías.
10Ezequíaspa tsurinnam karqan Manasés.
Manaséspa tsurinnam karqan Amón.
Amónpa tsurinnam karqan Josías.
11Josíaspa tsurinnam karqan Jeconías y wawqinkunapis.
Jeconías kawashqan witsanmi Israel nunakunata tsarïkur Babilonia soldädukuna nacionninman prësu apakuyarqan.#2Rey. 24.14-15; 2Crón. 36.10; Jer. 27.20.
12Tsëchönam Jeconíaspa tsurin Salatiel yurikurqan.
Salatielpa tsurinnam karqan Zorobabel.
13Zorobabelpa tsurinnam karqan Abiud.
Abiudpa tsurinnam karqan Eliaquim.
Eliaquimpa tsurinnam karqan Azor.
14Azorpa tsurinnam karqan Sadoc.
Sadocpa tsurinnam karqan Aquim.
Aquimpa tsurinnam karqan Eliud.
15Eliudpa tsurinnam karqan Eleazar.
Eleazarpa tsurinnam karqan Matán.
Matánpa tsurinnam karqan Jacob.
16Jacobpa tsurinnam karqan Maríapa qowan José.
Maríapa wawanmi karqan Jesús. Pëmi karqan Teyta Dios kachamushqan Cristo.
17Abraham kawashqan witsanpita David yurikushqanyaqmi juk chunka chusku generacionkuna karqan. Tsënöllam David kawashqan witsanpita Israel nunakunata Babiloniaman apakuyashqan karqan juk chunka chusku generacionkuna. Tsënöllam Babiloniaman apakuyashqan witsanpita Jesucristo yurikushqanyaqpis juk chunka chusku generacionkuna karqan.
Jesús yurikunqan
Lucas 2.1-7
18Këchömi qellqarëkan Jesucristo manaraq yurikuptin ima pasakushqanpis. Joséwan casakuyänanpaq María parlashqanam kayarqan.#Luc. 1.27. Joséwan manaraq juntakarmi Espíritu Santupa poderninwan qeshyaq tikrarqan. 19Joséqa alli nuna karmi Maríata mana desonranan rëkur pakëllapa jaqirita yarparqan.
20Tsënö yarpakachëkaptinmi Teyta Diospa angelnin Joséta suëñïninchö kënö nirqan: <<Rey Davidpa castan José, Maríawan casakïta ama penqakïtsu. Pëqa Espíritu Santupa poderninwanmi qeshyaq këkan. 21Ollqutam qeshpikunqa. Pëman markäkuqkunata jutsankunapita salvananpaq kaptinmi tsë wamrapa shutin churanki Jesústa#1.21 Jesús ninanqa Teyta Diosmi salvan ninanmi.>>.#Luc. 1.31.
22Llapanpis tsënö pasarqan profëtanwan Teyta Dios kënö nishqan cumplikänanpaqmi:
23<<Juk doncëlla shipashmi qeshyaqyärir ollqu wamrata qeshpikunqa.
Tsë wamrapa shutinmi churanqa Emanuelta>>.#Isa. 7.14.
(Emanuel ninanqa Teyta Dios noqantsikwan këkan ninanmi.)
24Tsënö niptinmi José punïkashqanpita riyarkamur Teyta Diospa angelnin nishqannölla Maríata warminpaq ëllukurkurqan. 25Maríawan tärarpis wawan yurikushqanyaq manam punuyarqanraqtsu. Wamra yuririptinnam shutin churarqan Jesústa.#Luc. 2.21.
Currently Selected:
Mateo 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.